ନିମାପଡ଼ା, ୨୧।୭ (ଡି.ଏନ୍.ଏ.): ନିମାପଡ଼ାରେ ନବନିର୍ମିତ ବସ୍ଷ୍ଟାଣ୍ଡ କାର୍ଯ୍ୟକ୍ଷମ ହୋଇ ନ ପାରି ଦୀର୍ଘଦିନ ଧରି ଅହେଳିତ ଅବସ୍ଥାରେ ରହିଛି। ଫଳରେ ନୂଆ ବସ୍ଷ୍ଟାଣ୍ଡ କାହା ସ୍ବାର୍ଥ ପାଇଁ ନିର୍ମିତ ବୋଲି ନିମାପଡ଼ାବାସୀଙ୍କ ମଧ୍ୟରେ ପ୍ରଶ୍ନ ସୃଷ୍ଟି ହୋଇଛି। ଅଞ୍ଚଳବାସୀଙ୍କ ଦୀର୍ଘ ଦିନର ଦାବି ପରେ ନିମାପଡ଼ାରେ ନୂଆ ବସ୍ଷ୍ଟାଣ୍ଡ ନିର୍ମାଣ ହୋଇଥିଲା। ଏଥିପାଇଁ ସ୍ଥାନୀୟ ଏନ୍ଏସି ପକ୍ଷରୁ ୨ କୋଟି ୫୯ ଲକ୍ଷ ଟଙ୍କା ବ୍ୟୟ ବରାଦ ହୋଇଥିଲା। ୨୦୧୮-୧୯ରେ ତତ୍କାଳୀନ ପରିବହନ ମନ୍ତ୍ରୀ ନୃସିଂହ ସାହୁ ଓ ବର୍ତ୍ତମାନର ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ବସ୍ଷ୍ଟାଣ୍ଡକୁ ଉଦ୍ଘାଟନ କରିଥିଲେ। ହେଲେ ସେବେଠାରୁ ବସ୍ଷ୍ଟାଣ୍ଡଟି ଯାତ୍ରୀଙ୍କ କାମରେ ଲାଗିପାରିନାହିଁ।
ଉଦ୍ଘାଟନର କିଛି ମାସ ପର୍ଯ୍ୟନ୍ତ ନିମାପଡ଼ା ଦେଇ ଯାଉଥିବା ଯାତ୍ରୀବାହୀ ବସ୍ଗୁଡ଼ିକ ଷ୍ଟାଣ୍ଡରେ ରହୁଥିଲା। ହେଲେ ଏବେ ପୁରୀ, ଭୁବନେଶ୍ୱର, କଟକ, କୋଣାର୍କ, କାକଟପୁର, ଅସ୍ତରଙ୍ଗ, ବଳଙ୍ଗା ଅଞ୍ଚଳକୁ ଯାତାୟାତ କରୁଥିବା ବହୁ ବସ୍ ନୂଆ ବସ୍ଷ୍ଟାଣ୍ଡକୁ ଆସୁନାହିଁ। ସେଗୁଡ଼ିକ ପୁରୁଣା ଷ୍ଟାଣ୍ଡରେ ମୁଖ୍ୟ ରାସ୍ତା ଅବରୋଧ କରି ରହୁଛି। ଯାତ୍ରୀଙ୍କ ସୁବିଧା ନିମନ୍ତେ ନୂଆ ବସ୍ଷ୍ଟାଣ୍ଡରେ ବିଶ୍ରାମ କକ୍ଷ, ମହିଳା ଓ ପୁରୁଷଙ୍କ ନିମନ୍ତେ ପୃଥକ ଶୌଚାଳୟ, ପରିସ୍ରାଗାର, ଟିକେଟ୍ କାଉଣ୍ଟର, ପାନୀୟଜଳ, ଉଜ୍ଜ୍ୱଳ ଆଲୋକ ବ୍ୟବସ୍ଥା ଆଦି ସୁବିଧା ରହିଛି। ହେଲେ ଏତେ ସବୁ ସୁବିଧା ସତ୍ତ୍ୱେ ବସ୍ଗୁଡିକ ସେଠାକୁ ଯାଉନାହିଁ। ପୁରୁଣା ଷ୍ଟାଣ୍ଡରେ ଖରା ବର୍ଷାରେ ରାସ୍ତାକଡ଼ରେ ଦୀର୍ଘ ସମୟ ଧରି ଠିଆ ହୋଇ ବସ୍କୁ ଯାତ୍ରୀମାନେ ଅପେକ୍ଷା କରିବାକୁ ପଡୁଛି। ଏହା କଷ୍ଟଦାୟକ ବୋଲି ବହୁ ଯାତ୍ରୀ କ୍ଷୋଭ ପ୍ରକାଶ କରି କହିଛନ୍ତି। ନୂତନ ବସ୍ଷ୍ଟାଣ୍ଡରେ ଟର୍ମିନାଲ ବ୍ୟବସ୍ଥା ନ ଥିବାବେଳେ ଶୌଚାଳୟ, ବିଶ୍ରାମ କକ୍ଷ, ଟିକେଟ କାଉଣ୍ଟର, ଥଣ୍ଡା ପାନୀୟ ଜଳ ମେଶିନ ଆଦି ଅବ୍ୟବହୃତ ଅବସ୍ଥାରେ ରହିଛି। ସେହି ସ୍ଥାନ ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଲାଣି। ଏ ଦିଗରେ ପ୍ରଶାସନର ଦୃଷ୍ଟି ପଡୁନାହିଁ। ଏଥିଯୋଗୁ ସାଧାରଣରେ ତୀବ୍ର ଅସନ୍ତୋଷ ଦେଖାଦେଇଛି। ଏନ୍ଏସି କର୍ତ୍ତୃପକ୍ଷଙ୍କ ଅବହେଳା, ଉଦାସୀନତା, ଅପାରଗତା ଯୋଗୁ ନୂଆ ବସ୍ଷ୍ଟାଣ୍ଡ ଅବହେଳିତ ଅବସ୍ଥାରେ ରହିଥିବା ସ୍ଥାନୀୟ ବାସିନ୍ଦା ପୂର୍ଣ୍ଣଚନ୍ଦ୍ର ସାହୁ, କୈଳାସ ଚନ୍ଦ୍ର ସାହୁ, ରାମଚନ୍ଦ୍ର ପ୍ରଧାନ ଏବଂ ମନୋଜ ବେହେରା ପ୍ରମୁଖ କହିଛନ୍ତି। ଷ୍ଟାଣ୍ଡରେ ସମସ୍ତ ଯାତ୍ରୀବାହୀ ବସ୍ ରହଣି ବ୍ୟବସ୍ଥା ଲାଗି ପ୍ରଶାସନ ତୁରନ୍ତ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି। ଏ ସମ୍ପର୍କରେ ନିମାପଡ଼ା ଘରୋଇ ବସ୍ ମାଲିକ ସଂଘର ସଭାପତି ବିଚିତ୍ରାନନ୍ଦ ଖଟୋଇ, ବସ୍ ମାଲିକ ସଞ୍ଜୟ ସାହୁ, ସନ୍ତୋଷ ସେନାପତି, ଅନାମ ଚରଣ ସ୍ବାଇଁ ଏବଂ ବିଜୟ ମିଶ୍ର ପ୍ରମୁଖ କହିଛନ୍ତି, ନିମାପଡ଼ା ରାସ୍ତାରେ ମୋ’ ବସ୍ ଚଳାଚଳ ଯୋଗୁ ବସ୍ର ସମୟ ନିର୍ଘଣ୍ଟକୁ ନେଇ ବିବାଦ ଓ ସମସ୍ୟା ଉପୁଜୁଛି। ଏନେଇ ପ୍ରଶାସନ ଓ ବସ୍ ମାଲିକଙ୍କ ମଧ୍ୟରେ ଆଲୋଚନା କରାଯାଇଥିଲେ ମଧ୍ୟ ସୁଫଳ ମିଳିନାହିଁ। ପୁରୁଣା ବସ୍ଷ୍ଟାଣ୍ଡଠାରୁ ନୂଆ ବସ୍ଷ୍ଟାଣ୍ଡର ଦୂରତା ୧ କିମିରୁ ଊର୍ଦ୍ଧ୍ୱ ହୋଇଥିବାରୁ ଯାତ୍ରୀମାନେ ସେଠାକୁ ଯାଉନାହାନ୍ତି। ତେଣୁ ପୁରୁଣା ସ୍ଥାନରେ ବସ୍ ରହୁଛି। ଅନ୍ୟପକ୍ଷରେ ଏ ସମ୍ପର୍କରେ ଏନ୍ଏସି ଅଧ୍ୟକ୍ଷା ସସ୍ମିତା ସାହୁ ଏବଂ ଉପାଧ୍ୟକ୍ଷ ସନ୍ତୋଷ ଦାଶ କହିଛନ୍ତି, ଘରୋଇ ବସ୍ ମାଲିକ ସଂଘର କର୍ମକର୍ତ୍ତା ଓ ଗାଡ଼ି ମାଲିକମାନଙ୍କ ସହ ଆଲୋଚନା କରାଯିବ। ଖୁବ୍ଶୀଘ୍ର ନୂଆ ବସ୍ଷ୍ଟାଣ୍ଡରେ ଯାତ୍ରୀବାହୀ ବସ୍ ରହଣିର ବ୍ୟବସ୍ଥା କରାଯିବ।
ବିଚିତ୍ରାନନ୍ଦ ସାହୁ
