ହିଞ୍ଜିଳିକାଟୁ, ୨୪।୩: ଗଞ୍ଜାମ ଜିଲା ହିଞ୍ଜିଳି ଥାନା ଅନ୍ତର୍ଗତ ପିତଳ ଛକରେ ମଙ୍ଗଳବାର ବିଳମ୍ବିତ ରାତିରେ ଘଟିଥିବା ସଂଘବଦ୍ଧ ଆକ୍ରମଣରେ ନରେନ୍ଦ୍ରପୁରର ମଙ୍ଗୁଳୁ ସ୍ବାଇଁଙ୍କ ୩ ପୁଅ ଓ ବଉଳଘାଇ ଗ୍ରାମର ସଡ଼ୁଙ୍କ ପୁଅର ଜୀବନ ଯାଇଛି। ପୁଅ ରାଜା, ଶମ୍ଭୁ, ପାଣ୍ଡବ ଓ ପୁତୁରା ଚନ୍ଦନଙ୍କୁ ହରାଇ ମଙ୍ଗୁଳୁ ଧର୍ଯ୍ୟହରା ହୋଇପଡ଼ିଛନ୍ତି। ଶାଳୀ ଓ ସଡ଼ୁଙ୍କ ମୃତ୍ୟୁ ପରେ ସେମାନଙ୍କ ଏକମାତ୍ର ପୁଅ ଚନ୍ଦନଙ୍କୁ ପ୍ରାୟ ୫ବର୍ଷ ବୟସରୁ ଆଣି ମଙ୍ଗୁଳୁ ପାଖରେ ରଖିଥିଲେ। ଏବେ ଦୁଇଟି ପରିବାର ଉଜୁଡିଯାଇଛି। ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି।
ମୃତ୍ୟୁଯନ୍ତା ଫାଷ୍ଟଫୁଡ୍ ସେଣ୍ଟର
ପିତଳ ଛକରେ ଫାଷ୍ଟଫୁଡ଼ ସେଣ୍ଟର କରିଥିଲେ ରାଜା ଓ ତାଙ୍କ ମାଉସୀ ପୁଅ ଚନ୍ଦନ। ରାଜାଙ୍କ ଭାଇ ଶମ୍ଭୁ ବିଏ ପାସ କରି ଚାକିରି ଅନ୍ବେଷଣରେ ରହିଥିଲେ। ତେଣୁ ସେ ଘରେ ନ ରହି ଅଧିକାଂଶ ସମୟ ଫାଷ୍ଟଫୁଡ୍ ଦୋକାନରେ ରହୁଥିଲେ। ସାନ ଭାଇ ପାଣ୍ଡବ ସୁରଟରୁ କାମ ଛାଡ଼ି କିଛି ମାସ ତଳେ ଗାଁକୁ ଆସିଥିଲେ। ଆଉ ବାହାରକୁ ନ ଯାଇ ଏକ ଡାଲା ଅଟୋ ଚଳାଇଥିଲେ। ରାତି ହେଲେ ଭାଇମାନେ ଫାଷ୍ଟ ଫୁଡ ସେଣ୍ଟରରେ ଏକାଠି ହୁଅନ୍ତି। ଦୋକାନ ବନ୍ଦ କରି ସମସ୍ତେ ଏକାଠି ଯାଆନ୍ତି। ହେଲେ ମଙ୍ଗଳବାର ରାତିରେ ସେହି ଫାଷ୍ଟଫୁଡ ସେଣ୍ଟର ୪ ଭାଇଙ୍କ ପାଇଁ ମୃତ୍ୟୁଯନ୍ତା ହୋଇ ରହିଥିଲା। ସମସ୍ତେ ସେଠାରେ ଏକାଠି ହେବା ପରେ ଯୋଜନାବଦ୍ଧ ଭାବେ ଆକ୍ରମଣ କରାଯିବାରୁ ସମସ୍ତଙ୍କ ମୃତ୍ୟୁ ଘଟିଥିଲା।
ଭାଇଙ୍କୁ ଛାଡ଼ି ଘରକୁ ଗଲେନି ଭାଇ
ମଙ୍ଗୁଳୁଙ୍କ ପଡ଼ୋଶୀ ଭଗବାନ ଜେନା ଆଳୁ ବ୍ୟବସାୟ କରନ୍ତି। ସେ କହିଛନ୍ତି ମଙ୍ଗୁଳୁଙ୍କ ପରିବାର ଅତି ଭଲ। ମଙ୍ଗୁଳୁଙ୍କ ସାନ ପୁଅ ପାଣ୍ଡବ ଡାଲା ଅଟୋରେ ତାଙ୍କ ଠାରୁ ଆଳୁ ନେଇ ବ୍ରହ୍ମପୁର ଯାଆନ୍ତି। ମଙ୍ଗଳବାର ରାତିରେ ଭଗବାନ ବେପାର ସାରି ବାଇକରେ ଗାଁକୁ ଫେରିବା ବେଳେ ଫାଷ୍ଟଫୁଡ଼ ଦୋକାନ ନିକଟରେ ଅଟକି ୪ ଭାଇଙ୍କ ମଧ୍ୟରୁ ଜଣେ କେହି ତାଙ୍କ ବାଇକରେ ଆସି ଯିବାକୁ ପାଣ୍ଡବଙ୍କୁ କହିଥିଲେ। ହେଲେ ପାଣ୍ଡବ ମନା କରିବା ସହ ୪ ଜଣ ଯାକ ମିଶିକି ଯିବୁ ବୋଲି କହିଥିଲେ। ହେଲେ ନିୟତି ବଡ଼ ନିଷ୍ଠୁର। ୪ ଭାଇ ଗାଁକୁ ଆସିବେ କଣ ଏକାଠି ଆର ପାରିକୁ ଚାଲିଗଲେ।