ପୁରୀ ଅଫିସ,୨୯ା୭: ଅନ୍ଲାଇନରେ ପାଠପଢାବେଳେ ମୋବାଇଲ ଫୋନ୍ ଫାଟିଲା। ତେବେ ସୌଭାଗ୍ୟବଶତଃ ରକ୍ଷା ପାଇଛନ୍ତି ଜଣେ ସପ୍ତମଶ୍ରେଣୀ ଛାତ୍ରୀ। ତାଙ୍କ ବାମ ହାତରେ ଆଘାତ ଲାଗିଛି। କିନ୍ତୁ ମୋବାଇଲ ଫୋନ୍ଟି ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି। ଏମିତି ଏକ ଅଭାବନୀୟ ଘଟଣା ମଙ୍ଗଳବାର ପୁରୀ ବାଲିଘାଇ ଆଦର୍ଶ ନଗର ଅଞ୍ଚଳରେ ଘଟିଛି। ଏହି ଘଟଣା ପରେ ଅନ୍ଲାଇନ ମାଧ୍ୟମରେ ପାଠପଢାକୁ ନେଇ ଛାତ୍ରୀଛାତ୍ର ଓ ସେମାନଙ୍କ ଅଭିଭାବକମାନେ ଏକପ୍ରକାର ଭୟଭୀତ ହୋଇପଡ଼ିିଛନ୍ତି।
କରୋନା ସଂକ୍ରମଣ ବ୍ୟାପୁଥିବାରୁ ସ୍କୁଲ, କଲେଜ, କୋଚିଂ ସେଣ୍ଟର ଆଦିକୁ ବନ୍ଦ କରିଦିଆଯାଇଛି। ଏହି ସମୟରେ ଛାତ୍ରୀଛାତ୍ର ଘରେ ରହି ମୋବାଇଲ ଫୋନ୍ ମାଧ୍ୟମରେ ଅନ୍ଲାଇନରେ ପାଠ ପଢିବେ ବୋଲି ଗଣଶିକ୍ଷା ବିଭାଗ ପକ୍ଷରୁ ନିଷ୍ପତ୍ତି ନିଆଯାଇଛି। ଫଳରେ ପିଲାମାନେ ଅନ୍ଲାଇନରେ ପାଠ ପଢିବା ସହ ହୋମ୍ୱର୍କ ମଧ୍ୟ କରୁଛନ୍ତି। ହ୍ବାଟ୍ସଆପ୍ ଜରିଆରେ ଏଭଳି ଶିକ୍ଷାଦାନ ପ୍ରକ୍ରିୟା ଜାରି ରହିଛି। ତେବେ ମଙ୍ଗଳବାର ସକାଳେ ଆଦର୍ଶ ନଗରର ବିଦ୍ୟାଧର ପଲେଇଙ୍କ ଝିଅ ରୂପ୍ସା ପଲେଇ (ପୁରୀ କେନ୍ଦ୍ରୀୟ ବିଦ୍ୟାଳୟର ସପ୍ତମ ଶ୍ରେଣୀ ଛାତ୍ରୀ) ଘରେ ଅନ୍ଲାଇନରେ ପାଠ ପଢୁଥିଲେ। ଶିକ୍ଷକ ହ୍ବାଟ୍ସଆପ୍ରେ ଦେଇଥିବା ପ୍ରଶ୍ନର ଉତ୍ତର ରଖୁଥିଲେ। ଏହି ସମୟରେ ସେ ବାମ ହାତରେ ମୋବାଇଲ ଧରିଥିଲେ। ହଠାତ୍ ମୋବାଇଲ ଫୋନ୍ଟି ଫାଟିଯାଇଥିଲା। ସୌଭାଗ୍ୟବଶତଃ ରୂପ୍ସାଙ୍କର ବିଶେଷ କିଛି କ୍ଷତି ହୋଇ ନ ଥିବାବେଳେ ବାମହାତରେ ସାମାନ୍ୟ ଆଘାତ ଲାଗିଛି। ହାତର କେତୋଟି ଅଙ୍ଗୁଳିରେ ଫୋଟକା ହୋଇଯାଇଛି। କିନ୍ତୁ ଫାଟିବା ପରେ ମୋବାଇଲ ଫୋନ୍ଟି ଜଳି ଉଠିଥିଲା। ଏହି ଘଟଣା ପରେ ରୁପ୍ସା ଭୟଭୀତ ହୋଇପଡ଼ିଥିଲେ। ତେବେ ତାଙ୍କର ବିଶେଷ କିଛି କ୍ଷତି ହୋଇ ନ ଥିବା ସେ ପରେ ଜାଣିବାକୁ ପାଇ ଆଶ୍ୱସ୍ତ ହୋଇଥିଲେ। ରୂପ୍ସା କହିଛନ୍ତି, ଅନ୍ଲାଇନରେ ପାଠ ପଢୁଥିବାବେଳେ ମୋବାଇଲ ଫୋନ୍ ଫାଟିଯାଇଥିଲା। ଭଗବାନଙ୍କ ଦୟାରୁ ମୋର ବେଶି କିଛି ହୋଇନି, କେବଳ ହାତରେ କିଛି ଫୋଟକା ହୋଇଯାଇଛି।