କୃଷ୍ଣପ୍ରସାଦ,୨୦ା୧୧(ଡି.ଏନ୍.ଏ.): ଶୀତ ଋତୁ ଆସିଲେ ରଙ୍ଗବେରଙ୍ଗ ବିଦେଶାଗତ ପକ୍ଷୀଙ୍କ କଳରବରେ ମୁଖରିତ ହୁଏ ଚିଲିକା ଓ ଏହାର ଉପକୂଳବର୍ତ୍ତୀ କୃଷ୍ଣପ୍ରସାଦ ଅଞ୍ଚଳ। ଯେଉଁଥି ପାଇଁ ଦେଶ ବିଦେଶରୁ ପର୍ଯ୍ୟଟକଙ୍କ ସୁଅ ଛୁଟେ ଚିଲିକାକୁ। ତେବେ ବିଡ଼ମ୍ବନାର ବିଷୟ ପ୍ରାକୃତିକ ବୈଷମ୍ୟତା ଯୋଗୁ ଅକ୍ଟୋବର ସାରା ଲଘୁଚାପଜନିତ ବର୍ଷା ହୋଇ ବିଦେଶ ପକ୍ଷୀଙ୍କ ଆଗମନରେ ବାଧା ସୃଷ୍ଟି କରିଛି। ହଜାର ହଜାର କିଲୋମିଟର ରାସ୍ତା ଅତିକ୍ରମ କରି ଖାଦ୍ୟ ଅନ୍ବେଷଣରେ ସେମାନେ ଚିଲିକା ଉପକୂଳବର୍ତ୍ତୀ ଇଲାକା ତଥା ଧାନ ଜମିକୁ ଆସିଥାନ୍ତି। କିନ୍ତୁ ଚଳିତବର୍ଷ କୃଷ୍ଣପ୍ରସାଦ ବ୍ଲକରେ ଗଜା ମରୁଡ଼ି ଯୋଗୁ ଧାନ ଫସଲ ହୋଇ ନ ଥିବାରୁ ଏହି ପକ୍ଷୀମାନଙ୍କର ଦେଖାମିଳୁ ନାହିଁ। ଫଳରେ ସ୍ଥାନୀୟ ଅଞ୍ଚଳରେ ରହିଯାଇଥିବା ଗେଣ୍ଡାଳିଆ, ପେଣ୍ଟଡଷ୍ଟ୍ରକ, ଟିଇଁଟିଆଁ, ବାଟୁଆଣି ଆଦି ଦେଶୀ ପକ୍ଷୀମାନେ ଦେଖାଯାଉଛନ୍ତି।
ନଭେମ୍ବର ସରିବାକୁ ବସିଥିବା ବେଳେ ଏଯାବତ୍ ଆଶାନୁରୂପ ଶୀତର ପ୍ରଭାବ ନ ଥିବାରୁ ବିଦେଶୀ ପକ୍ଷୀଙ୍କ ଆଗମନ ସଂଖ୍ୟା ସାମାନ୍ୟ ହ୍ରାସ ପାଇଛି। ଏବେ ଚିଲିକା ମଧ୍ୟରେ ଅଳ୍ପ ସଂଖ୍ୟାରେ ବିଦେଶାଗତ ପକ୍ଷୀମାନେ ଚକର ମାରୁଥିବା ବେଳେ ତଟବର୍ତ୍ତୀ ଅଞ୍ଚଳ ପାରିକୁଦ, ଗୁରୁବାଇ, ନୂଆପଡା, ସିପିଆ, ଅଁଳାକୁଦା, ତିଛିଣି, ପଚଂକୁଦି, ବନମାଳ, ଚଟେଇକୋଣ, ସୋଲାକୁଦି, ପାଣ୍ଢା, ଚିଖିଲି, ଚିତ୍ରକୋଟ, ଖଟିଆକୁଦିରେ ଦେଖିବାକୁ ମିଳୁ ନାହାନ୍ତି। ଉକ୍ତ ଅଞ୍ଚଳରେ କିଛି ମାତ୍ରାରେ ବିଦେଶାଗତ ଗଡଓାଲ, ସୋଭଲର, ଗଡଉଇଟ, ସ୍ୟାଣ୍ଡପାଇପର ଆଦି ପ୍ରଜାତିର ପକ୍ଷୀ ଦେଖିବାକୁ ମିଳୁଛି। ବିଗତ ବର୍ଷ ଭଳି ଚିଲିକା ବନ୍ୟପ୍ରାଣୀ ବନାଞ୍ଚଳ ବନଖଣ୍ଡ, ବାଲୁଗାଁ ତରଫରୁ ଆନୁଷଙ୍ଗିକ ସୁରକ୍ଷା ବ୍ୟବସ୍ଥା ଏବର୍ଷ ମଧ୍ୟ କରାଯାଇଛି। ସେହିଭଳି ପାରିକୁଦ, ନୂଆପଡ଼ା ଏବଂ ସାତପଡ଼ାରେ ପକ୍ଷୀ ସୁରକ୍ଷା ଶିବିର କରାଯାଇଛି। ସେଠାରେ ପକ୍ଷୀଙ୍କ ସୁରକ୍ଷା ସହ ଖାଦ୍ୟ ପ୍ରତି ମଧ୍ୟ ବ୍ୟବସ୍ଥା କରାଯାଇଛି। ଯେପରି ବିଦେଶାଗତ ପକ୍ଷୀଙ୍କ ଆଗମନ ସଂଖ୍ୟା ବଢ଼ିବାରେ ସହାୟକ ହୋଇପାରିବ। ଅନ୍ୟପଟେ ଚିଲିକା ବନ୍ୟପ୍ରାଣୀ ବନଖଣ୍ଡ ବାଲୁଗାଁ ତରଫରୁ ୮ଟି ସ୍ଥାନରେ ସାମୁଦ୍ରିକ କଇଁଛ ସୁରକ୍ଷା ଶିବିର କରାଯାଇଥିବା ଜଣାଯାଇଛି। ତେବେ ଗୋଟିଏପଟେ କରୋନା ମହାମାରୀ ଅନ୍ୟପଟେ ଆଶାତୀତ ପକ୍ଷୀ ସଂଖ୍ୟା ନ ଥିବା ଯୋଗୁ ପର୍ଯ୍ୟଟକ ଚିଲିକାକୁ ପ୍ରବେଶ କରିବା ଆଶା କ୍ଷୀଣ ହୋଇପଡ଼ିଛି। ଯାହାଦ୍ୱାରା ଚିଲିକା ଉପକୂଳବାସୀଙ୍କ ରୋଜଗାରରେ ବାଧା ଉପୁଜିବା ଆଶଙ୍କା ରହିଛି। ତେଣୁ ଏଥିପ୍ରତି ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।