ଦିଗପହଣ୍ଡି,୧୮।୧୨(ଡି.ଏନ.ଏ.) – ଦିଗପହଣ୍ଡି ବ୍ଲକ ବଡ଼ଡିମ୍ବୁଳା ପଞ୍ଚାୟତରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି। ମଷ୍ଟରରୋଲରେ ଅବସରପ୍ରାପ୍ତ ଶିକ୍ଷକଙ୍କ ସମେତ ପୋଷ୍ଟମାଷ୍ଟର ଓ ସେମାନଙ୍କ ସ୍ତ୍ରୀଙ୍କ ନାଁ ଲେଖାଯାଇ ମଜୁରୀ ପ୍ରଦାନ କରାଯାଇଛି। ଏହାର ଭିଜିଲାନ୍ସ ତଦନ୍ତ ପାଇଁ ଗ୍ରାମବାସୀଙ୍କ ପକ୍ଷରୁ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଛି।
ବଡ଼ଡୁମ୍ବୁଳା ଗ୍ରାମର ଜଣେ ପୋଷ୍ଟମାଷ୍ଟରଙ୍କ ନାଁରେ ଥିବା ଜବକାର୍ଡ (ନଂ.୨୯୦୨୪୮୨୧୧୯) ଦ୍ୱାରା ଏମ୍ଜିଏନ୍ଆର୍ଇଜିଏସ୍ରେ ପୋଖରୀ ନିର୍ମାଣ ଆଳରେ ଦିଗପହଣ୍ଡିସ୍ଥିତ ଭାରତୀୟ ଷ୍ଟେଟ ବ୍ୟାଙ୍କ ଓ ଉତ୍କଳ ଗ୍ରାମୀଣ ବ୍ୟାଙ୍କ ଖାତାରୁ ବହୁ ଟଙ୍କା ଉଠାଣ କରାଯାଇଛି। ସେହିପରି ବଡ଼ ଡିମ୍ବୁଳା ପଞ୍ଚାୟତ ଅଧୀନ ଏକ ଗାଁର ଜଣେ ଅବସରପ୍ରାପ୍ତ ଶିକ୍ଷକ ଏବଂ ତାଙ୍କ ସ୍ତ୍ରୀ ମିଳିତ ଭାବରେ ଏମ୍ଜିଏନ୍ଆରଇଜିଏସରେ ୪୦ ହଜାରରୁ ଅଧିକ ଟଙ୍କା ସରକାରୀ ତହବିଲରୁ ଉଠାଣ କରିଛନ୍ତି। ଯାହାଙ୍କ ଜବକାର୍ଡ ପଞ୍ଜିକୃତ ସଂଖ୍ୟା ଓଆର୍ -୧୨- ୦୦୯-୦୦୪-୦୦୪-୭୫୯୫। ତେବେ କିପରି ଏମାନଙ୍କ ନକଲି ହାଜିରା ଦର୍ଶାଇ ସରକାରୀ ତହବିଲରୁ ନିୟମିତ ବ୍ୟବଧାନରେ ମଜୁରୀ ବାବଦରେ ଅର୍ଥରାଶି ଉଠାଣ କରାଗଲା ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଅନ୍ୟପକ୍ଷରେ ଗ୍ରାମର କେତେଜଣ କହିଛନ୍ତି, ଏମ୍ଜିଏନ୍ଆରଇଜିଏସ କାମରେ ଟ୍ରାକ୍ଟର, ଜେସିବି ବ୍ୟବହାର ହେଉଛି। ଶ୍ରମିକ ଆବଶ୍ୟକ ହେଲେ ଅନ୍ୟ ଗାଁରୁ ଆଦିବାସୀଙ୍କୁ ଆଣି ଅଳ୍ପ ଟଙ୍କା ଦେଇ କାମ କରାଯାଉଛି। ଏପଟେ ଗାଁର ବେକାର ଶ୍ରମିକମାନେ କାମ ନ ପାଇ ଦାଦନ ଖଟିବାକୁ ବାହାର ରାଜ୍ୟକୁ ଯିବାକୁ ବାଧ୍ୟ ହେଉଛନ୍ତି। ଏ ସମ୍ପର୍କରେ ବିଡ଼ିଓ ହଳଧର ଶବରଙ୍କ ସହ ଯୋଗାଯୋଗ କରିବାରେ ସେ କହିଛନ୍ତି ଗ୍ରାମବାସୀଙ୍କ ଅଭିଯୋଗର କୌଣସି ସତ୍ୟତା ନାହିଁ। ସ୍ବଳ୍ପ ବେତନ ଭୋଗୀ କର୍ମଚାରୀମାନେ ବ୍ୟକ୍ତିଗତ ପ୍ରକଳ୍ପ ନିର୍ମାଣ କରିପାରିବେ। ଯଦି କୌଣସି ଅନିୟମିତତା କରାଯାଇଥିବା ପ୍ରମାଣ ମିଳେ ତାହା ହେଲେ ଅର୍ଥରାଶି ଫେରସ୍ତ ପାଇଁ ପଦକ୍ଷେପ ନିଆଯିବ ବୋଲି ବିଡିଓ କହିଛନ୍ତି।