ଛତ୍ରପୁର,୧୮।୮(ଡି.ଏନ.ଏ): ଗଞ୍ଜାମ ଜିଲାରେ କୋଭିଡ୍ ଆକ୍ଟିଭ୍ କେଶ୍ କମିବାରେ ଲାଗିଛି। ଏ ନେଇ ମଙ୍ଗଳବାର ଏକ ଗ୍ରାଫ୍ ସହ ଜିଲପାଳ ବିଜୟ ଅମୃତା କୁଲାଙ୍ଗେ ଟୁଇଟ୍ କରି ସୂଚନା ଦେଇଛନ୍ତି।
ଜିଲାକୁ ଅନ୍ୟ ରାଜ୍ୟରୁ ପ୍ରାୟ ୪ ଲକ୍ଷ ପ୍ରବାସୀ ଫେରିଥିଲେ। ଏମାନେ ବିଭିନ୍ନ ହଟସ୍ପଟ୍ ରାଜ୍ୟରୁ ଫେରିଥିବାରୁ ଗଞ୍ଜାମରେ କରୋନା ସଂକ୍ରମଣ ବ୍ୟାପିଲା। ଫଳରେ ଏବେ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ୧୫ ହଜାର ଟପିଛି । ଉକ୍ତ ଗ୍ରାଫ୍ ମାଧ୍ୟମରେ ଜିଲାପାଳ ବୁଝାଇଛନ୍ତି ଯେ, ଅଗଷ୍ଟ ୨ ତାରିଖରୁ ୧୫ ତାରିଖ ମଧ୍ୟରେ ଜିଲାରେ କରୋନା ଆକ୍ଟିଭ୍ଙ୍କ ସଂଖ୍ୟା କମିବାରେ ଲାଗିଛି। ୨ ତାରିଖରେ ଜିଲାରେ କରୋନା ଆକ୍ଟିଭ୍ଙ୍କ ସଂଖ୍ୟା ୩ ହଜାର ୪୨୨ ଥିବାବେଳେ ୧୫ ତାରିଖରେ ଏହି ସଂଖ୍ୟା ତଳକୁ ଖସି ୨ ହଜାର ୨୭୨ରେ ପହଞ୍ଚିଛି। ଜୁନ୍ ୩୦ରୁ ଜୁଲାଇ ୨୭ ପର୍ଯ୍ୟନ୍ତ ଦିନକୁ ଦିନ କରୋନା ଆକ୍ଟିଭ୍ଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଥିଲା। ପରେ ଜୁଲାଇ ୨୭ରୁ ଅଗଷ୍ଟ ୨ ପର୍ଯ୍ୟନ୍ତ ପୁଣି କରୋନା ଆକ୍ଟିଭ୍ଙ୍କ ସଂଖ୍ୟା ତଳକୁ ଖସିଥିଲା। ଅଗଷ୍ଟ ୨ରୁ କରୋନା ଆକ୍ଟିଭ୍ଙ୍କ ସଂଖ୍ୟା କମିବାରେ ଲାଗିଛି । ପଜିଟିଭ୍ଙ୍କ ତୁଳନାରେ କରୋନାରୁ ସୁସ୍ଥଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଉଛି। ଜିଲାରେ ୧୨ ହଜାରରୁ ଊର୍ଦ୍ଧ୍ୱ ଲୋକ କରୋନାରୁ ସୁସ୍ଥ ହୋଇ ଘାକୁ ଫେରିଥିବା ସୂଚନା ଦିଆଯାଇଛି ।
