ନୟାଗଡ ଅଫିସ,୧୩।୨: ସୁଧ ବାବଦରେ ୫ ହଜାର ଟଙ୍କା କମ୍ ଦେବାକୁ କହିବାରୁ ମହାନଜଙ୍କ ପରିବାର ଲୋକେ ଜଣେ ବ୍ୟକ୍ତିଙ୍କ ଆଖି ତାଡି ଦେଇଛନ୍ତି। ନୟାଗଡ ସଦର ଥାନା ଷଠିଆପଲ୍ଲୀ ଗଁାରେ ଗୁରୁବାର ରାତିରେ ଏହି ଅମାନୁଷିକ ଘଟଣା ଘଟିଛି। ଆହତ ଇଟାମାଟି ଥାନା ସଜନାପଡା ଗଁାର ପରମାନନ୍ଦ ରାଉତରାୟ(୪୬) ବାମ ଆଖି ହରାଇ କଟକ ବଡମେଡିକାଲର ଚକ୍ଷୁ ବିଭାଗରେ ଚିକିତ୍ସିତ ହେଉଛନ୍ତି। ପରମାନନ୍ଦଙ୍କ ସ୍ତ୍ରୀ ମୀନାଙ୍କ ଅଭିଯୋଗ କ୍ରମେ ନୟାଗଡ ସଦର ଥାନା ପୋଲିିସ ଆକ୍ରମଣକାରୀ ଶଙ୍କର୍ଷଣ ସ୍ବାଇଁ, ତାଙ୍କ ସ୍ତ୍ରୀ ଓ ମାମା, ସୁମା, ବାନିଆ, କୁନ୍ତି ପ୍ରମୁଖ ୪ ଝିଅଙ୍କ ବିରୋଧରେ ଏକ ମାମଲା(ନଂ୨୩/୨୧) ରୁଜୁ କରି ତଦନ୍ତ ଚଳାଇଛି। ଏହି ଘଟଣାରେ ସୁମାଙ୍କୁ ପୋଲିସ ଅଟକ ରଖିଛି।
ଅଭିଯୋଗ ଅନୁଯାୟୀ, ଇଟାମାଟି ଥାନା ସଜନାପଡା ଗଁାର ପରମାନନ୍ଦ ଓ ସ୍ତ୍ରୀ ମୀନା ଷଠିଆପଲ୍ଲୀ ଗଁାର ଶଙ୍କର୍ଷଣ ସ୍ବାଇଁଙ୍କଠାରୁ ୨୦ ହଜାର ଟଙ୍କା ମାସିକ ୩ ପ୍ରତିଶତ ସୁଧରେ ଆଣିଥିଲେ। ସୁଧ ମୂଳ ମିଶି ୩୦ ହଜାର ଟଙ୍କା ପରିଶୋଧ କରିବାକୁ ଏହି ଦମ୍ପତି ଷଠିଆପଲ୍ଲୀ ଯାଇଥିଲେ। ତେବେ ୪ଟଙ୍କା ସୁଧରେ ମୂଳ ପରିଶୋଧ କରିବାକୁ ଶଙ୍କର୍ଷଣଙ୍କ ପରିବାର ଲୋକେ କହିବା ସହ ଅଧିକ ୫ ହଜାର ଟଙ୍କା ଦାବି କରିଥିଲେ। ଆଉ ୫ ହଜାର ଟଙ୍କା ଦେଇ ହେବ ନାହିଁ ବୋଲି ପରମାନନ୍ଦ କହିବା ପରେ ଉଭୟଙ୍କ ମଧ୍ୟରେ ବଚସା ଆରମ୍ଭ ହୋଇଥିଲା। ଶେଷରେ ତାହା ଗଣ୍ଡଗୋଳର ରୂପ ନେଇଥିଲା। ଶଙ୍କର୍ଷଣ, ତାଙ୍କର ୪ଝିଅ, ସ୍ତ୍ରୀ ମିଳିତ ଭାବେ ପରମାନନ୍ଦ ଓ ତାଙ୍କ ସ୍ତ୍ରୀଙ୍କୁ ଆକ୍ରମଣ କରିଥିଲେ। ପରେ ପରମାନନ୍ଦଙ୍କୁ ହତ୍ୟା କରିବା ଉଦ୍ଦେଶ୍ୟରେ ତାଙ୍କ ଆଖିକୁ ତାଡି ନେଇଥିଲେ। ଗୁରୁତର ଅବସ୍ଥାରେ ପରମାନନ୍ଦଙ୍କୁ ପ୍ରଥମେ ନୟାଗଡ ଜିଲା ମୁଖ୍ୟ ଚିକିସତ୍ାଳୟରେ ଭର୍ତ୍ତି କରାଯାଇଥିଲା। ଅବସ୍ଥାରେ ଉନ୍ନତି ନ ଆସିବାରୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା।
