ବିଞ୍ଝାରପୁର,୧୫ା୧୧(ଡି.ଏନ.ଏ.): ବିଞ୍ଝାରପୁର ବ୍ଲକ ଉତ୍ତରକୁଳ ପଞ୍ଚାୟତ ଆଦର୍ଶ ବିଦ୍ୟାଳୟକୁ ରାସ୍ତା ନିର୍ମାଣ ହୋଇନି। ଫଳରେ ରବିବାର ଅଭିଭାବକ-ଶିକ୍ଷକଙ୍କ ମଧ୍ୟରେ ଅନୁଷ୍ଠିତ ବୈଠକରେ ଅଭିଭାବକ କ୍ଷୋଭ ପ୍ରକାଶ କରିଛନ୍ତି। ପୂର୍ବରୁ ବିଦ୍ୟାଳୟ ଦାୟିତ୍ୱରେ ଥିବା ଶିକ୍ଷକ କ୍ଷୀରୋଦ ଚନ୍ଦ୍ର ମଲ୍ଲିକ ଅଭିଭାବକଙ୍କୁ ବୁଝାଶୁଝା କରିବାସହ ବିଦ୍ୟାଳୟଠାରୁ ମୁଖ୍ୟ ରାସ୍ତାକୁ ସରକାରୀ ଜମି ଲାଗିଛି। ଉକ୍ତ ଜମିରେ ସ୍ଥାୟୀ ରାସ୍ତା ହେବ ବୋଲି କହିଥିଲେ। ତେବେ ସୋମବାର ବିଧାୟିକା ପ୍ରମିଳା ମଲ୍ଲିକଙ୍କ ପାଖକୁ ଯାଇ କିଭଳି ଶୀଘ୍ର ରାସ୍ତା ହେବ ସେନେଇ ଆଲୋଚନା କରିଛନ୍ତି। ସେ ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେବାସହ ବିଧାୟିକାଙ୍କ ପାଖକୁ ଯିବାକୁ ୯ ଅଭିଭାବକଙ୍କୁ ମନୋନୀତ କରିଛନ୍ତି।
ସୋମବାର ରାଜ୍ୟର ସମସ୍ତ ବିଦ୍ୟାଳୟର ଷଷ୍ଠ ଓ ସପ୍ତମ ଶ୍ରେଣୀ ଖୋଲିବ। ଏନେଇ ସରକାର ଘୋଷଣା କରିଥିବା ବେଳେ ଉତ୍ତରକୁଳ ଆଦର୍ଶ ବିଦ୍ୟାଳୟରେ ପାଠପଢ଼ାକୁ ନେଇ ଆଶଙ୍କା ସୃଷ୍ଟି ହୋଇଛି। ୨ବର୍ଷ ପୂର୍ବେ ବିଦ୍ୟାଳୟ ନିର୍ମାଣ ସରିଥିବା ବେଳେ ଏପର୍ଯ୍ୟନ୍ତ ବିଦ୍ୟାଳୟକୁ ଯିବାପାଇଁ ରାସ୍ତା ହୋଇନି। ବିଦ୍ୟାଳୟ ଯିବାକୁ ହେଲେ ଗୋଟିଏ ପଟେ ଆଣ୍ଠୁଏ ପାଣି, ଅନ୍ୟପଟରେ ଗଲେ ଜଣେ ଲୋକଙ୍କ ପାଚେରି ଟପି ଯିବାକୁ ପଡୁଛି। ଆଉଏକ ସରକାରୀ ଜମି ବିଦ୍ୟାଳୟକୁ ଲାଗିଥିବା ବେଳେ ସେ ରାସ୍ତାରେ ପାଣି କାଦୁଅ ଓ ଘାସ ବଣ ରହିଛି। ଯାହାକୁ ନେଇ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ସେହିପରି ବିଦ୍ୟାଳୟକୁ ବିଦ୍ୟୁତ୍ ସଂଯୋଗ ଓ ପାନୀୟଜଳର ବ୍ୟବସ୍ଥା କରାଯାଇ ନାହିଁ। ଏଠାରେ ଷଷ୍ଠ ଶ୍ରେଣୀରେ ୬୯ ଓ ସପ୍ତମ ଶ୍ରେଣୀରେ ୫୯ ଛାତ୍ରୀଛାତ୍ର ନାମ ଲେଖାଇଛନ୍ତି। ଅଧ୍ୟକ୍ଷଙ୍କୁ ମିସାଇ ମୋଟ ୪ ଶିକ୍ଷକ ନିଯୁକ୍ତି ହୋଇଛନ୍ତି, ଯାହାକି ଛାତ୍ରୀଛାତ୍ରଙ୍କୁ ଶିକ୍ଷାଦାନ ପାଇଁ ଯଥେଷ୍ଟ ହେବନି ବୋଲି ବିଦ୍ୟାଳୟ ତରଫରୁ ଡକାଯାଇଥିବା ଅଭିଭାବକ-ଶିକ୍ଷକ ବୈଠକରେ ଅଭିଭାବକ କହିଛନ୍ତି। ଏପରି କି ରାସ୍ତା ନ ହେଲା ପର୍ଯ୍ୟନ୍ତ କେତେଜଣ ଅଭିଭାବକ ତାଙ୍କ ପିଲାଙ୍କୁ ବିଦ୍ୟାଳୟକୁ ଛାଡ଼ିବେ ନାହିଁ ବୋଲି ପ୍ରକାଶ କରିଛନ୍ତି। ଏହାକୁ ନେଇ ଆଲୋଚନା ଜୋର ଧରିଛି।