ଭୁବନେଶ୍ୱର,୩୧।୧୨(ବ୍ୟୁରୋ): ପୂର୍ବତଟ ରେଳପଥ ପକ୍ଷରୁ ରେଳ ଐତିହ୍ୟ ସଂଗ୍ରହାଳୟ ପାଇଁ ବୁଧବାର ଭିତ୍ତିପ୍ରସ୍ତର ସ୍ଥାପିତ ହୋଇଛି। ରେଳପଥ ମହାପ୍ରବନ୍ଧକ ବିଦ୍ୟା ଭୂଷଣ, ଅତିରିକ୍ତ ମହାପ୍ରବନ୍ଧକ ସୁଧୀର କୁମାର ଓ ଅନ୍ୟ ପ୍ରମୁଖ ବିଭାଗୀୟ ଅଧିକାରୀଙ୍କ ଉପସ୍ଥିତିରେ ରେଲ୍ଓ୍ବେ ଷ୍ଟାଡିୟମ୍ଠାରେ ଏହି ଐତିହ୍ୟ ସଂଗ୍ରହାଳୟ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଛି। ପୁରୁଣା ରେଳ ଉପକରଣର ସଂରକ୍ଷଣ ସହ ରେଳପଥର ସମୃଦ୍ଧ ଇତିହାସ ପ୍ରଦର୍ଶନ କରିବା, ରେଳପଥ ଓ ଏହାର ସଫଳତା ବିଷୟରେ ଜନସାଧାରଣଙ୍କୁ ଅବଗତ କରାଇବା ଏବଂ ପର୍ଯ୍ୟଟନକୁ ବୃଦ୍ଧି କରିବା ଏହି ରେଳ ସଂଗ୍ରହାଳୟ ପ୍ରତିଷ୍ଠାର ମୁଖ୍ୟ ଉଦ୍ଦେଶ୍ୟ। ପୂର୍ବତଟ ରେଳପଥର ଦୀର୍ଘ ତଥା ସମୃଦ୍ଧ ଐତିହ୍ୟ ଓ ଜୀବନ୍ତ ଇତିହାସକୁ ସଂରକ୍ଷଣ କରିବା ପାଇଁ ପ୍ରୟାସ କରାଯିବ ବୋଲି ବିଦ୍ୟାଭୂଷଣ କହିଥିଲେ। ପୁରାତନ ଯନ୍ତ୍ରପାତି, ପ୍ରଯୁକ୍ତିବିଦ୍ୟାଭିତ୍ତିକ ଉପକରଣ ଓ ମଡେଲଗୁଡିକର କଳାକୃତି, ମଡେଲ ଏବଂ ଫଟୋଚିତ୍ରକୁ ଏହି ହେରିଟେଜ୍ ସଂଗ୍ରହାଳୟରେ ସଂରକ୍ଷିତ କରାଯିବ।
