ପୁରୀ ଅଫିସ, ୧।୮: ଶ୍ରୀମନ୍ଦିର ଐତିହ୍ୟ ସୁରକ୍ଷା କରିଡର୍ କାର୍ଯ୍ୟ ଖୁବ୍ଶୀଘ୍ର ଆରମ୍ଭ ହେବ। ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଓଡ଼ିଶା ବ୍ରିଜ୍ ଆଣ୍ଡ କର୍ପୋରେଶନ ଲିମିଟେଡ୍ (ଓବି ଆଣ୍ଡ୍ ସିସି)କୁ ଦାୟିତ୍ୱ ଦିଆଯାଇଛି। ଶ୍ରୀମନ୍ଦିରର ୭୫ ମିଟର କରିଡର ଭିତରେ ଥିବା ସମସ୍ତ ମଠକୁ କଳିଙ୍ଗ ସ୍ଥାପତ୍ୟ ଶୈଳୀରେ ପୁନଃନିର୍ମାଣ କରାଯିବ। ପ୍ରାଥମିକ ପର୍ଯ୍ୟାୟରେ ଲଙ୍ଗୁଳି ମଠ, ବଡ଼ଛତା ମଠ ଓ ଛାଉଣି ମଠର ସୌନ୍ଦର୍ଯ୍ୟକରଣ ହେବ। ଏଥିସହ ମଠ ଗାଦିଗୃହ, ମନ୍ଦିର ଓ ଧ୍ୟାନମଣ୍ଡପ ଆଦିକୁ ନୂତନ ରୂପ ଦିଆଯିବ।
ଶନିବାର ଓବି ଆଣ୍ଡ୍ ସିସିର ପରିଚାଳନା ନିର୍ଦ୍ଦେଶକ (ଏମ୍ଡି) ଜୟକୃଷ୍ଣ ଦାସ, ଭାସ୍କର୍ଯ୍ୟ ଶିଳ୍ପୀ ପଦ୍ମବିଭୂଷଣ ସୁଦର୍ଶନ ସାହୁ ଏବଂ କେତେଜଣ ଅଧିକାରୀ ପୁରୀ ଆସି ଏହି କାର୍ଯ୍ୟର ସମୀକ୍ଷା କରିଛନ୍ତି। ଖୁବଶୀଘ୍ର ଶ୍ରୀମନ୍ଦିର ଐତିହ୍ୟ କରିଡର କାର୍ଯ୍ୟ ଆରମ୍ଭ ହେବ ବୋଲି ଶିଳ୍ପୀ ସାହୁ କହିଛନ୍ତି। ସିଂହଦ୍ୱାର ନିକଟରେ ଥିବା ଲଙ୍ଗୁଳି ମଠ ଓ ସିଂହଦ୍ୱାର ଦୁଇପାଶର୍ବରେ ଥିବା ବଡ଼ଛତା ମଠ ଓ ଛାଉଣି ମଠର ନିର୍ମାଣ କାର୍ଯ୍ୟ ଆରମ୍ଭ କରାଯିବ। ମଠ ଦୁଇଟି ମନ୍ଦିର ଆକୃତିର ହେବ। ଶ୍ରୀମନ୍ଦିର ଯେଉଁ ପଥରରେ ନିର୍ମାଣ ହୋଇଛି ସେହି ପଥର ବ୍ୟବହାର କରାଯିବ। ଅନ୍ୟପକ୍ଷରେ ବିଶ୍ୱ ଐତିହ୍ୟ ସହର ପରିକଳ୍ପନା ପାଇଁ ଅବଢ଼ା ଯୋଜନାରେ ୩୫୦୦ କୋଟି ଟଙ୍କାର ଅଟକଳ କରାଯାଇଛି। ସେହି ଅନୁପାତରେ ଐତିହ୍ୟ କରିଡର କାମ ହେବ ବୋଲି ଓବିସିସିର ଏମ୍ଡି କହିଛନ୍ତି। ତେବେ ଅବଢ଼ା ଯୋଜନାରେ ୮୦୦ କୋଟି ଟଙ୍କା ବ୍ୟୟରେ ଆରମ୍ଭ ହେବାକୁ ଥିବା ଐତିହ୍ୟ କରିଡର୍ କାର୍ଯ୍ୟର ରୂପରେଖ କ’ଣ ହେବ ସେନେଇ ଏବେ ପ୍ରଶ୍ନ ଉଠିଛି। ଏଥିପାଇଁ ପ୍ରାୟ ଦୁଇବର୍ଷ ପୂର୍ବରୁ ଶ୍ରୀମନ୍ଦିର ଚତୁଃପାଶର୍ବରେ ଥିବା ମଠଗୁଡ଼ିକୁ ଉଚ୍ଛେଦ କରାଯାଇଥିଲା। ୧୪ରୁ ୧୮ ମାସ ମଧ୍ୟରେ ଉକ୍ତ ମଠଗୁଡ଼ିକର ପୁନରୁଦ୍ଧାର କରାଯିବ ବୋଲି ପ୍ରଶାସନ ପ୍ରତିଶ୍ରୁତି ଦେଇଥିଲା। କିନ୍ତୁ ଏହି ପ୍ରତିଶ୍ରୁତି ପାଳନ ହୋଇ ନ ଥିବାରୁ ମଠାଧୀଶମାନେ କ୍ଷୋଭ ପ୍ରକାଶ କରିଥିଲେ। ତେବେ ଓବିସିସିର ବୈଷୟିକ ଟିମ୍ ସମେତ ସ୍ଥପତି ପୁରୀ ଆସି ବିଭିନ୍ନ ମଠ ଅନୁଧ୍ୟାନ କରିବା ପରେ ଏବେ ମଠଗୁଡ଼ିକର ପୁନରୁଦ୍ଧାର ହେବ ବୋଲି ଆଶା ସଞ୍ଚାର ହୋଇଛି।