ଗୋପ,୧୪।୪(ଡି.ଏନ୍.ଏ.): ଗୋପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ବୁଧବାର ଜଣେ ମହିଳା ପ୍ରସବ କରିବା ପରେ ସରକାରୀ କିଟ୍ ନ ମିଳିବାରୁ ନବଜାତ ଶିଶୁ ଏକ ଖବରକାଗଜ ଉପରେ ଶୋଇଥିବା ଦେଖିବାକୁ ମିଳିଛି। ଏହି ଘଟଣାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ପ୍ରକାଶ ଯେ, ମଙ୍ଗଳବାର ବିଳମ୍ବିତ ରାତିରେ ଗୋପ ବ୍ଲକ ଅଧୀନ ଇଚ୍ଛାପୁର ଗ୍ରାମର ଜଣେ ମହିଳା ପ୍ରସୂତି ନିମନ୍ତେ ଗୋପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ। ବୁଧବାର ସକାଳେ ମହିଳା ଜଣଙ୍କ ନବଜାତ ଶିଶୁପୁତ୍ରକୁ ଜନ୍ମ ଦେଇଥିଲେ। ତେବେ ନବଜାତକକୁ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ସରକାରୀ କିଟ୍ ଦିଆଯାଇ ନ ଥିଲା। ପ୍ରସୂତିଙ୍କ ସମ୍ପର୍କୀୟମାନେ ଚିରା କପଡ଼ା ଓ ଖବରକାଗଜ ଉପରେ ଶିଶୁକୁ ଶୁଆଇଥିଲେ। ଘଟଣା ବିଷୟରେ ଶୁଣି କେତେଜଣ ଖବରଦାତା ପହଞ୍ଚତ୍ବା ପରେ ପ୍ରସୂତିଙ୍କୁ କିଟ୍ ଦିଆଯାଇଥିଲା। ଏ ନେଇ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡ.ଜସ୍ମିନ ଆଫ୍ରୋଜ କହିଛନ୍ତି, ଅଭିଯୋଗ ସମ୍ପର୍କରେ ତୁରନ୍ତ ଡିୟୁଟିରେ ଥିବା ଡାକ୍ତର ଓ କର୍ମଚାରୀଙ୍କୁ ପଚାରିବାରେ ଭୁଲ ମାଗିବା ସହ ଆଉ ଏପରି ଭୁଲ ହେବ ନାହିଁ ବୋଲି କହିଥିଲେ।