ଆମେରିକାର ଏକ ପାର୍କ ବର୍ତ୍ତମାନ ଭୟଙ୍କର ସ୍ଥାନ ପାଲଟିଛି। ଏହି ପାର୍କ ଏକଦା ଲୋକମାନଙ୍କର ପ୍ରିୟ ଥିଲା। ପ୍ରବଳ ଜନଗହଳି ଲାଗି ରହୁଥିଲା। ପାର୍କରେ ଥିବା ଅନେକ ଜିନିଷକୁ ଦେଖିବା ପାଇଁ ଆସିଥାନ୍ତି। କିନ୍ତୁ ଏବେ ଏହା ଏକ ଭୟଙ୍କର ସ୍ଥାନ ପାଲଟିଛି। ଏଠାରେ ବେଳେବେଳେ ଆଲୋକ ଦେଖାଯାଏ ତ ଆଉ କେତେବେଳେ ଅଜବ ଶବ୍ଦ ଶୁଣାଯାଏ। ଏହି ଥିମ୍ ପାର୍କକୁ ବିଦ୍ୟୁତ୍ ଯୋଗାଣ ବର୍ଷ ବର୍ଷ ଧରି ବନ୍ଦ ହୋଇଯାଇଛି। ଲୋକମାନେ ଏହି ସ୍ଥାନକୁ ଯିବାକୁ ଭୟ କରନ୍ତି। ସମ୍ପ୍ରତି ଏହି ଥିମ୍ ପାର୍କର ଭୟାନକ ଚିତ୍ର ସାମ୍ନାକୁ ଆସିଛି। ଡକ୍ୟୁମେଣ୍ଟାରୀ ଫିଲ୍ମ ପ୍ରସ୍ତୁତ କରୁଥିବା ଜଣେ ନିର୍ମାତା ଏହାର ଫଟୋ ଶେୟାର କରିଛନ୍ତି।
ଯୁକ୍ତରାଷ୍ଟ୍ରର ନିଉ ଅର୍ଲିଅନ୍ସରେ ଥିବା ସିକ୍ସ ଫ୍ଲାଗସ୍ ଥିମ୍ ପାର୍କରେ ସର୍ବଦା ଜନଗହଳି ହେଉଥିଲା। କିନ୍ତୁ ୨୦୦୫ରେ ହୋଇଥିବା ବାତ୍ୟା ଏହି ପାର୍କକୁ ନଷ୍ଟ କରି ଦେଇଥିଲା। ସେବେଠାରୁ ଏହା ବନ୍ଦ ହୋଇଯାଇଥିଲା। ଆଜି ବି ଜିନିଷଗୁଡ଼ିକ ସେଠାରେ ବିଛାଡ଼ି ହୋଇରହିଛି। ଏହି ପାର୍କ ଝଡ଼ରେ ନଷ୍ଟ ହୋଇଥିବାବେଳେ ବନ୍ୟାରେ ୨୦ ଫୁଟ ପାଣି ପଶି ଯାଇଥିଲା। ଯେଉଁଥିପାଇଁ ସବୁକିଛି ନଷ୍ଟ ହୋଇଯାଇଥିଲା।
ଏଠାରେ ହୋଇଥିବା ବାତ୍ୟାରେ ପ୍ରାୟ ୧୮୦୦ ଲୋକଙ୍କର ମୃତ୍ୟୁ ଘଟିଥିଲା। ୪ ଲକ୍ଷରୁ ଅଧିକ ଲୋକଙ୍କୁ ଭୂମିହୀନ ହୋଇଥିଲେ। ଆଜିଯାଏ ବି ଲୋକମାନେ ଦାରିଦ୍ର୍ୟର ସମ୍ମୁଖୀନ ହେଉଛନ୍ତି।
କୁହାଯାଏ, ବାତ୍ୟାରେ ପ୍ରାଣ ହରାଇଥିବା ଆତ୍ମାଗୁଡ଼ିକ ଏହି ପାର୍କରେ ଘୂରି ବୁଲୁଛି। ବହୁ ବର୍ଷ ଧରି ଏଠାରେ ବିଦ୍ୟୁତ୍ ସରବରାହ ବନ୍ଦ ରହିଛି। ମାତ୍ର ରାତି ହେଲେ ଉଜ୍ଜ୍ୱଳ ଆଲୋକ ଦେଖାଯାଉଛି। ମଝିରେ ମଝିରେ ଅଜବ ଧ୍ୱନି ଶୁଣିବାକୁ ମିଳୁଛି। ଏହା ବିଶ୍ୱର ସବୁଠୁ ଭୟଙ୍କର ପାର୍କ।