ନୂଆଦିଲ୍ଲୀ,୧୦/୫:ଭାରତରେ ୧୯୫୦ରୁ ୨୦୧୫ ମଧ୍ୟରେ ହିନ୍ଦୁମାନଙ୍କ ସଂଖ୍ୟା ୭.୮୨ ପ୍ରତିଶତ ହ୍ରାସ ପାଇଥିବାବେଳେ ମୁସଲମାନ ଜନସଂଖ୍ୟା ୪୩.୧୫ ପ୍ରତିଶତ ବୃଦ୍ଧି ପାଇଛି। ପ୍ରଧାନମନ୍ତ୍ରୀଙ୍କ ଆର୍ଥତ୍କ ଉପଦେଷ୍ଟା ପରିଷଦ (ଇଏସି-ପିଏମ୍) ପକ୍ଷରୁ ଏଭଳି ରିପୋର୍ଟ ପ୍ରକାଶ ପାଇଛି। ‘ଶେୟାର ଅଫ୍ ରିଲିଜିଅସ୍ ମାଇନୋରିଟିଜ୍: ଏ କ୍ରସ୍-କଣ୍ଟ୍ରି ଆନାଲିସିସ୍(୧୯୫୦-୨୦୧୫) ନାମରେ ପ୍ରକାଶିତ ଏହି ରିପୋର୍ଟରେ ଆହୁରି କୁହାଯାଇଛି, ଦେଶର ଜନସଂଖ୍ୟାରେ ଜୈନମାନଙ୍କ ଭାଗ ୧୯୫୦ରେ ୦.୪୫ ପ୍ରତିଶତ ଥିବାବେଳେ ୨୦୧୫ରେ ତାହା ୦.୩୬ ପ୍ରତିଶତକୁ ହ୍ରାସ ପାଇଛି।
ରିପୋର୍ଟ ଅନୁଯାୟୀ, ୧୯୫୦ରେ ଭାରତରେ ହିନ୍ଦୁମାନଙ୍କ ସଂଖ୍ୟା ମୋଟ ଜନସଂଖ୍ୟାର ୮୪.୬୮ ପ୍ରତିଶତ ରହିଥିଲା। ୨୦୧୫ରେ ତାହା ୭୮.୦୬ ପ୍ରତିଶତକୁ ହ୍ରାସ ପାଇଛି। ଅନ୍ୟପକ୍ଷରେ ୧୯୫୦ରେ ମୁସଲମାନଙ୍କ ସଂଖ୍ୟା ମୋଟ ଜନସଂଖ୍ୟାର ୯.୮୪ ପ୍ରତିଶତ ଥିବାବେଳେ ୨୦୧୫ରେ ତାହା ୧୪.୦୯ ପ୍ରତିଶତକୁ ବୃଦ୍ଧି ପାଇଛି। ଅର୍ଥାତ୍ ସେମାନଙ୍କ ଭାଗ ୪୩.୧୫ ପ୍ରତିଶତ ବଢ଼ିଥିବା ଇଏସି-ପିଏମ୍ ସଦସ୍ୟ ଶାମିକା ରବିଙ୍କ ନେତୃତ୍ୱରେ ଗଠିତ ଟିମ୍ ପକ୍ଷରୁ ପ୍ରସ୍ତୁତ ରିପୋର୍ଟରେ କୁହାଯାଇଛି। ଦେଶରେ ଖ୍ରୀଷ୍ଟିଆନ ଜନସଂଖ୍ୟା ଉପରୋକ୍ତ ସମୟ ମଧ୍ୟରେ ୨.୨୪ ପ୍ରତିଶତରୁ ୨.୩୬ ପ୍ରତିଶତକୁ ବଢ଼ିଛି। ଅର୍ଥାତ୍ ସେମାନଙ୍କ ଭାଗରେ ୫.୩୮ ପ୍ରତିଶତ ବୃଦ୍ଧି ହୋଇଛି। ସେହିପରି ଶିଖ୍ ଜନସଂଖ୍ୟା ୧.୨୪ ପ୍ରତିଶତରୁ ବଢ଼ି ୧.୮୫ ପ୍ରତିଶତ ହୋଇଛି। ଏହାର ଅର୍ଥ ଶିଖ୍ମାନଙ୍କ ଭାଗ ୬.୫୮ ପ୍ରତିଶତ ବୃଦ୍ଧି ପାଇଛି। ଅନ୍ୟପକ୍ଷରେ ପାର୍ସି ଜନସଂଖ୍ୟା ଏହି ସମୟ ମଧ୍ୟରେ ୮୫ ପ୍ରତିଶତ ହ୍ରାସ ପାଇଛି। ୧୯୫୦ରେ ସେମାନଙ୍କ ହାର ମୋଟ ଜନସଂଖ୍ୟାର ୦.୦୩ ପ୍ରତିଶତ ଥିବାବେଳେ ୨୦୧୫ରେ ତାହା ୦.୦୦୪ ପ୍ରତିଶତରେ ପହଞ୍ଚତ୍ଛି।
ସମାଜରେ ବିବିଧତା ସୃଷ୍ଟି ପାଇଁ ଏକ ଅନୁକୂଳ ବାତାବରଣ ସୃଷ୍ଟି ହୋଇଥିବା ଉପରୋକ୍ତ ତଥ୍ୟରୁ ସ୍ପଷ୍ଟ ହେଉଥିବା ରିପୋର୍ଟରେ କୁହାଯାଇଛି। ସମାଜର ଅନୁନ୍ନତ ବର୍ଗଙ୍କୁ ଏକ ପୋଷଣ ପରିବେଶ ଏବଂ ସାମାଜିକ ସହାୟତା ବିନା ଉନ୍ନତ ଜୀବନ ଶୈଳୀ ମଧ୍ୟକୁ ଆଣିବା ସମ୍ଭବ ନୁହେଁ। ସଂଖ୍ୟାଗରିଷ୍ଠ ଜନସଂଖ୍ୟା ଭାଗରେ ହ୍ରାସ ସାଙ୍ଗକୁ ମୁସଲମାନଙ୍କ ସଂଖ୍ୟା ବଢ଼ିଥିବାରୁ ସରକାରଙ୍କ ସମସ୍ତ ନୀତିଗତ କାର୍ଯ୍ୟର ଫଳାଫଳ, ରାଜନୈତିକ ନିଷ୍ପତ୍ତି ଏବଂ ସାମାଜିକ ଅଗ୍ରଗତି ସମାଜରେ ବିବିଧତା ବଢ଼ାଇବାରେ ଏକ ଉପଯୁକ୍ତ ପରିବେଶ ସୃଷ୍ଟି କରିଥିବା ସ୍ପଷ୍ଟ ହୋଇଛି।
ଦକ୍ଷିଣ ଏସିଆରେ ଆମ ପଡ଼ୋଶୀ ରାଷ୍ଟ୍ର ବାଂଲାଦେଶ, ପାକିସ୍ତାନ, ଶ୍ରୀଲଙ୍କା, ଭୁଟାନ ଏବଂ ଆଫଗାନିସ୍ତାନରେ ସଂଖ୍ୟାଗରିଷ୍ଠ ସମ୍ପ୍ରଦାୟଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ସଂଖ୍ୟାଲଘୁ ଜନସଂଖ୍ୟା ବିପଜ୍ଜନକ ଭାବେ ଖସିଚାଲିଥିବାବେଳେ ଭାରତରେ ଏହାର ବିପରୀତ ସ୍ଥିତି ଉଲ୍ଲେଖନୀୟ। କେବଳ ମାଳଦ୍ୱୀପକୁ ବାଦ୍ଦେଲେ ସମସ୍ତ ମୁସଲମାନ ବହୁଳ ଦେଶରେ ସେମାନଙ୍କ ଭାଗ ବୃଦ୍ଧି ପାଇଛି। ମାଳଦ୍ୱୀପରେ ଶାଫି ସୁନ୍ନିମାନଙ୍କ ସଂଖ୍ୟା ୧.୪୭ ପ୍ରତିଶତ କମିଛି। ବାଂଲାଦେଶରେ ମୁସଲମାନଙ୍କ ଭାଗ ସର୍ବାଧିକ ୧୮ ପ୍ରତିଶତ ବଢ଼ିଥିବାବେଳେ ପାକିସ୍ତାନରେ ସଂଖ୍ୟାଗରିଷ୍ଠ ହନାଫି ମୁସଲମାନଙ୍କ ଶେୟାର ୩.୭୫ ପ୍ରତିଶତ ଏବଂ ମୋଟ ମୁସଲମାନଙ୍କ ଭାଗ ୧୦ ପ୍ରତିଶତ ବଢ଼ିଛି। ରିପୋର୍ଟ ଅନୁଯାୟୀ ମ୍ୟାନ୍ମାର, ଭାରତ ଏବଂ ନେପାଳରେ ସଂଖ୍ୟାଗରିଷ୍ଠ ସମ୍ପ୍ରଦାୟଙ୍କ ସଂଖ୍ୟା ହ୍ରାସ ପାଇଛି।