ନିରାକାରପୁର,୧୬।୫: ପୁରୀ-ବଲାଙ୍ଗୀର ନୂଆ ଜଗନ୍ନାଥ ସଡକ ଏବେ ମରଣଯନ୍ତା ପାଲଟିଛି। ଲୋକ ଏବେ ଏହି ବାଟ ଦେଇ ଯିବା ପାଇଁ ବି ଡରିଲେଣି। ଦୈନିକ ହଜାର ହଜାର ପର୍ଯ୍ୟଟକ ଦକ୍ଷିଣ ତଥା ପଶ୍ଚିମ ଭାରତରୁ ଆସି ରାମେଶ୍ୱର ଛକରୁ ନୂଆ ଜଗନ୍ନାଥ ସଡକ ଦେଇ ପୁରୀ ଏବଂ କୋଣାର୍କ ଯାଉଛନ୍ତି । ଶହ ଶହ ଭାରିଯାନ ମଧ୍ୟ ଏହି ବାଟ ଦେଇ ଦୈନିକ ଯିବା ଆସିବା କରିଥାନ୍ତି । କିନ୍ତୁ ଏହି ରାସ୍ତାର ଶ୍ରୀ ମୁକୁନ୍ଦପୁର ଠାରୁ ପ୍ରତାପରାମଚନ୍ଦ୍ରପୁର (ପାଟେଳି) ପର୍ଯ୍ୟନ୍ତ କଂକ୍ରିଟ ରାସ୍ତାରେ ବିରାଟ ବିରାଟ ଫାଟ ସବୁ ହୋଇ ଗଲାଣି । ଦୁଇ କଂକ୍ରିଟ ମଧ୍ୟରେ ଥିବା ଜଏଣ୍ଟ ସବୁ ଛାଡି ଗଲାଣି । କଂକ୍ରିଟ ରାସ୍ତା ମଧ୍ୟ ତଳ ଉପର ହୋଇ ଗଲାଣି । ଏଣୁ ଏହି ରାସ୍ତା ଦେଇ ଗାଡିଗୁଡିକ ବେଗରେ ଯିବାବେଳେ ଏହି ଫାଟ ଭିତରେ ଚକ ପଡି ଦୁର୍ଘଟଣାର ଶିକାର ହେଉଛିି । ବିଶେଷକରି ଦୁଇ ଚକିଆ ଯାନଗୁଡିକ ଏହି ଫାଙ୍କରେ ପଡି ଦୁର୍ଘଟଣାର ଶିକାର ହେଉଛନ୍ତି । କିଛି ସପ୍ତାହ ପୂର୍ବେ ଏହି ଫାଟ ଯୋଗୁ ଦୁର୍ଘଟଣା ଘଟି ୩ ଜଣ ଗୁରୁତର ହେଇଥିଲେ । ତେବେ ଏହି ଫାଟରେ ପିଚୁର କୋଟିଂଗ ଦେଲେ କିଛି ଲାଭ ହେଉ
ନାହିଁ । ତାହା ପୁଣି ଛାଡି ଯାଉଛି । ଏଣୁ ଏହି ଗୁରୁତ୍ୱପୂର୍ଣ ରାସ୍ତାର ଉନ୍ନତି
ପାଇଁ ସାଧାରଣ ଜନତା ଦାବି କରିଛନ୍ତି । ଏହି ରାସ୍ତାର କେଶରପୁର ଠାରୁ ରୁଆ ଯାଏଁ ଆଉ ଥରେ ନୂଆ ଉନ୍ନତମାନର କଂକ୍ରିଟ ଲେୟାର ( ପିକ୍ୟୁସି ) ଦେବାକୁ ଦାବି ହେଉଛି । ଏହାକୁ ପୂର୍ତ୍ତ ବିଭାଗ ତଥା ରାଜ୍ୟ ପ୍ରଶାସନର ନଜରକୁ ଆଣିବା ନିମନ୍ତେ ବିଭିନ୍ନ ଟ୍ବିଟ୍ କରାଯାଇଛି ଏବଂ ପୂର୍ତ୍ତ ବିଭାର ମୁଖ୍ୟ ଯନ୍ତ୍ରୀ ତାର ପ୍ରସାଦ ମିଶ୍ରଙ୍କୁ
ମଧ୍ୟ ଏହି ସମସ୍ୟାର ସମାଧାନ ପାଇଁ ଅନୁରୋଧ କରାଯାଇଛି ଏବଂ ସେ ମଧ୍ୟ ଏହାକୁ ତାଙ୍କ ନଜରକୁ ଆଣିଥିବାରୁ ଧନ୍ୟବାଦ ଦେଇଛନ୍ତି ।