କେନ୍ଦୁଝର,୨୮।୮(ଡି.ଏନ.ଏ.): କେନ୍ଦୁଝର ସହର ନିକଟସ୍ଥ ଜୁଡ଼ିଆ ଘାଟି ରାସ୍ତା ପାର୍ଶ୍ୱ ପାହାଡ଼ରୁ ପଥର ଓ ମାଟି ଅତଡ଼ା ଖସୁଥିବାରୁ ପଥଚାରୀ ଏବଂ ଗାଡ଼ିମଟର ପାଇଁ ବିପଦ ସୃଷ୍ଟି କରିଛି। ଗତ ଜୁଲାଇ ୩୦ ତାରିଖ ଅପରାହ୍ନରେ ଏକ ବଡ଼ ପଥର ଖସିବାରୁ ଗୋଟିଏ ଟ୍ରକ ଦୁର୍ଘଟଣାଗ୍ରସ୍ତ ହୋଇଥିଲା। ଗାଡ଼ିରେ ଥିବା ଡ୍ରାଇଭର ଅଳ୍ପକେ ବର୍ତ୍ତି ଯାଇଥିବାବେଳେ ହେଲପର ସାମାନ୍ୟ ଆହତ ହୋଇଥିଲେ। ମଝି ରାସ୍ତାରେ ପଥରଟି ପଡ଼ିି ରହିବାରୁ ଗୋଟିଏ ଲେନରେ ଗାଡ଼ି ଚଳାଚଳ ବନ୍ଦ ରହିଥିଲା। ପାହାଡ଼ ଧସିବା ଫଳରେ ଲୋକେ ଭୟଭୀତ ହୋଇ ପଡ଼ିଥିଲେ। ପାହାଡ଼ରେ ବାଲିଆ ମାଟି ରହିଥିବାରୁ ବର୍ଷା ହେଲେ ଅତଡ଼ା ଓ ବଡ଼ ବଡ଼ ପଥର ଖସି ପଡ଼ୁଛି। ବର୍ଷା ସମୟରେ ଉକ୍ତ ରାସ୍ତା ଦେଇ ଯାତାୟାତ କରିବାକୁ ଲୋକେ ଭୟ କରୁଛନ୍ତି। ୪୯ନଂ. ଜାତୀୟ ରାଜପଥରେ ଥିବା ଜୁଡିଆ ଘାଟି କଟା ଏବଂ ରାସ୍ତା ନିର୍ମାଣ କାମ ସରିଗଲାଣି। ରାସ୍ତା ସମ୍ପ୍ରସାରଣ କାମ ଠିକା ନେଇଥିବା କମ୍ପାନୀ ଘାଟି କାମ ଶେଷ କରିଲେଣି। ଗାର୍ଡୱାଲ ନିର୍ମାଣ ଏବଂ ପଥର ଜାଲି ଦିଆଯିବା ସତ୍ତ୍ୱେ ଅନେକ ସ୍ଥାନରେ ମାଟି ଅତଡ଼ା ଏବଂ ପଥର ଖସୁଛି। ସୂଚନାଯୋଗ୍ୟ ଯେ, ଗତ କିଛି ଦିନ ହେବ ଲଗାଣ ବର୍ଷା ସମୟରେ ଭୁସ୍ଖଳନ ହେଉଛି। ଜୁଡ଼ିଆ ପାହାଡ଼ ତୀଖ ଥିବାରୁ ରାସ୍ତା ସମ୍ପ୍ରସାରଣ ପରେ ବାରମ୍ବାର ଏପରି ଘଟୁଥିବା ଜଣାପଡ଼ିଛି। ଏହାର ସ୍ଥାୟୀ ପ୍ରତିକାର ପାଇଁ ଏନ୍ଏଚ୍ଏଆଇ କର୍ତ୍ତୃପକ୍ଷ ପଦକ୍ଷେପ ନେବାକୁ ଦାବି ହେଉଛି।