ବ୍ରହ୍ମପୁର ଅଫିସ,୧୭।୭: ଜଣେ ମା’ ଶିଶୁକନ୍ୟାଙ୍କୁ ଜନ୍ମ ଦେବା ପରେ ମେଡିକାଲରୁ ଫେରାର ହୋଇଯାଇଛନ୍ତି। ଏଭଳି ଘଟଣା ଶୁକ୍ରବାର ରାତିରେ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଘଟିଛି। ନବଜାତ ଶିଶୁକନ୍ୟାର ସୁରକ୍ଷା ଓ ଯତ୍ନ ପାଇଁ ତାକୁ ଏମ୍କେସିଜି ମେଡିକାଲକୁ ସ୍ଥାନାନ୍ତର କରାଯାଇଛି। ଶିଶୁଟି ଏବେ ସ୍ବତନ୍ତ୍ର ନବଜାତ ସୁରକ୍ଷା ବିଭାଗ (ଏସ୍ଏନ୍ସିୟୁ)ରେ ଚିକିତ୍ସିତ ହେଉଛି। ମେଡିକାଲରେ ଶିଶୁଟିର ସ୍ତନ୍ୟପାନ ବ୍ୟବସ୍ଥା ମଧ୍ୟ କରାଯାଉଛି ବୋଲି ବିଭାଗୀୟ ଡାକ୍ତର ସୂଚନା ଦେଇଛନ୍ତି। ଶିଶୁକନ୍ୟାଙ୍କୁ ସ୍ବତନ୍ତ୍ର ପୌଷ୍ୟା ସନ୍ତାନ କେନ୍ଦ୍ରରେ ରଖାଯିବ ବୋଲି ଚାଇଲ୍ଡ ଲାଇନ୍ କେନ୍ଦ୍ରୀୟ ସଂଯୋଜକ ସାଇ ପ୍ରସାଦ ସାମଲ କହିଛନ୍ତି।
ମିଳିଥିବା ସୂଚନା ମୁତାବକ, ଶୁକ୍ରବାର ଅପରାହ୍ନରେ ଜଣେ ଗର୍ଭବତୀ ନନ୍ଦିନୀ (ଛଦ୍ମନାମ) ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ। ତାଙ୍କୁ ପ୍ରସବ ଗୃହକୁ ନିଆଯାଇଥିଲା। ସେଠାରେ ମହିଳା ଜଣଙ୍କ ଏକ ଶିଶୁକନ୍ୟାଙ୍କୁ ଜନ୍ମ ଦେଇଥିଲେ। ହେଲେ ମହିଳା ଜଣକ ରାତିରେ ଶଯ୍ୟା ଛାଡି କେଉଁଆଡେ ଚାଲିଯାଇଥିଲେ। ଶିଶୁଟି କାନ୍ଦିବା ପରେ ମା’ଙ୍କୁ ଖୋଜାପଡିଥିଲା। ହେଲେ ତାଙ୍କ ପିତ୍ତା ମିଳି ନ ଥିଲା। ମେଡିକାଲରେ ଥିବା ସିସିଟିଭି ଫୁଟେଜ କାମ କରୁ ନ ଥିବାରୁ ସମ୍ପୃକ୍ତ ମହିଳାଙ୍କ ସମ୍ପର୍କରେ ଜଣାପଡି ନ ଥିଲା ବୋଲି ମେଡିକାଲ ଅଫିସର ପ୍ରଦୀପ ଗନ୍ତାୟତ ସୂଚନା ଦେଇଛନ୍ତି। ଶିଶୁଟିର ସୁରକ୍ଷା ଓ ଯନତ୍ ପାଇଁ ତାକୁ ଏମ୍କେସିଜି ମେଡିକାଲ ସ୍ଥାନାନ୍ତର କରାଯାଇଛି। ଏ ନେଇ ଖଲ୍ଲିକୋଟ ଥାନାରେ ଏକ ଅଭିଯୋଗ କରାଯାଇଛି ବୋଲି ଡାକ୍ତର ଗନ୍ତାୟତ କହିଛନ୍ତି।