ଖୋର୍ଦ୍ଧା ଅଫିସ,୧୯ା୧୦: ଖୋର୍ଦ୍ଧା ନୂଆ ବସ୍ଷ୍ଟାଣ୍ଡଠାରୁ ଚଣ୍ଡିଚୁଆ ପର୍ଯ୍ୟନ୍ତ ରାସ୍ତା ମରଣଯନ୍ତା ପାଲଟିଛି। ୩ବର୍ଷରେ ୩ଜଣ ଠିକାଦାର ପରିବର୍ତ୍ତନ ହୋଇଥିଲେ ମଧ୍ୟ ରାସ୍ତା କାର୍ଯ୍ୟ ସରୁନାହିଁ। ରାସ୍ତାରେ ବଡ଼ ବଡ଼ ଖାଲ ସୃଷ୍ଟି ହେବା ସହ ଦୁର୍ଘଟଣା ଘଟିୁଛି। ଜିଲାପାଳଙ୍କ କାର୍ଯ୍ୟାଳୟଠାରୁ ୫ଶହ ମିଟର ଦୂରରେ ଏହି ରାସ୍ତା ରହିଛି। ଦୈନିକ ଜିଲାସ୍ତରୀୟ ଅଧିକାରୀମାନେ ଯାତାୟାତ କରୁଥିଲେ ମଧ୍ୟ ରାସ୍ତାର ମରାମତି ଲାଗି ଗୁରୁତ୍ୱ ଦିଆଯାଉନାହିଁ ବୋଲି ସାଧାରଣରେ ଅଭିଯୋଗ ହୋଇଛି। ଜିଲା ପ୍ରଶାସନର ଆନ୍ତରିକତା ଅଭାବ ଏବଂ ବିଭାଗୀୟ କର୍ତ୍ତୃପକ୍ଷଙ୍କ ଦାୟିତ୍ୱହୀନତାରୁ ଏହି ରାସ୍ତା ବିପର୍ଯ୍ୟସ୍ତ ହୋଇପଡିଛି। ଅନ୍ୟପଟେ ପିସି କାରବାରରେ ଭାଗ ଛିଣ୍ଡୁ ନ ଥିବା ଯୋଗୁ ରାସ୍ତା କାର୍ଯ୍ୟରେ ବିଳମ୍ବ ଘଟୁଛି ବୋଲି ସାଧାରଣରେ ଚର୍ଚ୍ଚା ହେଉଛି।
ସୂଚନା ଅନୁଯାୟୀ, ନୂଆବସ୍ଷ୍ଟାଣ୍ଡଠାରୁ ଟିଏଲ୍ସି ଛକ ପର୍ଯ୍ୟନ୍ତ ଏହି ରାସ୍ତାର ଉଭୟ ପାର୍ଶ୍ୱରେ ବଡ଼ ବଡ଼ ଖାଲ ସୃଷ୍ଟି ହୋଇଛି। ଅଘଟଣ ଆଶଙ୍କାରେ ବାମପଟେ ଯାତାୟାତ ବନ୍ଦ ରହିଛି। ଫଳରେ ଅନେକ ସମୟରେ ଟ୍ରାଫିକ ସମସ୍ୟା ସହ ଦୁର୍ଘଟଣା ଘଟୁଛି। ଏହି ରାସ୍ତା ଦେଇ ନୟାଗଡ଼ ଏବଂ ବଲାଙ୍ଗୀରକୁ ଦୈନିକ ଶତାଧିକ ଘରୋଇ ବସ୍, ମାଲବାହୀ ଟ୍ରକ୍ ଯାତାୟାତ କରୁଛି। ହେଲେ ରାସ୍ତାର ମରାମତି ପାଇଁ ଗୁରୁତ୍ୱ ଦିଆଯାଉନାହିଁ ବୋଲି ସାମାଜିକକର୍ମୀ ଶୋଭନ ଘୋଷ କହିଛନ୍ତି। ବର୍ଷା ହେବା ଫଳରେ ଖାଲଖମାରେ ପାଣି ଜମି ରହୁଛି। ଫଳରେ ବାହାରୁ ଆସୁଥିବା ବସ, ବାଇକ୍ ଏହି ଖାଲରେ ପଡି ଦୁର୍ଘଟଣାର ଶିକାର ହେଉଛନ୍ତି। ଏହି ରାସ୍ତାରେ ରୋଗୀଙ୍କୁ ମେଡିକାଲ ନେଇ ଯାଉଥିବା ଆମ୍ବୁଲାନ୍ସଗୁଡ଼ିକ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ଆର୍ଆଣ୍ଡବି ନିର୍ବାହୀ ଯନ୍ତ୍ରୀ ଦୀପକ ପାଣିଗ୍ରାହୀ କହିଛନ୍ତି, ଲଘୁଚାପ ବର୍ଷା ଯୋଗୁ ରାସ୍ତା ମରାମତି ହୋଇପାରୁନାହିଁ। ବର୍ଷା ଛାଡିବା ପରେ ମରାମତି କରାଯିବ। ଚଣ୍ଡିଚୁଆ ଛକଠାରୁ ମେଡିକାଲ ପର୍ଯ୍ୟନ୍ତ ରାସ୍ତା ସମ୍ପୂର୍ଣ୍ଣ ମରାମତି ହୋଇ ପିଚୁ କରାଯାଇଛି। ଅନ୍ୟପଟେ ଏହି ରାସ୍ତାର ୩ଟି ସ୍ଥାନରେ ପାଇପ୍ଲାଇନ ଯାଇଥିବାରୁ ମରାମତିରେ ଅସୁବିଧା ହେଉଛି। ପାଇପ୍ କାମ ସାରିବା ପରେ ରାସ୍ତା ମରାମତି କାମ ତ୍ୱରିତ କରାଯିବ ବୋଲି ସେ କହିଛନ୍ତି।