ମାଟିରୁ ଆକାଶ ଯାଏ ଯିଏ ପରିବ୍ୟାପ୍ତ ସେ ହେଉଛି ମା’। ମାର ପଣତ ତଳେ ଛୁଆ ଥାଏ ସବୁଠୁ ବେଶି ସୁରକ୍ଷିତ। ଆଉ ଯେତେବେଳେ ନିଜର ସନ୍ତାନ ପ୍ରତି ବିପଦ ଆସେ ନିଜ ଜୀବନକୁ ବାଜି ଲଗାଇ ଦିଏ ମା’ । ଏହାର ଏକ ଜ୍ୱଳନ୍ତ ଉଦାହରଣ ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଭିଡିଓରେ ଦେଖିବାକୁ ମିଳିଛି। ଏକ ମୂଷା ନିଜ ଜୀବନକୁ ବାଜି ଲଗାଇ ବର୍ଷା ପାଣିରେ ଭର୍ତ୍ତି ହୋଇଯାଇଥିବା ଗାତ ମଧ୍ୟରୁ ତାର ଛୁଆଙ୍କୁ ଉଦ୍ଧାର କରୁଥିବା ଦେଖାଯାଇଛି।
ଭିଡିଓରେ ଦେଖିବାକୁ ମିଳିଛି ଯେ, ଗୋଟିଏ ଘର ବାହାରେ ପ୍ରବଳ ବର୍ଷା ହେଉଛି। ଘରର ପାହାଚ ତଳେ ଥିବା ମୂଷା ଗାତରେ ପାଣି ପଶିଯାଇଛି। ଫଳରେ ଗାତରେ ଥିବା ଛୁଆ ମୂଷା ଫଶି ରହିଯାଇଛନ୍ତି। ନିଜ ଛୁଆଙ୍କୁ ଉଦ୍ଧାର କରିବା ପାଇଁ ମା ମୂଷା ଜୀବନକୁ ବାଜି ଲଗାଇ ଦେଇଛି। ମା ମୂଷାଟି ନିଜେ ପାଣି ଭର୍ତ୍ତି ଗାତରେ ପଶି ତାର ଛୁଆଙ୍କୁ ଉଦ୍ଧାର କରି ପାହାଚ ନିକଟରେ ଥିବା ଏକ ସୁରକ୍ଷିତ ସ୍ଥାନରେ ଆଣି ରଖୁଛି। ଏହି ଭିଡିଓକୁ ଆଇଏଫଏସ ଅଧିକାରୀ ବୈଭବ ସିଂ ନିଜ ଟୁଇଟରରେ ସେୟାର କରିଛନ୍ତି। ସେ କ୍ୟାପସନରେ ଲେଖିଛନ୍ତି, ମାର ସ୍ନେହ କାହା ସହ ତୁଳନୀୟ ନୁହଁ। ଏହି ଭିଡିଓକୁ ଅନେକ ଲୋକ ଦେଖିସାରିଥିବାବେଳେ ଅନେକ ଲାଇକ ଦେଇଛନ୍ତି।