ମୁମ୍ବାଇ: କରୋନା ମହାମାରୀ ଚାପ ବଜାର ଉପରେ ପଡିଛି। ବଜାର ବର୍ତ୍ତମାନ ସୁଦ୍ଧା ସ୍ବାଭାବିକ ସ୍ଥିତିକୁ ଫେରିନାହିଁ। ଭାରତୀୟ ବ୍ୟାଙ୍କିଙ୍ଗ୍ ଶିଳ୍ପରେ ଆଗାମୀ ୧୨ରୁ ୧୮ ମାସରେ ଅନାଦାୟ ଋଣ(ଏନ୍ପିଏ) ପରିମାଣ ଆହୁରି ବଢିବ ବୋଲି ଏସ୍ଆଣ୍ଡପି ଗ୍ଲୋବାଲ ରେଟିଂ ଏଜେନ୍ସି ମଙ୍ଗଳବାର ଅନୁମାନ ଲଗାଇଛି। ଏନ୍ପିଏ ପ୍ରାୟ ୧୧% ଛୁଇଁବା ନେଇ ଏହି ଏଜେନ୍ସି ଆଶଙ୍କା ପ୍ରକାଶ କରିଛି। ମୋରାଟୋରିୟମ ସମୟରେ କୌଣସି ଋଣ ଖାତାକୁ ଏନ୍ପିଏ ଘୋଷଣା ନ କରିବା ଲାଗି ସୁପ୍ରିମକୋର୍ଟ ବ୍ୟାଙ୍କଗୁଡିକୁ ନିର୍ଦ୍ଦେଶ ଦେଇଥିଲେ। ଏହାକୁ ଦେଖିଲେ ଚଳିତ ଆର୍ଥତ୍କ ବର୍ଷ ଦ୍ୱିତୀୟ ତ୍ରୈମାସରେ ଆର୍ଥତ୍କ ଅନୁଷ୍ଠାନଗୁଡିକରେ ବେଶି ସଂଖ୍ୟକ ଆକାଉଣ୍ଟ ଏନ୍ପିଏ ପରିସରଭୁକ୍ତ ହେବ ନାହିଁ। ଅଗଷ୍ଟ ୩୧ରେ ଋଣ ମୋରାଟୋରିୟମ ଅବଧି ଶେଷ ହୋଇଛି।
ମୋଟ ଏନ୍ପିଏ କଥା ବିଚାରକୁ ନେଲେ ପ୍ରାୟ ୧୧%କୁ ବଢିବ ବୋଲି ଏହି ଏଜେନ୍ସି ରିପୋର୍ଟରେ ପ୍ରକାଶ କରିଛି। ଆସନ୍ତା ବର୍ଷ ସୁଦ୍ଧା କ୍ରେଡିଟ କଷ୍ଟ୍ ୨.୨%ରୁ ୨.୯% ବୃଦ୍ଧି ପାଇବା ନେଇ କୁହାଯାଉଛି। ଅର୍ଥ ବ୍ୟବସ୍ଥା ଉପରେ ରହିଥିବା ଚାପକୁ କମାଇବା ଲାଗି ସରକାରଙ୍କ ବିଭିନ୍ନ ପଦକ୍ଷେପ ଯୋଗଦାନ ରଖିବ। ଅର୍ଥ ବ୍ୟବସ୍ଥାକୁ ଖୋଲିବା, ଏମ୍ଏସ୍ଏମ୍ଇ ଲାଗି କ୍ରେଡିଟ ଗ୍ୟାରେଣ୍ଟି ଅର୍ଥ ବ୍ୟବସ୍ଥା ଲାଗି ଲାଭକାରୀ ହେବ। ୨୦୨୩ ସୁଦ୍ଧା ବ୍ୟାଙ୍କିଙ୍ଗ୍ କ୍ଷେତ୍ରର ଦକ୍ଷତା ଫେରିବା କଷ୍ଟକର ବୋଲି ରିପୋର୍ଟରେ କୁହାଯାଇଛି। ବ୍ୟାଙ୍କ ପ୍ରାୟ ୩ରୁ ୮% ଋଣ ପୁନର୍ଗଠନ କରିପାରନ୍ତି। ଇକ୍ୱିଟିକୁ ଉନ୍ନତ କରିବା ଲାଗି ଅଣ ବ୍ୟାଙ୍କ ବିତ୍ତ ପ୍ରତିଷ୍ଠାନଗୁଡିକ ସେମାନଙ୍କ ବାଲାନ୍ସ ସିଟ୍ରେ ଉନ୍ନତୀକରଣ କରିବେ। ସେହିଭଳି ପୁଞ୍ଜି ଗଚ୍ଛିିତ କରି ରଖିବା, କୋଭିଡ୍ ଯୋଗୁ ଉପୁଜିଥିବା ସ୍ଥିତିରେ କାରବାରକୁ ଉନ୍ନତ କରିବା ଲାଗି ପ୍ରସ୍ତୁତି କ୍ଷତିକୁ ହ୍ରାସ କରିବା ଦିଗରେ ସହାୟକ ହେବ। ଏନ୍ବିଏଫ୍ସିର ସ୍ଥିତିରେ ଉନ୍ନତି ଆସୁଥିବା ଏହା ମତ ରଖିଛି।