ଠାକୁର ପୂଜାଠୁ ଆରମ୍ଭ କରି ଉପହାର ଦେବା ହେଉ ଅବା ସାଜସଜ୍ଜା ପର୍ଯ୍ୟନ୍ତ ଫୁଲର ଆଦର ସବୁଠି ରହିଛି। ତେବେ ସାଧାରଣତଃ ସଭିଙ୍କ ବାଡ଼ି ବଗିଚାରେ ବିଭିନ୍ନ ପ୍ରକାରର ଫୁଲ ଉପଲବ୍ଧ ଥିବା ବେଳେ ଆଉ କିଛି ଆବଶ୍ୟକତା ବେଳେ କିଣିବାକୁ ହୋଇଥାଏ। ହେଲେ କିଛି ଫୁଲ ଏମିତି ବି ରହିଛି, ଯାହାର ଦାମ୍ ଶୁଣିଲେ ଆପଣଙ୍କୁ ଆଶ୍ଚର୍ଯ୍ୟ ଲାଗିବ। ଜାଣିବା ସେଭଳି କିଛି ଫୁଲ ସମ୍ପର୍କରେ…
କଦୁପୁଲ୍ ଫୁଲ: କୁହାଯାଏ, ଶ୍ରୀଲଙ୍କାରେ ଦେଖାଯାଉଥିବା ଏହି ଫୁଲ ଦୁନିଆର ସବୁଠୁ ଦାମୀ ଫୁଲ। ତେବେ କେବଳ ରାତିରେ ଫୁଟି ମାତ୍ର କିଛି ଘଣ୍ଟା ମଧ୍ୟରେ ଶୁଖି ଯାଉଥିବା ଏହି ଫୁଲର ସୁବାସିତ ମହକ ସଭିଙ୍କୁ ବିମୋହିତ କରିଥାଏ। ଏପର୍ଯ୍ୟନ୍ତ ଏହି ଦୁର୍ଲଭ ଫୁଲର ଏକ ନିର୍ଦ୍ଦିଷ୍ଟ ଦାମ୍ ସ୍ଥିର ହୋଇନାହିଁ।
ଜୁଲିଏଟ୍ ରୋଜ୍: ଏହି ଫୁଲର ଦାମ୍ ୧୫.୮ ମିଲିଅନ୍ ଡଲାର ବା ୧୧୨କୋଟି ଟଙ୍କା। ଆଶ୍ଚର୍ଯ୍ୟ ଲାଗୁଥିଲେ ବି ଏହା ସତ। ଡେଭିଡ୍ ଅଷ୍ଟିନ୍ ନାମକ ଜଣେ ବ୍ୟକ୍ତି ଅନେକ ପ୍ରକାରର ଫୁଲକୁ କଲମି କରାଇ ଏହି ନୂତନ ପ୍ରଜାତିର ଫୁଲ ଚାରା ପ୍ରସ୍ତୁତ କରିଥିଲେ। ଏଥିପାଇଁ ତାଙ୍କୁ ପାଖାପାଖି ୧୫ ବର୍ଷ ସମୟ ଲାଗିଥିଲା। ୨୦୦୬ରେ ପ୍ରଥମ ଥର ପାଇଁ ଏହି ଫୁଲକୁ ବିକ୍ରି କରାଯାଇଥିଲା।
ଶେନ୍ଜେନ୍ ନୋଙ୍ଗକେ ଅର୍କିଡ୍: ଏହା ଏକ ଅତ୍ୟନ୍ତ ସୁନ୍ଦର ଏବଂ ଭିନ୍ନ ଦେଖାଯାଉଥିବା ଏକ ଅର୍କିଡ୍ ଫୁଲ। ଚାଇନାରେ ଥିବା ଶେନ୍ଜେନ୍ ନୋଙ୍ଗକେ ୟୁନିଭର୍ସିଟିର ଏଗ୍ରିକଲ୍ଚର ସାଇଣ୍ଟିଷ୍ଟମାନଙ୍କ ୮ ବର୍ଷର ପ୍ରଚେଷ୍ଟା ପରେ ଏହି ନୂତନ ଅର୍କିଡ୍ ପ୍ରଜାତି ପ୍ରସ୍ତୁତ ହୋଇଥିଲା। ଆପଣ ଜାଣିଛନ୍ତି, ଏହି ଫୁଲର ବିଶେଷତ୍ୱ ହେଉଛି ଏହା ୪-୫ ବର୍ଷରେ ଥରେ ଫୁଟିଥାଏ, ଯେଉଁ ସମୟରେ ଏହାକୁ ନିଲାମ କରାଯାଇଥାଏ। ତେବେ ବର୍ତ୍ତମାନ ସୁଦ୍ଧା ଏହି ଫୁଲ ୧.୪୦ କୋଟି ଟଙ୍କା ବା ୨ ଲକ୍ଷ ଆମେରିକୀୟ ଡଲାରରେ ବିକ୍ରି ହୋଇଛି।
