ଭବାନୀପାଟଣା,୭।୯(ଡି.ଏନ୍.ଏ.): ସ୍ବାମୀଙ୍କ ସନ୍ଦେହଜନକ ମୃତ୍ୟୁକୁ ନେଇ ସୋମବାର କଳାହାଣ୍ଡି ଆରକ୍ଷୀ ଅଧିକ୍ଷକ ବାତୁଲା ଗଙ୍ଗାଧର ଦ୍ୱାରସ୍ଥ ହୋଇଛନ୍ତି ଜଣେ ମହିଳା। ଏସ୍ପି ମହିଳାଙ୍କ ଅଭିଯୋଗ ଶୁଣି କେସିଙ୍ଗା ଥାନାକୁ ତଦନ୍ତ ନିର୍ଦ୍ଦେଶ ଦେଇଛନ୍ତି। କେସିଙ୍ଗା ଥାନା ଆଇଆଇସି ମାମଲା ରୁଜୁ କରିବା ସହ ପ୍ରାଥମିକ ତଦନ୍ତ ଆରମ୍ଭ କରିଛନ୍ତି।
ଅଭିଯୋଗ ଅନୁଯାୟୀ, ନର୍ଲା ବ୍ଲକ ଅଧୀନସ୍ଥ ତୁଳାପଡା ଗ୍ରାମର ଜଗଦୀଶ ନାୟକଙ୍କ ଝିଅ ପ୍ରିୟଙ୍କା (୨୩) ଗତ ୨୦୧୯ ଅପ୍ରେଲ ୪ ତାରିଖରେ ପଲମ ଫାଣ୍ଡି ଅଧୀନସ୍ଥ ଭୋଇପଡା ଗ୍ରାମର ରୋହିତ ଭୋଇଙ୍କ ବଡ଼ପୁଅ ରମେଶଙ୍କୁ ବିବାହ କରିଥିଲେ। ତେବେ ଗତ ଅଗଷ୍ଟ ୪ ତାରିଖରେ ରମେଶ ନିଜର ସାଙ୍ଗମାନଙ୍କ ସହ ବଙ୍ଗୋମୁଣ୍ଡା ଯାଇଥିଲେ। ପରଦିନ ଘର ପାଖ ନାଳ ନିକଟରେ ରମେଶ ମୁମୂର୍ଷୁ ଅବସ୍ତାରେ ପଡିଥିଲେ। ତାଙ୍କ ମୁଣ୍ଡରେ ଗହୀର ଆଘାତ ଲାଗିଥିଲା। ମାତ୍ର କାହାକୁ କିଛି ନ ଜଣାଇ ତାଙ୍କ କକା ଶ୍ୱଶୁରର ପୁଅ ହେମନ୍ତ, ରମେଶଙ୍କୁ ଭବାନୀପାଟଣା ଓ ପରେ ବିଶାଖାପାଟଣା ନେଇଯାଇଥିଲେ। ସେଠାରେ ଅଗଷ୍ଟ ୧୩ ତାରିଖରେ ତାଙ୍କର ମୃତ୍ୟୁ ଘଟିଥିଲା ବୋଲି ପ୍ରିୟଙ୍କା ନିଜ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି। ମାତ୍ର ମୃତ୍ୟୁପରେ ଶାଶୁଘର ଲୋକ ଥାନାରେ ଅଭିଯୋଗ ନ କରି ମୃତଦେହ ସତ୍କାର କରିଦେଲେ। ଏପରିକି ସ୍ବାମୀଙ୍କୁ ଦେଖିବାକୁ ପ୍ରିୟଙ୍କାଙ୍କୁ ସୁଯୋଗ ମିଳି ନ ଥିଲା। ବୋଲି ସେ ଅଭିଯୋଗ କରିଛନ୍ତି। ଥାନାରେ ଏତଲା ଦେବା ପାଇଁ ଶ୍ୱଶୁର ରୋହିତ ମନା କରିଥିଲେ ବୋଲି ଅଭିଯୋଗ ପତ୍ରରେ ସ୍ପଷ୍ଟ ଉଲ୍ଲେଖ ହୋଇଛି। ତେବେ ଯୋଜନାବଦ୍ଧ ଭାବେ ତାଙ୍କ ସ୍ବାମୀଙ୍କୁ ହତ୍ୟା କରାଯାଇଛି ବୋଲି ସେ ଏସ୍ପିଙ୍କୁ କହିଛନ୍ତି।