ଢେଙ୍କାନାଳ ଅଫିସ, ୨୮।୪ – ନୂଆରୂପ ନେବ ଢେଙ୍କାନାଳ ପୌରାଞ୍ଚଳର ପୁରାତନ ନୂଆପୋଖରୀ (ଭାଗୀରଥି ସାଗର)। ଏହାର ଉନ୍ନତୀକରଣ ଲାଗି ପୌରସଂସ୍ଥା ପକ୍ଷରୁ ସରକାରଙ୍କୁ ୪ କୋଟି ୭୨ଲକ୍ଷ ଟଙ୍କାର ପ୍ରସ୍ତାବ ଦିଆଯାଇଛି। ପ୍ରସ୍ତାବ ଅନୁମୋଦିତ ହେଲେ କାର୍ଯ୍ୟ ଆରମ୍ଭ ହେବ। ଏଥିଲାଗି ପୌରସଂସ୍ଥା ପକ୍ଷରୁ ଉଦ୍ୟମ ଆରମ୍ଭ ହୋଇଛି।
ସରକାରଙ୍କୁ ଦିଆଯାଇଥିବା ପ୍ରସ୍ତାବ ଅନୁଯାୟୀ, ପୋଖରୀର ଦଳ ସଫା କରାଯିବା ସହ ଅଧିକ ଗଭୀର କରାଯିବ। ଏହା ମଝିରେ ଥିବା ମନ୍ଦିରର ଉନ୍ନତୀକରଣ କରାଯିବ। ପୋଖରୀ କୂଳରୁ ମନ୍ଦିର ଯାଏ ଏକ ପାଥୱେ ନିର୍ମାଣ ହେବ। ଏହାର ଚାରିପଟେ ପ୍ରାତଃ ଓ ସନ୍ଧ୍ୟାରେ ଭ୍ରମଣ ଲାଗି ଚଲାପଥ କରାଯିବ। ଜଳାଶୟ ନିକଟରେ ଅତ୍ୟାଧୁନିକ ପାର୍କ ନିର୍ମାଣ ହେବ। ପୋଖରୀ ଚତୁଃପାର୍ଶ୍ୱରୁ ଆଲୋକୀକରଣ ସହ ବୋଟିଂ ବ୍ୟବସ୍ଥା ରହିବ। ସୂଚନାଯୋଗ୍ୟ, ଶୀତଦିନେ ବିଦେଶୀ ପକ୍ଷୀଙ୍କ କଳରବରେ ମୁଖରିତ ହୋଇଉଠେ ନୂଆପୋଖରୀ। ହେଲେ ରକ୍ଷଣାବେକ୍ଷଣ ଅଭାବରୁ ଏହି ପ୍ରାଚୀନ ଜଳାଶୟ ଦଳରେ ଭର୍ତ୍ତି ହୋଇଛି। ତେଣୁ ବୋଟିଂ ବ୍ୟବସ୍ଥା କରିବା ସମ୍ଭବପର ହେଉନାହିଁ ।
ଏ ସଂକ୍ରାନ୍ତରେ ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ କୁହନ୍ତି, ସବୁ ଜିଲା ସଦର ମହକୁମାରେ ଭଲ ପାର୍କ କରିବା ଲାଗି ସରକାର ପ୍ରସ୍ତାବ ମାଗିଥିଲେ। ତଦନୁଯାୟୀ ନୂଆ ପୋଖରୀର ନାମ ସୁପାରିସ କରାଯାଇଛି। ସରକାରଙ୍କୁ ୪କୋଟି ୭୨ଲକ୍ଷର ପ୍ରସ୍ତାବ ଦିଆଯାଇଛି। ପ୍ରସ୍ତାବ ଅନୁମୋଦନ ହେବା ପରେ ତୁରନ୍ତ କାର୍ଯ୍ୟ ଆରମ୍ଭ ହେବ।