ନୂଆଦିଲ୍ଲୀ, ୩୦ା୯ (ପି.ଟି.)-ଜାତୀୟ ମହିଳା ରେସ୍ଲିଂ କ୍ୟାମ୍ପ ଅକ୍ଟୋବର ୧୦ରୁ ଲକ୍ଷ୍ନୌସ୍ଥିତ ସାଇ ସେଣ୍ଟରରେ ଆରମ୍ଭ ହେବ। ଏଥିରେ ଯେଉଁମାନ ଅଂଶଗ୍ରହଣ ନ କରିବେ ଜାତୀୟ ଦଳ ପାଇଁ ମନୋନୟନ ବେଳେ ସେମାନଙ୍କ ନାମ ବିଚାରକୁ ନିଆଯିବ ନାହିଁ ବୋଲି ରେସ୍ଲିଂ ଫେଡେରେଶନ ଅଫ୍ ଇଣ୍ଡିଆ (ଡବ୍ଲ୍ୟୁଏଫ୍ଆଇ) ତରଫରୁ ମଙ୍ଗଳବାର ଚେତାବନୀ ଦିଆଯାଇଛି। ଜାତୀୟ କ୍ୟାମ୍ପ ପ୍ରକୃତରେ ସେପ୍ଟେମ୍ବର ୧ରୁ ଆରମ୍ଭ ହୋଇଥାନ୍ତା। କିନ୍ତୁ କରୋନା ଯୋଗୁ ଏହାକୁ ସ୍ଥଗିତ ରଖାଯାଇଥିଲା। ଅଲିମ୍ପିକ ପାଇଁ ଯୋଗ୍ୟତା ଅର୍ଜନ କରିଥିବା ୪ ରେସ୍ଲରଙ୍କ ମଧ୍ୟରୁ ଦୁଇଜଣ ଭିନେଶ ଫୋଗତ୍ ଏବଂ ଦୀପକ ପୁନିଆ କରୋନା ପଜିଟିଭ ହେବା ଦ୍ୱାରା ବହୁ ରେସ୍ଲରଙ୍କ ମନରେ ଭୟ ସଞ୍ଚାର ହୋଇଥିଲା। ପରିସ୍ଥିତିର ଅନୁଧ୍ୟାନ ପରେ ଏବଂ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ)ର ପରାମର୍ଶ କ୍ରମେ ଡବ୍ଲ୍ୟୁଏଫ୍ଆଇ ଶେଷରେ ୬ଟି ଅଲିମ୍ପିକ କାଟେଗୋରି ଯଥା ୫୦କେଜି, ୫୩ କେଜି, ୫୭ କେଜି, ୬୨, କେଜି, ୬୮ କେଜି ଓ ୭୬ କେଜିରେ କ୍ୟାମ୍ପ ଆରମ୍ଭ କରିବା ଲାଗି ନିଷ୍ପତ୍ତି ନେଇଥିଲା। ଏହା ଡିସେମ୍ବର ୩୧ ପର୍ଯ୍ୟନ୍ତ ଚାଲିବ। ସୂଚନାଯୋଗ୍ୟ, ‘ଖେଲୋ ଇଣ୍ଡିଆ ଫିର୍ ସେ’ କାର୍ଯ୍ୟକ୍ରମର ଅଂଶବିଶେଷ ସ୍ବରୂପ ଅକ୍ଟୋବର ୫ରୁ ସାଇ ପକ୍ଷରୁ ଯେଉଁ ୯ଟି ଖେଳର କାର୍ଯ୍ୟକଳାପ ଆରମ୍ଭ କରିବା ଲାଗି ନିଷ୍ପତ୍ତି ନେଇଥିଲା ତନ୍ମଧ୍ୟରେ ରେସ୍ଲିଂ ଅନ୍ୟତମ ଥିଲା। ରେସ୍ଲରମାନଙ୍କୁ ୧୪ ଦିନ କ୍ୱାରାଣ୍ଟାଇନ୍ରେ ରହିବାକୁ ପଡ଼ିବ। ନେଗେଟିଭ ଆସିଲେ ଯାଇ ସେମାନଙ୍କୁ ଟ୍ରେନିଂ ପାଇଁ ଅନୁମତି ମିଳିବ ବୋଲି ଡବ୍ଲ୍ୟୁଏଫ୍ଆଇ ସହକାରୀ ସମ୍ପାଦକ ବିନୋଦ ତୋମର ପ୍ରକାଶ କରିଛନ୍ତି।2