ନୂଆଗାଁ,୩୦ା୭ (ଧନେଶ୍ୱର ସାହୁ)ନୟାଗଡ଼ ଜିଲା ନୂଆଗାଁ ବ୍ଲକ ନୂଆଗାଁ ଶୈବପୀଠ ନିକଟରେ ଆରମ୍ଭ ହୋଇଥିବା କଲ୍ୟାଣ ମଣ୍ଡପ ନିର୍ମାଣ କାମ ଅଢେଇ ବର୍ଷ ହେଲା ଅଧାପନ୍ତରିଆ ଭାବେ ପଡି ରହିଛି । ନିର୍ମାଣ କାର୍ଯ୍ୟ ପାଇଁ ଅନୁଦାନ ଥିଲେ ମଧ୍ୟ ପଞ୍ଚାୟତ ନିର୍ବାଚନ ପରେ ସେହି କାର୍ଯ୍ୟକୁ ସ୍ଥଗିତ ରଖାଯିବା ଘଟଣା ଅଞ୍ଚଳବାସୀଙ୍କ ମନରେ ଅଶାନ୍ତି ସୃଷ୍ଟି କରିଛି ା ଏ ସଂକ୍ରାନ୍ତରେ ତୁରନ୍ତ ପଦକ୍ଷେପ ନେବାକୁ ଦାବି ହୋଇଛି ା
ସୂଚନା ଅନୁଯାୟୀ, ନୂଆଗାଁରେ ଦିନକୁ ଦିନ ଲୋକସଂଖ୍ୟା ବୃଦ୍ଧି ପାଇବାରେ ଲାଗିଛି ା ଲୋକମାନଙ୍କ ଆବଶ୍ୟକତା ମଧ୍ୟ ବଢୁଛି । ସେହି ଅନୁସାରେ ବିବାହ, ବ୍ରତଘର , ଭୋଜିଭାତ, ସଭାସମିତି ଘରେ କରିବା ଅପେକ୍ଷା କଲ୍ୟାଣ ମଣ୍ଡପରେ କରିବାକୁ ଲୋକମାନେ ଚାହୁଁଛନ୍ତି ା ତେଣୁ ନୂଆଗାଁରେ ଏକ କଲ୍ୟାଣ ମଣ୍ଡପ ନିର୍ମାଣ କରିବା ପାଇଁ ସରକାର ୩୫ ଲକ୍ଷ ଟଙ୍କା ମଞ୍ଜୁର କରିଥିଲେ । ୨୦୨୦ ଡିସେମ୍ବର ୬ରେ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା, ବ୍ଲକ ଚେୟାମ୍ୟାନ ଅନ୍ତର୍ଯ୍ୟାମୀ ସ୍ବାଇଁ , ଜିଲା ପରିଷଦ ସଭ୍ୟ ସୁଦୀପ୍ତ ଚନ୍ଦ୍ର ରାୟ ଆଦି ଅତିଥିମାନଙ୍କ ଦ୍ୱାରା ନୂଆଗାଁ ଶୈବପୀଠରେ କଲ୍ୟାଣ ମଣ୍ଡପର ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। କାର୍ଯ୍ୟାରମ୍ଭ ହେବାର ଅଢେଇ ବର୍ଷ ବିତି ଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ଫାଉଣ୍ଡେଶନ ପଡି ଅଳ୍ପ କିଛି କାମରେ ଅଟକିଛି କଲ୍ୟାଣ ମଣ୍ଡପ ନିର୍ମାଣ । ସେଥିରେ ବ୍ୟବହାର ହୋଇଥିବା ଛଡରେ କଳଙ୍କି ଲାଗି ଦୁର୍ବଳ ହେବାକୁ ବସିଲାଣି । ହେଲେ ନିର୍ମାଣ କାମକୁ ସମ୍ପୂର୍ଣ୍ଣ କରିବା ପାଇଁ କୌଣସି ନେତା କିମ୍ବା ପ୍ରଶାସନିକ ଅଧିକାରୀଙ୍କ ଦୃଷ୍ଟି ପଡୁନି । ତେବେ କଲ୍ୟାଣ ମଣ୍ଡପର କାର୍ଯ୍ୟାରମ୍ଭ କରିଥିବା ଠିକାଦାରଙ୍କୁ କାର୍ଯ୍ୟ ବାବଦରେ ପଚାରିବାରେ ପଞ୍ଚାୟତ ନିର୍ବାଚନ ପୂର୍ବରୁ ମାତ୍ର ୧୦ ଲକ୍ଷ ଟଙ୍କାର ଫାଇଲ ପ୍ରସ୍ତୁତ କରାଯାଇଥିଲା। ସେହି ଅନୁସାରେ ମୁଁ ମୋର କାମ ସାରି ଦେଇଛି। କିନ୍ତୁ ପଞ୍ଚାୟତ ନିର୍ବାଚନ ପରେ ଆଉ ଫାଇଲ ପ୍ରସ୍ତୁତ କରାଯାଇ ନାହିଁ କିମ୍ବା ମୋତେ କାମ କରିବା ପାଇଁ ଅନୁମତି ଦିଆ ଯାଇ ନାହିଁ । ଏପରି କି ସେହି କାମରେ ମୁଁ ବ୍ୟବହାର କରିଥିବା ଛଡର ବିଲ୍ ମଧ୍ୟ ଏଯାବତ୍ ମୋତେ ପ୍ରଦାନ କରାଯାଇ ନାହିଁ ବୋଲି କହିଛନ୍ତି ଠିକାଦାର । ତେବେ ଏଥିରୁ ସ୍ପଷ୍ଟ ବାରି ହୋଇ ପଡୁଛି କି ରାଜନୀତି ପ୍ରଭାବରେ ବଳି ପଡିଛି ନୂଆଗାଁ କଲ୍ୟାଣ ମଣ୍ଡପ ନିର୍ମାଣ । ଯାହାଫଳରେ ସ୍ଥାନୀୟ ଲୋକେ ନିକଟସ୍ଥ ଅଚଳ ହାଟର ଖୋଲା ମଣ୍ଡପକୁ ଆଶ୍ରା କରି ସେଠାରେ ବିବାହ, ବ୍ରତଘର ଆଦି ଭୋଜିଭାତ କରୁଛନ୍ତି । କଲ୍ୟାଣ ମଣ୍ଡପ ନିର୍ମାଣ ବାବଦରେ ନୂଆଗାଁ ବିଡିଓ ସଚ୍ଚିଦାନନ୍ଦ ମିଶ୍ରଙ୍କୁ ପଚାରିବାରେ ମୁଁ ଏ ସଂକ୍ରାନ୍ତରେ ଯନ୍ତ୍ରୀଙ୍କ ସହ ଆଲୋଚନା କରିବି ବୋଲି କହିଛନ୍ତି।
