ନୟାଗଡ଼ ଅଫିସ,୨୪ା୧୨:ପରୀ ଅପହରଣ ଓ ହତ୍ୟା ଘଟଣାର ମୁଖ୍ୟ ଅଭିଯୁକ୍ତ କୁହାଯାଉଥିବା ନୟାଗଡ଼ ଜିଲା ସଦର ଥାନା ଅଧୀନ ଯଦୁପୁର ଗାଁର ଜଣେ କଲେଜ ଛାତ୍ରଙ୍କୁ ଏସ୍ଆଇଟି ଗିରଫ କରିବା ପରେ କୋର୍ଟ ଚାଲାଣ କରିଥିଲା। ଏବେ ଏସ୍ଆଇଟି ତାଙ୍କୁ ୩ ଦିନିଆ ରିମାଣ୍ଡରେ ନେଇଛି। ଏହାପରେ ବି ପରୀ ହତ୍ୟାକାଣ୍ଡକୁ ନେଇ ଚାଲିଥିବା ତାତି ଥମୁନି। ହେଲେ ଅଭିଯୁକ୍ତ କଲେଜ ଛାତ୍ରଙ୍କ ପରିବାର ନରମି ଯାଇଛନ୍ତି। ଯଦୁପୁର ରାଉତରାପୁର ପୋଖରୀରୁ ଲେଗିନ୍ସ ମିଳିବା ପରେ ବଦଳିଛି ସେମାନଙ୍କ ବୟାନ। ଏସ୍ଆଇଟିର ନିର୍ଯାତନା ନେଇ ବାରମ୍ବାର ଗଣମାଧ୍ୟମରେ ଅଭିଯୋଗ କରି ଆସୁଥିବା ସମ୍ପୃକ୍ତ ଛାତ୍ରଙ୍କ ମା’ ବୁଧବାର ମୁହଁ ଖୋଲି ନାହାନ୍ତି। ବରଂ ପୁଅକୁ ବଞ୍ଚାଇବାକୁ ସେ ଏସ୍ଆଇଟିକୁ ଅନୁରୋଧ କରିଛନ୍ତି। ଅଜ୍ଞାନ ପୁଅକୁ କ୍ଷମା କରିବାକୁ ସେ ଏସ୍ଆଇଟି ମୁଖ୍ୟ ଅରୁଣ ବୋଥ୍ରାଙ୍କୁ ବାରମ୍ବାର କହୁଥିବା ଶୁଣିବାକୁ ମିଳିଛି। ଏପରି କି ଏସ୍ଆଇଟି ବିରୋଧରେ ନୟାଗଡ଼ ସଦର ଥାନାରେ ସେ କରିଥିବା ଅଭିଯୋଗକୁ ଗୁରୁତ୍ୱ ନ ଦେବାକୁ ଅନୁରୋଧ କରିଛନ୍ତି।
ଗଣମାଧ୍ୟମ ପ୍ରଶ୍ନରେ ଗିରଫ ଛାତ୍ରଙ୍କ ମା’ କହିଛନ୍ତି, ମୁଁ କ’ଣ ଦେଖିଛି ଯେ ଆପଣମାନଙ୍କୁ କହିବି। ପୁଅ ଯଦି ପରୀକୁ ହତ୍ୟା କରିଥିବା ସ୍ବୀକାର କରୁଛି ସେ ଜାଣିଥିବ, ଉପରବାଲା ଦେଖିଥିବ। ଆମକୁ ସେ କିଛି କହି ନାହିଁ। ମୋ ପୁଅକୁ ଭଲ ସଂସ୍କାର ଦେଇଥିଲି, ହେଲେ ସେ ଏପରି ଭୁଲ କରିଥିବ ମୁଁ ବିଶ୍ୱାସ କରିପାରୁ ନାହିଁ। ଭୁଲ ଠିକ୍ର ଉତ୍ତର ପୁଅ ହିଁ ଦେଇ ପାରିବ। ପରୀ ପରିବାର ସହ ଆମର ଭଲ ସମ୍ପର୍କ ଥିଲା। ଘରେ ପରୀର ଲକେଟ୍ ନାହିଁ। ପୁଅ ମୋତେ ଦେଇନି। ପରୀ ନିଖୋଜ ଦିନ ଘରେ ମୋ ସାନ ଝିଅ, ବଡ଼ ଝିଅ, ଜ୍ୱାଇଁ, ଓ ମୁଁ ଥିଲୁ। ଘରୁ କିଛି ସମୟ ପାଇଁ ପରିବାର ସଦସ୍ୟମାନେ ଚାଲି ଯାଇଥିଲେ ହେଁ ପୁଣି ଫେରି ଆସିଥିଲେ। ତେବେ ସେହି ସ୍ବଳ୍ପ ସମୟ ମଧ୍ୟରେ ପୁଅ ପରୀକୁ ହତ୍ୟା କରିବା ବିଶ୍ୱାସ କରିହେଉ ନାହିଁ। ନିୟମ କରି କହୁଛି ମୁୁଁ କିଛି ଜାଣିନାହିଁ। ଜୁଲାଇ ୧୩ ରାତିରେ ପୁଅ ମୋବାଇଲ ଦେଖିବା ସଂକ୍ରାନ୍ତରେ ମୁଁ ଜାଣିନି। ସେଦିନ ପୁଅ ଝିଅ ଜ୍ୱାଇଁଙ୍କ ପାଖରେ ଶୋଇଥିଲା ବୋଲି ଗିରଫ ଛାତ୍ରଙ୍କ ମା’ କହିଛନ୍ତି।