ବଇଣ୍ଡା,୨୦।୫(ପରିକ୍ଷିତ ସାହୁ)
୧୯୭୭ରୁ ଆରମ୍ଭ ହୋଇଥିବା ବଇଣ୍ଡା ଚନ୍ଦନଯାତ୍ରାରେ କରୋନା ଲଗାଇଥିଲା ବ୍ରେକ୍। ୨୦୨୦ ଓ ୨୦୨୧ ମସିହାରେ ଏହି ଯାତ୍ରା କେବଳ ଠାକୁରଙ୍କ ନୀତିକାନ୍ତିରେ ସୀମିତ ରହିଥିବାରୁ ଆଠମଲ୍ଲିକ ଉପଖଣ୍ଡବାସୀ ଉତ୍ସବ ପାଳନ କରିପାରି ନ ଥିଲେ। ହେଲେ ଚଳିତବର୍ଷ ଚନ୍ଦନଯାତ୍ରାକୁ ଅନୁମତି ମିଳିଥିବାରୁ ଏଥର ଧୁମ୍ଧାମରେ ଆୟୋଜନ ଚାଲିଛି। ରଙ୍ଗବେରଙ୍ଗର ଆଲୋକମାଳା ସହ ଭଳିକି ଭଳି ଉଠା ଦୋକାନ ଓ ଦୋଳିରେ ବଇଣ୍ଡା ଯାତ୍ରା ପଡ଼ିଆ ସଜେଇ ହୋଇଯାଇଛି। ଆସନ୍ତା ୨୧ ତାରିଖରୁ ଆରମ୍ଭ ହେଉଥିବା ଏହି ୪ ଦିନିଆ ଯାତ୍ରା ୪୫ ବର୍ଷରେ ପଦାର୍ପଣ କରୁଥିବାରୁ ବଇଣ୍ଡା ଅଞ୍ଚଳବାସୀଙ୍କ ମଧ୍ୟରେ ନୂଆ ଉତ୍ସାହ, ଆନନ୍ଦ ଓ ଚମକ ଭରିଯାଇଛି।
ବୟୋଜ୍ୟେଷ୍ଠଙ୍କ କହିବା ମୁତାବକ, ଛେଣ୍ଡିପଦା ବ୍ଲକ ଆଉଁଳି ଗ୍ରାମରୁ ଆସି ପିଚୁଣ୍ଡୁ ବାବା ବଇଣ୍ଡାସ୍ଥିତ ଆନନ୍ଦମୁଣ୍ଡା ଗ୍ରାମରେ ରହୁଥିଲେ। ସେ ରାଧାକୃଷ୍ଣଙ୍କୁ ରଖି ମଠରେ ପୂଜା କରୁଥିବା ଯୋଗୁ ବଇଣ୍ଡାଠାରେ ଚନ୍ଦନ ଯାତ୍ରା କରିବାକୁ ନିଷ୍ପତ୍ତି ନେଇଥିଲେ। ଏପରି କି ଆନନ୍ଦମୁଣ୍ଡା, କଦଳୀମୁଣ୍ଡା, ବଇଣ୍ଡା ଗ୍ରାମବାସୀଙ୍କୁ ଏକାଠି କରି ଚନ୍ଦନ ଯାତ୍ରା ଆରମ୍ଭ କରିଥିଲେ। ପାପସରା ଗ୍ରାମର ରାଧାକୃଷ୍ଣଙ୍କ ଚଳନ୍ତି ପ୍ରତିମାଙ୍କୁ ଏଠାକାର ରାଧାକୃଷ୍ଣଙ୍କ ସହ ଚାପ ଖେଳାଯାଉଥିଲା। ୩ ଗ୍ରାମବାସୀ ଦୀର୍ଘବର୍ଷ ଧରି ଏକତ୍ର ଯାତ୍ରା ପାଳନ କରୁଥିବାବେଳେ ୧୯୮୪ରେ କଦଳୀମୁଣ୍ଡା ଓ ଆନନ୍ଦମୁଣ୍ଡା ଗ୍ରାମବାସୀ ଏଥିରୁ ଓହରି ଯାଇଥିଲେ। ଫଳରେ ସେବେଠାରୁ କେବଳ ବଇଣ୍ଡା ଗ୍ରାମବାସୀ ଚନ୍ଦନ ଯାତ୍ରା ପାଳନ କରିଆସୁଛନ୍ତି। ୧୯୮୬ ମସିହାରେ ପୁରୀରୁ ରାଧାକୃଷ୍ଣଙ୍କ ଚଳନ୍ତି ପ୍ରତିମା ଆଣି ବଇଣ୍ଡାଠାରେ ମନ୍ଦିର ପ୍ରତିଷ୍ଠା କରି ପୂଜାର୍ଚ୍ଚନା କରାଯାଉଛି। ଏହି ମନ୍ଦିର ନିକଟରେ ଥିବା ପୋଖରୀରେ ଚାପ ଖେଳାଯାଉଥିବାରୁ ଏହାର ନାମ ଚନ୍ଦନ ପୋଖରୀ ରଖାଯାଇଛି l ଦୀର୍ଘ ୪୫ ବର୍ଷ ମଧ୍ୟରେ ଯାତ୍ରା ଆୟୋଜନରେ ଅନେକ କିଛି ପରିବର୍ତ୍ତନ ଆସିଛି। ପୂର୍ବରୁ ଖୁବ୍କମ ବଜେଟରେ ଏହା ପାଳନ ହେଉଥିବାବେଳେ ଚଳିତବର୍ଷ ୮ ଲକ୍ଷ ଟଙ୍କା ଖର୍ଚ୍ଚ କରାଯିବ। ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିବାରୁ ଏହା ପ୍ରମୁଖ ଆକର୍ଷଣ ପାଲଟିବ ବୋଲି ଯାତ୍ରାକମିଟି ପକ୍ଷରୁ କୁହାଯାଇଛି।