ଦଶମନ୍ତପୁର,୨୦।୧ ( ଡ଼ି.ଏନ୍.ଏ. ) କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ଡୁମ୍ବାଗୁଡା ପଞ୍ଚାୟତ ଭିତରବାଗ୍ରି ଗ୍ରାମର ପୂର୍ବତନ ସରପଞ୍ଚଙ୍କ ନାମ ଭୋଟର ତାଲିକାରେ ନାହିଁ। ଫଳରେ ସେ ଭୋଟ ଦେବାକୁ ଆସି ନିରାଶ ହୋଇ ଫେରିଛନ୍ତି। ସେ ହେଲେ ଲଖେଶ୍ବରୀ ମୁଦୁଲି। ସେ ବୁଧବାର ସମିତି ସଭ୍ୟ ଭାବେ ପ୍ରାର୍ଥୀପତ୍ର ଦାଖଲ କରିବାକୁ ବ୍ଲକ କାର୍ଯ୍ୟାଳୟକୁ ଆସି ନିରାଶ ହୋଇ ଫେରିଛନ୍ତି। ୨୦୨୨ ଭୋଟର ତାଲିକାରେ ତାଙ୍କ ନାମ ନଥିବାରୁ ସେ ପ୍ରାର୍ଥୀପତ୍ର ଦାଖଲ କରିପାରି ନାହାନ୍ତି। ପଞ୍ଚାୟତ କର୍ମଚାରୀମାନେ ମୋ ନାମକୁ ହଟାଇ ଦେଇଛନ୍ତି ବୋଲି ଲକ୍ଷେଶ୍ୱରୀ ଅଭିଯୋଗ କରିଛନ୍ତି। ନ୍ୟାୟ ପାଇଁ ଜିଲାପାଳଙ୍କ ଦ୍ୱାରସ୍ଥ ହେବି ବୋଲି ଲକ୍ଷେଶ୍ୱରୀ କହିଛନ୍ତି। ଏସମ୍ପର୍କରେ ବିଡ଼ିଓ ଡମ୍ବରୁଧର ମଲିକ ଜାଣିବା ପରେ ସେ କହିଥିଲେ ଯେ ଭୋଟର୍ ତାଲିକାରେ ନାମ ନ ଥିଲେ ମୁଁ କିଛି କରିପାରିବି ନାହିଁ। ପୂର୍ବତନ ସରପଞ୍ଚ ମୁଦୁଲି କହିଛନ୍ତି ଯେ, ତାଙ୍କ ଘର ନାରାୟଣ ପାଟଣା ବ୍ଲକ ଅଞ୍ଚଳରେ। ୨୦୧୨ରେ ଡୁମ୍ବାଗୁଡା ପଞ୍ଚାୟତରେ ଭୋଟର୍ ତାଲିକାରେ ନାମ ଚଢାଇ ସରପଞ୍ଚ ଭାବେ ପ୍ରତିଦ୍ବନ୍ଦ୍ବିତା କରି ବିଜୟୀ ହୋଇଥିଲେ। ୨୦୧୭ ପର୍ଯ୍ୟନ୍ତ ସରପଞ୍ଚ ଭାବେ କାମ କରିଥିଲେ।