ପାଲଲହଡା,୧୯ା୩(ଡି.ଏନ.ଏ.)
ଅନୁଗୋଳ ଜିଲା ପାଲଲହଡ଼ା ବିଧାୟକ ମୁକେଶ କୁମାର ପାଲଙ୍କ ବିରୋଧରେ ଢେଙ୍କାନାଳ ଏମ୍ପି ମହେଶ ସାହୁ ଷଡ଼ଯନ୍ତ୍ର କରୁଥିବା ପାଲଲହଡ଼ା ବ୍ଲକ ବିଜେଡି ସଭାପତି ଗଙ୍ଗାଧର ଜିତ୍ ଗୁରୁବାର ଅଭିଯୋଗ କରିଛନ୍ତି। ଏମ୍ପିଙ୍କ ଏପରି କାର୍ଯ୍ୟକୁ ବ୍ଲକ ବିଜେଡି ପକ୍ଷରୁ ନିନ୍ଦା କରାଯିବା ସହ ନିର୍ବାଚନମଣ୍ଡଳୀବାସୀ ଆଗାମୀ ଦିନରେ ଏହାର ଜବାବ ଦେବେ ବୋଲି ସଭାପତି ଜିତ୍ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି।
ପାଲଲହଡ଼ାସ୍ଥିତ ଜାତୀୟ ରାଜପଥ ଡାକବଙ୍ଗଳାଠାରେ ଖବରଦାତା ସମ୍ମିଳନୀରେ ସଭାପତି ଜିତ୍ କହିଛନ୍ତି ଯେ, ବିଧାୟକ ପାଲଙ୍କ ନେତୃତ୍ୱରେ ସାଙ୍ଗଠନିକ ଏବଂ ବିକାଶମୂଳକ କାର୍ଯ୍ୟ ଜାରି ରହିଛି। କିନ୍ତୁ ଏମ୍ପି ସାହୁ ଜାଣିଶୁଣି ପୂର୍ବରୁ ଦଳ ବିରୋଧୀ କାର୍ଯ୍ୟ କରିଥିବା କେତେଜଣ ନେତା ଏବଂ କର୍ମୀଙ୍କ ସହ ହାତ ମିଳାଇ ପାଲଲହଡା ନିର୍ବାଚନମଣ୍ଡଳୀରେ ବିଶୃଙ୍ଖଳା ସୃଷ୍ଟି କରୁଛନ୍ତି। ବିଧାୟକଙ୍କ ବିରୋଧରେ ଅପପ୍ରଚାର ଆରମ୍ଭ କରିଛନ୍ତି। ଏହାକୁ ବ୍ଲକ ବିଜେଡି ଘୋର ନିନ୍ଦା କରୁଛି। ଦଳୀୟ କିମ୍ବା ଅନ୍ୟ କୌଣସି କାର୍ଯ୍ୟକ୍ରମରେ ଏମ୍ପିଙ୍କ ଦେଖା ମିଳୁ ନ ଥିବାବେଳେ ତାଙ୍କର ଏପରି ଦଳ ବିରୋଧୀ କାର୍ଯ୍ୟ ଓ ବିଧାୟକଙ୍କ ବିରୋଧରେ ଷଡ଼ଯନ୍ତ୍ରର ଜବାବ ଜନସାଧାରଣ ଦେବେ। ଏମ୍ପିଙ୍କ ନାମ ନ ନେଇ ଅଞ୍ଚଳର ଜଣେ ପେଟ୍ରୋଲ ପମ୍ପ ମାଲିକ ଦଳୀୟ ସଙ୍ଗଠନକୁ ଦୁଇ ଭାଗ କରିବା ପାଇଁ ଚେଷ୍ଟା କରୁଥିବାବେଳେ ଏମ୍ପି ସମ୍ପୃକ୍ତ ବ୍ୟକ୍ତିଙ୍କୁ ସମର୍ଥନ ଦେଇ ଚାଲିଛନ୍ତି। ଯଦି ଏପରି ଦଳ ବିରୋଧୀ କାର୍ଯ୍ୟରୁ ଏମ୍ପି ନିବୃତ ନ ରୁହନ୍ତି, ତା’ହେଲେ ବ୍ଲକ ବିଜେଡି ପକ୍ଷରୁ ରାଜ୍ୟ ସଭାପତିଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ଜିତ୍ ପ୍ରକାଶ କରିଛନ୍ତି। ଉକ୍ତ ଖବରଦାତା ସମ୍ମିଳନୀରେ ପାଲଲହଡା ବ୍ଲକ ଅଧ୍ୟକ୍ଷ ନବକିଶୋର ନାୟକ, ନିଜିଗଡ଼ ସମିତି ସଭ୍ୟ ଦିଲୀପ କୁମାର ଉଦାଳ, ବିଧାୟକଙ୍କ ପ୍ରତିନିଧି ନରେନ୍ଦ୍ର କୁମାର ଭୁକ୍ତା, ବରିଷ୍ଠ ନେତା ଲକ୍ଷ୍ମୀଧର ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ। ତେବେ ଏମ୍ପି ସାହୁଙ୍କ ମୋବାଇଲ ଫୋନ ବନ୍ଦ ଥିବାରୁ ଅଭିଯୋଗ ସମ୍ପର୍କରେ ତାଙ୍କ ମତାମତ ମିଳିପାରି ନାହିଁ।