ଲକ୍ଷ୍ନୌ,୨୧।୮: ୟୁପିରେ କେବଳ ସାଧାରଣ ଲୋକ ନୁହଁନ୍ତି, ମାଙ୍କଡ ଉତ୍ପାତକୁ ନେଇ ଅଧିକାରୀମାନେ ମଧ୍ୟ ଚିନ୍ତାରେ ପଡିଛନ୍ତି। ବୃନ୍ଦାବନରେ ମାଙ୍କଡମାନଙ୍କ ପ୍ରାଦୁର୍ଭାବ ଯୋଗୁ ସାଧାରଣ ଲୋକଙ୍କ ଜୀବନ କଷ୍ଟସାଧ୍ୟ ହୋଇପଡିଛି। ବେଳେବେଳେ ମାଙ୍କଡମାନେ ଲୋକଙ୍କୁ ଆକ୍ରମଣ କରୁଛନ୍ତି। ଏଥର ମାଙ୍କଡ଼ର ଶିକାର ସାଧାରଣ ଲୋକ ନୁହେଁ ବରଂ ଜିଲାପାଳ ହୋଇଥିଲେ। ମାଙ୍କଡଟି ଜିଲାପାଳ ଏବଂ ପୋଲିସ କର୍ମଚାରୀଙ୍କ ଚଷମା ଧରି ପଳାଇ ଯାଇଥିଲା। ବହୁ ପରିଶ୍ରମ ପରେ ଚଷମାଟି ମାଙ୍କଡ଼ରୁ ଫେରାଇ ଅଣାଯାଇଥିଲା। ସୋସିଆଲ ମିଡିଆରେ ଏହାର ଭିଡିଓ ମଧ୍ୟ ଭାଇରାଲ ହେବାରେ ଲାଗିଛି।
ଏହି ଘଟଣାଟି ମଥୁରା ଜିଲାର ଅଟେ। ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବାରେ ଲାଗିଛି। ଭିଡିଓରେ ଏକ ମାଙ୍କଡ଼ ମଥୁରା ଜିଲାପାଳ ନବନୀତ ସିଂ ଚହଲଙ୍କ ଚଷମା ନେଇ ଏକ ଉଚ୍ଚ ସ୍ଥାନରେ ବସିଥିଲା। କୌତୁହଳର ବିଷୟ ହେଉଛି, ଭାରି ସୁରକ୍ଷା ବ୍ୟବସ୍ଥା ମଧ୍ୟରେ ଏହି ମାଙ୍କଡ଼ ଚଷମା ନେଇ ଚାଲିଗଲା, କେହି କିଛି କରିପାରିଲେ ନାହିଁ।
ବାଙ୍କେ ବିହାର ମନ୍ଦିରରେ ଦୁର୍ଘଟଣା ପରେ ମଥୁରା ଜିଲାପାଳ ଘଟଣା ସମ୍ପର୍କରେ ପଚାରିବାକୁ ଆସିଥିଲେ। ତାଙ୍କ ସହିତ ଅନ୍ୟ ଅଧିକାରୀ ଏବଂ ପୋଲିସ କର୍ମଚାରୀ ମଧ୍ୟ ଥିଲେ। ଏହି ସମୟରେ ଏକ ମାଙ୍କଡ଼ ଆସି ଜିଲାପାଳଙ୍କ ଚଷମା ନେଇ ପଳାଇଲା। ସମସ୍ତେ ମାଙ୍କଡ଼ରୁ ଚଷମା ଉଦ୍ଧାର କରିବାକୁ ଚେଷ୍ଟା କରିଥିଲେ। ବିଭିନ୍ନ ପ୍ରକାର ଖାଦ୍ୟ ଲୋଭ ମାଙ୍କଡ଼କୁ ଦିଆଯାଉଥିଲା, କିନ୍ତୁ ମାଙ୍କଡ଼ ଚଷମା ଦେଇ ନ ଥିଲା। ଏହା ଦୀର୍ଘ ସମୟ ଧରି ଚାଲିଥିଲା। ଶେଷରେ ବହୁ କଷ୍ଟରେ ଜିଲାପାଳଙ୍କ ଚଷମା ମାଙ୍କଡ ଫେରାଇ ଥିଲା।