ବରଗଡ଼,୧୫ା୬(ପ୍ରେମାନନ୍ଦ ଖମାରୀ): ଗୋଟିଏ ପଟେ ତାତି ଥମୁନି, ଅନ୍ୟପଟେ ଅଘୋଷିତ ବିଦ୍ୟୁତ୍ କାଟ। ଏଭଳି ସ୍ଥିତିରେ ଜନଜୀବନ ଅସ୍ତବ୍ୟସ୍ତ ହୋଇପଡୁଛି। ଏହାକୁ ନେଇ ସାଧାରଣରେ ଅସନ୍ତୋଷ ମଧ୍ୟ ବଢ଼ି ଚାଲିଛି। ଏନେଇ ଗୁରୁବାର ବରଗଡ଼ ଗାନ୍ଧିଛକରେ ଭାଜପା ଧାରଣା ଦେଇ ପ୍ରତିବାଦ କରିଛି। ଟାଟା ପାଓ୍ବାର ବିଦ୍ୟୁତ୍ ବିତରଣ ଦାୟିତ୍ୱ ନେବା ପରେ ବିଦ୍ୟୁତ ବିଭ୍ରାଟ ଚରମସୀମାରେ ପହଞ୍ଚିଥିବା ବେଳେ ରାଜ୍ୟ ସରକାରଙ୍କ ନୀରବତା ବିଡ଼ମ୍ବନାର ବିଷୟ ବୋଲି ଭାଜପା କହିଛି। ସେହିପରି ଟାଟା ପାଓ୍ବାର ରାଜ୍ୟରେ ରହିଥିବା ବିଦ୍ୟୁତ୍ ବିଭାଗର ଭିତ୍ତିଭୂମି ମାଗଣାରେ ବ୍ୟବହାର କରି ରାଜ୍ୟବାସୀଙ୍କୁ ସେବା ଯୋଗାଇବାରେ ବିଫଳ ହେବା ଆହୁରି ଦୁର୍ଭାଗ୍ୟଜନକ। ତେଣୁ ଟାଟା ପାଓ୍ବାରର ଏଭଳି ମନମାନି ଏବଂ ଏଥିରେ ରାଜ୍ୟ ସରକାରଙ୍କ ନୀରବତାକୁ ଆଦୌ ବରଦାସ୍ତ କରାଯିବ ନାହିଁ। ଏହାର ତ୍ୱରିତ ସମାଧାନ କରା ନ ଗଲେ ଭାଜପା ଆନ୍ଦୋଳନକୁ ଆହୁରି ତୀବ୍ର କରିବ ବୋଲି ଚେତାବନୀ ଦେଇଛି। ବରଗଡ଼ ଜିଲା ଭାଜପା ସଭାପତି ଅଶ୍ବିନୀ ଷଡ଼ଙ୍ଗୀଙ୍କ ନେତୃତ୍ୱରେ ହୋଇଥିବା ଧାରଣାରେ ବରଗଡ଼ ଲୋକ ସଭା ଏମ୍ପି ସୁରେଶ ପୂଜାରୀ, ବରିଷ୍ଠ ନେତା ସୁରେଶ୍ବର ଶତପଥୀ, ଅଶୋକ ପଣ୍ଡା, ପ୍ରୀତମ ସିଂ, ରବି ନାରାୟଣ ଦାଶ, ଅବନୀକାନ୍ତ ପଣ୍ଡା, ସୁବ୍ରତ ହୋତାଙ୍କ ସମେତ ଅନେକ ଦଳୀୟ କାର୍ଯ୍ୟକର୍ତ୍ତା ଏବଂ କର୍ମୀ ସାମିଲ ଥିଲେ।