ସମ୍ବଲପୁର,୯ା୧(ବ୍ୟୁରୋ): ସମ୍ବଲପୁର ଜିଲାର ହୀରାକୁଦ ଡ୍ୟାମରେ ଚଳିତବର୍ଷ ପକ୍ଷୀସଂଖ୍ୟା ବୃଦ୍ଧି ପାଇଛି। ଶୁକ୍ରବାର ବନ ବିଭାଗ ପକ୍ଷରୁ ପ୍ରଦାନ କରାଯାଇଥିବା ରିପୋର୍ଟରୁ ଏହା ଜଣାପଡିଛି। ମୋଟ ୯୮ ପ୍ରଜାତିର ୧ ଲକ୍ଷ ୨୪ ହଜାର ୮୬୪ ପକ୍ଷୀ ହୀରାକୁଦ ଡ୍ୟାମକୁ ଆସିଛନ୍ତି। ସେମାନଙ୍କ ମଧ୍ୟରେ ୪୧ ପ୍ରଜାତିର ୧ ଲକ୍ଷ ୦୩ ହଜାର ୧୧୭ ବିଦେଶୀ ପକ୍ଷୀ ରହିଛନ୍ତି। ଗତବର୍ଷ ମୋଟ ୯୩ ପ୍ରଜାତିର ୯୮,୩୬୩ ପକ୍ଷୀ ଆସିଥିଲେ। ପକ୍ଷୀମାନଙ୍କ ସୁରକ୍ଷା ନେଇ ବନ ବିଭାଗ ପଦକ୍ଷେପ ଗ୍ରହଣ କରିଛି। ଲଖନପୁର ଅଞ୍ଚଳରେ ଗୋଟିଏ ଓ ସମ୍ବଲପୁରରେ ଗୋଟିଏ ଟିମ୍ ନିଯୁକ୍ତ କରାଯାଇଛି। ଏପରି କି ବନ ବିଭାଗ କର୍ମଚାରୀମାନେ ନିୟମିତ ନଜର ରଖିଛନ୍ତି ବୋଲି ହୀରାକୁଦ ବନ୍ୟପ୍ରାଣୀ ଡିଏଫ୍ଓ କେ. ପ୍ରତାପ କଟପଲ୍ଲି କହିଛନ୍ତି। ସୂଚନାଯୋଗ୍ୟ, ଗୁରୁବାର ସକାଳ ୬ଟାରୁ ପକ୍ଷୀ ଗଣନା ଆରମ୍ଭ ହୋଇଥିଲା। ସମ୍ବଲପୁର, ଝାରସୁଗୁଡ଼ା, ହୀରାକୁଦ ବନଖଣ୍ଡ ଅଧିକାରୀ ଓ କର୍ମଚାରୀ ଏଥିରେ ସାମିଲ ହୋଇଥିଲେ। ପ୍ରତିବର୍ଷ ଭଳି ଚଳିତବର୍ଷ ବଭିନ୍ନ ପ୍ରଜାତିର ବିଦେଶୀ ପକ୍ଷୀ ନଭେମ୍ବର ମାସରୁ ଆସିବା ଆରମ୍ଭ କରିଥିଲେ। ଡକ ପ୍ରଜାତିର ରେଡ କ୍ରେଷ୍ଟେଟ ପୋଚାଡ, ଟୁଫେଡ ଡକ, ବ୍ରାମିନି ଡକ, ନରଦେନ ପିନଷ୍ଟେଲ, ୟୁରୋଏସିୟାନ, ଏସିୟାନ ୱିଗନ ପ୍ରଭୃତି ପକ୍ଷୀ ଚିହ୍ନଟ କରାଯାଇଥିଲା।