ଅନୁଗୋଳ ଅଫିସ, ୨ା୮: ମଶାଜନିତ ରୋଗରେ ଯାଉଛି ମଣିଷ ଜୀବନ। କେତେବେଳେ ମଶା ମ୍ୟାଲେରିଆର ବାହାକ ସାଜୁଛି ତ କେବେ ଡେଙ୍ଗୁ ରୋଗରେ ଆକ୍ରାନ୍ତ କରୁଛି। ଗତ ୧୦ ବର୍ଷ ମଧ୍ୟରେ ଅନୁଗୋଳ ଜିଲାରେ ଏହି ଦୁଇ ରୋଗରେ ମୋଟ୍ ୫୪ ଜଣଙ୍କ ମୃତ୍ୟୁ ହୋଇଛି। ସେଥିରୁ ମ୍ୟାଲେରିଆରେ ସର୍ବାଧିକ ୨୮ ଓ ଡେଙ୍ଗୁରେ ୨୬ ରୋଗୀଙ୍କ ଜୀବନହାନି ଘଟିଛି। ତେବେ ୨୦୨୧ ବର୍ଷରେ ଜିଲାରେ ମାଲେରିଆ କି ଡେଙ୍ଗୁ ରୋଗୀଙ୍କୁ ଚିହ୍ନଟ କରାଯାଇ ନାହିଁ। ତଥାପି ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ଏହି ମଶାଜନିତ ରୋଗ ନିପାତ ପାଇଁ ଉଦ୍ୟମ ଜାରି ରହିଛି। ବିଶେଷକରି ପାହାଡ଼ିଆ ଓ ଦୁର୍ଗମ ଅଞ୍ଚଳବାସୀଙ୍କୁ ସଚେତନ କରାଯିବା ସହ ଔଷଧବୁଡ଼ା ମଶାରି ବଣ୍ଟନ କରାଯାଉଛି।
ମେଡିକାଲ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅନୁଗୋଳ ଜିଲାର ପାଲଲହଡ଼ା, ଆଠମଲ୍ଲିକ ଓ କିଶୋରନଗର ବ୍ଲକରେ ଅତୀତରେ ମ୍ୟାଲେରିଆ ରୋଗ ଦେଖାଦେଇଛି। ତାଳଚେର, ବଅଁରପାଳ, ଛେଣ୍ଡିପଦା, ଅନୁଗୋଳରେ ଡେଙ୍ଗୁ ରୋଗ ଡରାଇଛି। ଚଳିତବର୍ଷ ଏହି ଦୁଇ ରୋଗ ଦେଖାଦେଇ ନ ଥିଲେ ମଧ୍ୟ ଲୋକଙ୍କୁ ସଚେତନ କରିବାକୁ ନିଧି ରଥ ଜିଲାରେ ଗଡ଼ୁଛି। ୨୦୧୧ ମସିହାରେ ୧୦ ହଜାର ୩୧୬ ଜଣ ମ୍ୟାଲେରିଆରେ ଆକ୍ରାନ୍ତ ହୋଇଥିଲେ। ସେମାନଙ୍କ ମଧ୍ୟରୁ ମାତ୍ର ୨ ଜଣଙ୍କ ମୃତ୍ୟୁ ହୋଇଥିଲା। ୨୦୧୨ରେ ୭ ହଜାର ୬୭୬ ଆକ୍ରାନ୍ତଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଥିଲା। ୨୦୧୩ରେ ୧୧ ହଜାର ୫୩୩ ଜଣ ରୋଗୀଙ୍କ ମଧ୍ୟରୁ ୫ ଜଣଙ୍କ ମୃତ୍ୟୁ ହୋଇଥିଲା। ୨୦୧୪ରେ ୨୭ ହଜାର ୬୦୦ ଆକ୍ରାନ୍ତଙ୍କ ମଧ୍ୟରୁ ୭ ଜଣଙ୍କ ଜୀବନ ଯାଇଥିଲା। ୨୦୧୫ରେ ୨୯ ହଜାର ୮୫୩ ଜଣ ଆକ୍ରାନ୍ତଙ୍କ ମଧ୍ୟରୁ ୫ ଜଣଙ୍କ ମୃତ୍ୟୁ ହୋଇଥିଲା। ୨୦୧୬ରେ ୧୭ ହଜାର ୨୭୨ ଜଣ ମ୍ୟାଲେରିଆ ରୋଗୀଙ୍କ ମଧ୍ୟରୁ ୨ ଜଣ, ୨୦୧୭ରେ ୯ ହଜାର ୮୫୪ ଆକ୍ରାନ୍ତଙ୍କ ମଧ୍ୟରୁ ୩ ଜଣଙ୍କ ମୃତ୍ୟୁ ଘଟିଥିଲା। ୨୦୧୮ରେ ୬୪୭ ଜଣ ଆକ୍ରାନ୍ତ ହୋଇଥିଲେ। ୨୦୧୯ରେ ମାତ୍ର ୨୬ ଓ ୨୦୨୦ରେ ୧୦୯ ଜଣ ମ୍ୟାଲେରିଆରେ ଆକ୍ରାନ୍ତ ହୋଇଥିବାବେଳେ ୩ ଜଣଙ୍କ ଜୀବନ ଯାଇଥିଲା। ୨୦୨୧ରେ ଜିଲାରେ ମ୍ୟାଲେରିଆ ରୋଗୀ ଚିହ୍ନଟ ହୋଇନାହାନ୍ତି। ସେହିଭଳି ୨୦୧୧ ବର୍ଷରେ ଜିଲାରେ ଡେଙ୍ଗୁ ରୋଗରେ ୨୩ ଜଣଙ୍କ ମୁଣ୍ଡ ଗଡ଼ିଥିଲା। ୨୦୧୨ରେ ଡେଙ୍ଗୁ ରୋଗୀଙ୍କ ମୃତ୍ୟୁ ହୋଇ ନ ଥିଲା। ୨୦୧୩ରେ ଜିଲାରେ ୩ ଜଣଙ୍କ ଜୀବନ ଯାଇଥିଲା। ୨୦୧୪ରେ ୫୪ ଜଣ, ୨୦୧୫ରେ ୫୬, ୨୦୧୬ରେ ୪୫ ଜଣ, ୨୦୧୭ରେ ୧୪ ଜଣ, ୨୦୧୮ରେ ୩୪, ୨୦୧୯ରେ ୩୫, ୨୦୨୦ରେ ଜିଲାରେ ମାତ୍ର ୨ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଥିଲେ। ୨୦୨୧ରେ ଜିଲାରେ ଡେଙ୍ଗୁ ରୋଗୀ ଚିହ୍ନଟ ହୋଇନାହାନ୍ତି। ଜିଲାରେ ଏହି ରୋଗକୁ ନିୟନ୍ତ୍ରଣ କରିବାକୁ ଆଶା ଓ ସ୍ବାସ୍ଥ୍ୟକର୍ମୀଙ୍କୁ କାମରେ ଲଗାଯାଇଥିବା ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି।
ସମସ୍ତେ ସଚେତନ ରୁହନ୍ତୁ
ଚଳିତବର୍ଷ ଅନୁଗୋଳ ଜିଲାରେ ଡେଙ୍ଗୁ ଓ ମ୍ୟାଲେରିଆ ରୋଗୀ ଚିହ୍ନଟ ହୋଇନାହାନ୍ତି। ତଥାପି ଲୋକଙ୍କୁ ସଚେତନ କରିବାକୁ ସମସ୍ତ ଉପଜିଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି। ସ୍ବାସ୍ଥ୍ୟକର୍ମୀମାନେ ମଧ୍ୟ ଉଦ୍ୟମ ଜାରି ରଖିଛନ୍ତି। ପଡ଼ୋଶୀ ଜିଲାରେ ଡେଙ୍ଗୁ ରୋଗୀ ବାହାରିଥିବାରୁ ସମସ୍ତେ ସଚେତନ ରୁହନ୍ତୁ।
-ସିଦ୍ଧାର୍ଥ ଶଙ୍କର ସ୍ବାଇଁ, ଜିଲାପାଳ, ଅନୁଗୋଳ
ସଂଖ୍ୟାରେ ଅଙ୍କୁଶ ଲାଗିଛି
ଜିଲାରେ ପୂର୍ବପେକ୍ଷା ଡେଙ୍ଗୁ ଓ ମ୍ୟାଲେରିଆ ରୋଗୀଙ୍କ ସଂଖ୍ୟାରେ ଅଙ୍କୁଶ ଲାଗିଛି। ଲୋକମାନେ ଘର ଅଗଣା ଓ ଚତୁଃପାର୍ଶ୍ୱ ସଫା ରଖିଲେ ବର୍ଷାଦିନେ ଏହି ରୋଗ ବ୍ୟାପିବ ନାହିଁ। ବିଶେଷକରି ଜିଲାର ଦୁର୍ଗମ ଓ ପାହାଡ଼ିଆ ଅଞ୍ଚଳକୁ ସ୍ବତନ୍ତ୍ର ଟିମ୍ ଯାଇ ଲୋକଙ୍କୁ ସଚେତନ କରୁଛି।
-ଡାକ୍ତର ତ୍ରିଲୋଚନ ପ୍ରଧାନ,
ସିଡିଏମ୍ଓ, ଅନୁଗୋଳ
ଲୋକେ ସଚେତନ ହେଉନାହାନ୍ତି
ମଶାଜନିତ ରୋଗକୁ ଲୋକେ ଗୁରୁତ୍ୱର ସହ ନେଉନାହାନ୍ତି। ବର୍ଷାଦିନେ ପରିବେଶ ନିର୍ମଳ ରଖୁନାହାନ୍ତି କି ମଶାରି ଟାଣି ଶୋଉନାହାନ୍ତି। ତେଣୁ ମଶାଜନିତ ରୋଗ ସମସ୍ୟା ଦେଖାଦେଉଛି। ଲୋକମାନେ ସଚେତନ ହେଲେ ଏହି ରୋଗ ଅନୁଗୋଳରୁ ନିପାତ ହୋଇପାରିବ।
-ବିଶ୍ୱଜିତ୍ ବିଶ୍ୱାଳ, ଅନୁଗୋଳ
ସହର ସଫେଇ ହେଉନି
ଲୋକମାନଙ୍କୁ ଠିକ୍ ଭାବେ ପ୍ରଶାସନ ପକ୍ଷରୁ ସଚେତନ କରାଯାଉ ନାହିଁ। ଦୁର୍ଗମ ଅଞ୍ଚଳ କଥା କହିବା ପୂର୍ବରୁ ପ୍ରଶାସନ ସହରାଞ୍ଚଳ କଥା ଚିନ୍ତା କରୁ। ଅନୁଗୋଳ ସହରକୁ କେତେ ସ୍ବଚ୍ଛ କରାଯାଇଛି ତାହା ସ୍ପଷ୍ଟ କରାଯିବା ଉଚିତ। ଏବେ ବି ସହରର ଚାରିଆଡ଼େ କୁଢ଼ କୁଢ଼ ଆବର୍ଜନା ଗଦା ହୋଇ ରହିଛି।
-ସ୍ବରୂପ ପାଢ଼ୀ, ଅନୁଗୋଳ