ବାରିପଦା ଅଫିସ,୧୭ା୩: ମୟୂରଭଞ୍ଜ ଜିଲା ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପରେ ବାଘ ସଂଖ୍ୟା ବୃଦ୍ଧି ପାଇବା ନେଇ ଆଶା ପ୍ରକଟ କରାଯାଇଛି। ଦୀର୍ଘ ଏକ ଦଶନ୍ଧିରୁ ଊର୍ଦ୍ଧ୍ୱ ସମୟ ଧରି ବାଘ ସଂଖ୍ୟା ହ୍ରାସ ପାଇଥିବା ବେଳେ ଚଳିତ ବର୍ଷ ୫ମ ଚକ୍ର ବାଘ ଗଣନାକୁ ଭିତ୍ତିକରି ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଡେପୁଟି ଡାଇରେକ୍ଟର(ଦକ୍ଷିଣ) ସମ୍ରାଟ ଗୌଡ଼ା ବାଘ ବଂଶ ବୃଦ୍ଧି ଘଟିଥିବା ଆଶାବ୍ୟକ୍ତ କରିଛନ୍ତି।
ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ(ଏନ୍ଟିସିଏ) ଦ୍ୱାରା ୨୦୨୨ ଜୁଲାଇ ୨୯ ଗ୍ଲୋବାଲ ଟାଇଗର ଦିବସରେ ଗଣନାର ପୂର୍ଣ୍ଣାଙ୍ଗ ରିପୋର୍ଟ ପ୍ରକାଶ ପାଇବ। ବାଘଙ୍କ ଖାଦ୍ୟ ଶୃଙ୍ଖଳକୁ ନେଇ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ତୃଣଭୋଜି ପ୍ରାଣୀଙ୍କ ପାଇଁ ଆବଶ୍ୟକ ଚାରଣଭୂଇଁରେ ଘାସ ଲଗାଇବା, ପିଇବା ପାଣିର ବ୍ୟବସ୍ଥା କରିବା, ଅବାଧ ଶିକାର ରୋକିବା, କୋର୍ ଏବଂ ବଫର ଅଞ୍ଚଳରେ ଥିବା ଲୋକଙ୍କୁ ଥଇଥାନ କରାଯାଉଛି।
ଶିମିଳିପାଳରେ କଳା ବାଘ ସଂଖ୍ୟା ବୃଦ୍ଧି ପାଇଥିବା ବେଳେ କୁଲଡ଼ିହା ଜଙ୍ଗଲକୁ ଶିମିଳିପାଳ ବାଘ ଯାଇଥିବା ଅନୁମାନ କରାଯାଇଛି। ସର୍ବଭାରତୀୟ ବ୍ୟାଘ୍ର ଗଣନା କାର୍ଯ୍ୟକ୍ରମ ୨୦୦୬ରୁ ଆରମ୍ଭ ହୋଇଥିବା ବେଳେ ଏହା ପ୍ରତି ୪ବର୍ଷକୁ ଚକ୍ର ହିସାବରେ ନିଆଯାଇ ୨୦୨୨ ଜାନୁୟାରୀରେ ୫ମ ଚକ୍ର ବାଘ ଗଣନା କରାଯାଇଥିଲା।