ଥିରୁଭାନନ୍ତପୁରମ୍,୧୨।୩: କେନ୍ଦ୍ର ସ୍ବରାଷ୍ଟ ମନ୍ତ୍ରୀ ତଥା ଭାରତୀୟ ଜନତା ଦଳର ବରିଷ୍ଠ ନେତା ଅମିତ ଶାହା ରବିବାର ଦିନିକିଆ ଗସ୍ତରେ କେରଳରେ ପହଞ୍ଚିଛନ୍ତି। ଏଠାରେ ଭାଜପାର ଥ୍ରୀସୁର ଏକ ସାଧାରଣ ସଭାକୁ ସମ୍ବୋଧିତ କରି ଶାହା କହିଛନ୍ତି, କଂଗ୍ରେସ ନେତା କହୁଛନ୍ତି ସେମାନେ ଆମର ପ୍ରିୟ ନେତା ପ୍ରଧାନମନ୍ତ୍ରୀ ମୋଦିଙ୍କ କବର ଖୋଳିବେ। ମୁଁ ରାହୁଲ ଗାନ୍ଧୀଙ୍କୁ କହିବାକୁ ଚାହେଁ, ଆପଣ ତାଙ୍କୁ ବଦନାମ କରିବାକୁ ଯେତେ ଚେଷ୍ଟା କରିବେ, ଦେଶରେ ସେତେ ପଦ୍ମ ଫୁଲ ଫୁଟିବ।
ସେ କହିଛନ୍ତି, କେରଳର ଲୋକମାନେ କଂଗ୍ରେସ ଏବଂ କମ୍ୟୁନିଷ୍ଟମାନଙ୍କୁ ଦୀର୍ଘ ଦିନ ଧରି ରାଜ୍ୟ ଶାସନ କରିବାର ସୁଯୋଗ ଦେଇଛନ୍ତି। ବିଶ୍ୱ କମ୍ୟୁନିଷ୍ଟମାନଙ୍କୁ ପ୍ରତ୍ୟାଖ୍ୟାନ କରିଛି ଏବଂ ଦେଶ କଂଗ୍ରେସ ଦଳକୁ ପ୍ରତ୍ୟାଖ୍ୟାନ କରିଛି। କେରଳରେ କମ୍ୟୁନିଷ୍ଟ ଏବଂ କଂଗ୍ରେସ ପରସ୍ପର ସହ ଲଢୁଛନ୍ତି। ତେବେ ତ୍ରିପୁରା ନିର୍ବାଚନରେ କମ୍ୟୁନିଷ୍ଟ ଏବଂ କଂଗ୍ରେସ ପରସ୍ପର ସହ ମେଣ୍ଟ କରିଥିଲେ। ସେମାନେ ତ୍ରିପୁରାରେ ଭାଜପା ବିରୋଧରେ ପ୍ରତିଦ୍ୱନ୍ଦ୍ୱିତା କରିଥିଲେ। କିନ୍ତୁ, ତ୍ରିପୁରାର ଲୋକମାନେ ଭାଜପାକୁ ସମର୍ଥନ କରିଥିଲେ। ତେଣୁ କେରଳରେ ମଧ୍ୟ ଏଥର ପଦ୍ମ ଫୁଟିବ।