ନୃତ୍ୟ କାହାକୁ ବା ଭଲ ନ ଲାଗେ। ସେଥିପାଇଁ ତ ପୃଥିବୀର ବିଭିନ୍ନ ସ୍ଥାନରେ ନାନା ପ୍ରକାରର ନୃତ୍ୟ ରହିଛି। ଯାହାକି ସେହି ସ୍ଥାନର ସଂସ୍କୃତି ଓ ପରମ୍ପରାକୁ ବି ଦର୍ଶାଏ। ତେଣୁ କିଛି ଲୋକ ବିଭିନ୍ନ ପ୍ରକାରର ନୃତ୍ୟ ଶିଖିବାରେ ରୁଚି ରଖନ୍ତି। ହେଲେ ‘ଜୌଲି’ ନାମକ ଏକ ନୃତ୍ୟ ଅଛି ଯାହାକୁ ଚାହିଁଲେ ବି ଜଣେ ଶିଖିପାରିବେନି। କାରଣ ଏହା ହେଉଛି ପୃଥିବୀର ସବୁଠାରୁ କଷ୍ଟକର ନୃତ୍ୟ। ଉକ୍ତ ନୃତ୍ୟ ଆଫ୍ରିକାରେ ଦେଖିବାକୁ ମିଳେ। ୟୁନେସ୍କୋ ଅନୁସାରେ ଜୌଲି ଏକ ଲୋକପ୍ରିୟ ନୃତ୍ୟ ଅଟେ, ଯାହା କୋଟେ ଡି ଆଇଓ୍ବରର ବୋଆଫଲେ ଓ ଜ୍ୟୁଏନୋଲା ସହରର ଗୁରୋ ସମ୍ପ୍ରଦାୟର ସଂସ୍କୃତିର ଅଂଶ ଅଟେ। ଉକ୍ତ ନୃତ୍ୟ ନାରୀ ସୌନ୍ଦର୍ଯ୍ୟକୁ ସମର୍ପିତ । ଏଥିରେ ମାସ୍କ, ପୋଷାକ, ସଙ୍ଗୀତ ଓ ନୃତ୍ୟ ସବୁକିଛି ଥାଏ। ଏହି ନୃତ୍ୟ ‘ଡିଜେଲା ଲୋଉ ଜୌଲି’ ବା ‘ଡିଜେଲାଙ୍କ ଝିଅ ଜୌଲା’ନାମରେ ବି ପରିଚିତ। ଏଥିରେ ସଙ୍ଗୀତର ତାଳେ ତାଳେ ନୃତ୍ୟ କରୁଥିବା ବ୍ୟକ୍ତି କାଠର ସ୍ବତନ୍ତ୍ର ମୁଖା ପିନ୍ଧି ଗୋଡକୁ ଏତେ କ୍ଷୀପ୍ର ଗତିରେ ଚାଳନା କରନ୍ତି ଯେ, ଦେଖିଲେ ବେଶ୍ ଆଶ୍ଚର୍ଯ୍ୟ ଲାଗେ। ଏଥିରେ ପାଦର ମୁଭମେଣ୍ଟ ଏକାପରି ଲାଗୁଥିଲେ ହେଁ, ପ୍ରତି ପାଦର ମୁଭମେଣ୍ଟ ଭିନ୍ନ ଭିନ୍ନ ହୋଇଥାଏ। କୁହାଯାଏ ମାଇକେଲ୍ ଜ୍ୟାକ୍ସନ ବି ଏହି ନୃତ୍ୟରୁ ଦିନେ ପ୍ରଭାବିତ ହୋଇ କିଛି ଡ୍ୟାନ୍ସ ଷ୍ଟେପ୍କୁ ଆପଣେଇଥିଲେ। ଏଥିରେ ସାତ ପ୍ରକାରର ମାସ୍କ ପିନ୍ଧି ନୃତ୍ୟ କରାଯାଏ। ଏହି ନୃତ୍ୟ ପରିବେଶ ସୁରକ୍ଷାର ବାର୍ତ୍ତା ବି ଦେଇଥାଏ। ଉକ୍ତ ନୃତ୍ୟକୁ ଶିଖିବା ଲାଗି ୫ ବର୍ଷରୁ ଉର୍ଦ୍ଧ୍ୱ ସମୟ ଲାଗେ।
