ସଇଁତଳା, ୧୬ା୧୨(ଡ଼ି.ଏନ.ଏ.): ବଲାଙ୍ଗୀର ଜିଲା ସଇଁତଳା ବ୍ଲକ କୁମ୍ଭାରୀ ଗ୍ରାମରେ ମଙ୍ଗଳବାର ସକାଳେ ଘଟିଛି ଏକ ଅଭାବନୀୟ ଘଟଣା। ସ୍ବାମୀଙ୍କ ଅତ୍ୟାଚାର ସହି ନ ପାରି ଦୁଇବର୍ଷର ପୁଅକୁ ବିଷ ପିଆଇବା ପରେ ସ୍ତ୍ରୀ ରିକି ରଣା(୨୫) ନିଜେ ବିଷ ପିଇ ଦେଇଛନ୍ତି। ଉଭୟ ମା’ ଓ ଶିଶୁପୁତ୍ରକୁ ଗୁରୁତର ଅବସ୍ଥାରେ ସଇଁତଳା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଚିକିତ୍ସା ପରେ ରିକିଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଥିଲା। ହେଲେ ଶିଶୁପୁତ୍ର ଲକ୍ଷ୍ମୀକାନ୍ତ(୨)ର ଅବସ୍ଥା ସଙ୍କଟାପନ୍ନ ହେବାରୁ ତାକୁ ବୁର୍ଲା ସ୍ଥାନାନ୍ତର କରାଯାଇଥିଲା। ସଇଁତଳା ମେଡିକାଲ କର୍ତ୍ତୃପକ୍ଷଙ୍କ ରିପୋର୍ଟ ପରେ ପୋଲିସ ଏକ ମାମଲା ରୁଜୁ କରିଛି। ଏହି ଘଟଣା ପରେ ମହିଳାଙ୍କ ସ୍ବାମୀ ଭରତ ରଣା ଫେରାର ହୋଇଯାଇଛନ୍ତି।
କୁମ୍ଭାରୀ ଗଁା ଭାଗବତ ମନ୍ଦିର ପଡ଼ାର ଭରତ ରଣା ତିନିବର୍ଷ ତଳେ ସଇଁତଳାର ରିକିଙ୍କୁ ବିବାହ କରିଥିଲେ। ତାଙ୍କର ଦୁଇବର୍ଷର ପୁଅ ଲକ୍ଷ୍ମୀକାନ୍ତ। ଗତ କିଛିମାସ ହେଲା ଭରତ ଘରେ ପ୍ରାୟ ସମୟରେ ପାଟିତୁଣ୍ଡ କରିବା ସହ ରିକିଙ୍କୁ ମାରପିଟ କରୁଥିଲେ। ମଙ୍ଗଳବାର କୌଣସି କାରଣକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ଫଳରେ ଅତିଷ୍ଠ ହୋଇ ରିକି ଘରେ ଫସଲରେ ବ୍ୟବହାର ପାଇଁ ରଖାଯାଇଥିବା କୀଟନାଶକ ପୁଅକୁ ଦେବା ପରେ ନିଜେ ପିଇ ଦେଇଥିଲେ।