ଶିବପୁରୀ, ୨୭।୮: ମଧ୍ୟପ୍ରଦେଶର ଶିବପୁରୀ ଅଞ୍ଚଳରୁ ଏକ ସମ୍ବେଦନଶୀଳ ଘଟଣା ଗୁରୁବାର ସାମ୍ନାକୁ ଆସିଛି। ଶିବପୁରୀ ପୋହରୀ ଅଞ୍ଚଳର ଏକ ପୋଲ ନିକଟରୁ ଏକ ଯୁବକଙ୍କ ମୃତଦେହ ପୋଲିସ ଉଦ୍ଧାର କରିଛି। ମୃତ ଯୁବକଜଣଙ୍କ ମଧ୍ୟପ୍ରଦେଶ ଲୋକ ନିର୍ମାଣ ବିଭାଗ ମନ୍ତ୍ରୀ ସୁରେଶ ଧାକଡ଼ଙ୍କ ଭଣଜା ବୋଲି ଜଣାପଡ଼ିଛି। ସୁରେଶଙ୍କ ଭଣଜା ଅନିଲ ଅଗଷ୍ଟ ୨୪ରେ ଚୁଟି କାଟିବା ଓ ଗାଡ଼ିରେ ତେଲ ପକାଇବାକୁ ଯାଉଚି କହି ଘରୁ ବାହାରି ଯାଇଥିଲେ। ଏହାପରେ ସେ ଆଉ ଘରକୁ ଫେରି ନ ଥିଲେ। ପରିବାର ଲୋକ ବହୁଖୋଜାଖୋଜି ପରେ ଶେଷରେ ଛର୍ଚ୍ଚ ପୋଲିସ ଷ୍ଟେସନରେ ଏକ ନିଖୋଜ ମାମଲା ରୁଜୁ କରିଥିଲେ। କିନ୍ତୁ ଗୁରୁବାର ଛର୍ଚ୍ଚଠାରୁ ୪୦ କିମି ଦୂର ଜଙ୍ଗଲ ପାଖ ପୋଲରେ ଜଣେ ଯୁବକଙ୍କ ଶବ ପଡ଼ିଥିବା ପୋଲିସକୁ ଗ୍ରାମବାସୀ ସୂଚନା ଦେଇଥିଲେ। ପୋଲିସ ଘଟଣସ୍ଥଳରେ ପହଞ୍ଚି ମୃତ ବ୍ୟକ୍ତିଜଣଙ୍କ ଅନିଲ ବୋଲି ଜାଣିବାକୁ ପାଇଥିଲା। ପାଖାପାଖି ୨ ଦିନ ହେବ ଶବ ଏଠାରେ ପଡ଼ିଥିବା ପୋଲିସ ପକ୍ଷରୁ କୁହାଯାଇଛି। ପୁଙ୍ଖାନୁପୁଙ୍ଖ ତଦନ୍ତ ପରେ ଏହା ହତ୍ୟା କି ଆତ୍ମହତ୍ୟା ତାହା ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ କୁହାଯାଇଛି।