ନୂଆଦିଲ୍ଲୀ, ୧୩ା୧୦: ସୋସିଆଲ ମିଡିଆ ପ୍ଲାଟ୍ଫର୍ମ ଫେସ୍ବୁକ୍ ୟୁଜର୍ସଙ୍କ ଫଲୋଅର୍ସଙ୍କ ସଂଖ୍ୟା ଅଚାନକ କମିଯିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏପରିକି ଖୋଦ୍ ଫେସ୍ବୁକ୍ର ମୂଳ କମ୍ପାନୀ ମେଟାର ପ୍ରତିଷ୍ଠାତା ମାର୍କ ଜୁକରବର୍ଗଙ୍କ ଫଲୋଅର୍ସଙ୍କ ସଂଖ୍ୟା ବୁଧବାର ୩ଟା ସୁଦ୍ଧା ୧୧୯ ନିୟୁତ ବା ୧୧.୯ କୋଟିରୁ ଖସି ୯,୯୯୨ ହୋଇଯାଇଥିଲା।
ଅନେକ ୟୁଜର୍ସ ସେମାନଙ୍କ ଫଲୋଅର୍ସ ସଂଖ୍ୟା କମିଯାଇଥିବା ସୋସିଆଲ ମିଡିଆରେ ପୋଷ୍ଟ କରିଛନ୍ତି। ନିର୍ବାସିତ ବାଂଲାଦେଶୀ ଲେଖିକା ତସ୍ଲିମା ନସ୍ରିନ୍ ଟୁଇଟ କରି କହିଛନ୍ତି, ‘ଫେସ୍ବୁକ୍ ସୁନାମି କରି ମୋର ପ୍ରାୟ ୯ ଲକ୍ଷ ଫଲୋଅର୍ସଙ୍କୁ ଧୋଇନେଇଛି। ଏହି ସଂଖ୍ୟା ଆଉ ମାତ୍ର ୯ ହଜାର ରହିଛି। ଫେସ୍ବୁକ୍ର ଏଭଳି କମେଡି ଭଲ ଲାଗେ’। ଏ ନେଇ ମେଟାର ଜଣେ ମୁଖପାତ୍ର କହିଛନ୍ତି, ଅନେକ ଫେସ୍ବୁକ୍ ୟୁଜର୍ସଙ୍କ ଫଲୋଅର୍ସ ସଂଖ୍ୟା କମିଥିବା ଖବର ବାବଦରେ ଅବଗତ ଅଛୁ। ଏଥିପାଇଁ ଆମେ ଦୁଃଖିତ। କୌଣସି କାରଣରୁ ଏପରି ହୋଇଛି। ଯଥାସମ୍ଭବ ଶୀଘ୍ର ଏହି ଅସୁବିଧା ଦୂର କରିବା ପାଇଁ ଉଦ୍ୟମ କରାଯାଉଛି।
