ରାୟଗଡ଼ା ଅଫିସ/ଗୁଣପୁର,୧୨ା୪: ରାୟଗଡ଼ା ଜିଲାରେ ଲଗାତର କରୋନା ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। ଗତ ୨୪ ଘଣ୍ଟା ମଧ୍ୟରେ ଜିଲାରୁ ୩୫ ପଜିଟିଭ ଚିହ୍ନଟ ହୋଇଛନ୍ତି। ସଂକ୍ରମଣ ରୋକିବା ନିମନ୍ତେ ଜିଲାରୁ ପଡ଼ୋଶୀ ଆନ୍ଧ୍ର ପ୍ରଦେଶକୁ ସଂଯୋଗ କରୁଥିବା ସମସ୍ତ ୫ ସୀମାକୁ ସୋମବାର ସିଲ୍ କରାଯାଇଛି। ପୂର୍ବ ନିଷ୍ପତ୍ତି ପ୍ରକାରେ ସୋମବାର ରାୟଗଡ଼ା ବ୍ଲକ୍ର କେରେଡ଼ା, ଗୁଣପୁର ବ୍ଲକ୍ ଜଗନ୍ନାଥପୁର ପଞ୍ଚାୟତର ବାସନାଗୁଡ଼ା, ରାମନାଗୁଡ଼ା ବ୍ଲକ୍ର କାଟିକି ସମେତ ଗୋଟଲପଦର ଏବଂ ସାନ୍ଧୁବାଡ଼ିସ୍ଥିତ ଆନ୍ତଃରାଜ୍ୟ ସୀମା ସିଲ୍ କରାଯାଇଛି।
ସମସ୍ତ ସୀମାନ୍ତ ଅଞ୍ଚଳରେ ଆନ୍ତଃରାଜ୍ୟ ଚେକ୍ ପଏଣ୍ଟ କରାଯାଇ ବାହାର ରାଜ୍ୟରୁ ଆସୁଥିବା ଲୋକଙ୍କୁ ଯାଞ୍ଚ ଆରମ୍ଭ ହୋଇଛି। ରାଜ୍ୟ ବାହାରୁ ଆସୁଥିବା ଲୋକଙ୍କୁ ୨ ଘଣ୍ଟା ମଧ୍ୟରେ ହୋଇଥିବା ଆର୍ଟି-ପିସିଆର ପରୀକ୍ଷା ରିପୋର୍ଟ କିମ୍ବା ୨ଟି ଡୋଜ୍ ଟିକା ନେଇଥିବା ପ୍ରମାଣପତ୍ର ବାଧ୍ୟତାମୂଳକ କରାଯାଇଛି। ପ୍ରମାଣପତ୍ର ନ ଥିଲେ ଅଣ୍ଡରଟେକିଂ ଲେଖି ଗୃହ ସଙ୍ଗରୋଧରେ ରହିବାକୁ ପରାମର୍ଶ ଦେବା ନିମନ୍ତେ ଚେକ୍ ପଏଣ୍ଟ କର୍ମଚାରୀଙ୍କୁ ଜିଲାପାଳ ସରୋଜ କୁମାର ମିଶ୍ର ନିର୍ଦ୍ଦେଶ ଦେଇଛନ୍ତି। ସେହିପରି ଜିଲାପାଳ ସୋମବାର ରାୟଗଡ଼ା ବ୍ଲକ୍ର କେରେଡ଼ା ଚେକ୍ ପଏଣ୍ଟରେ ସ୍ଥିତି ଅନୁଧ୍ୟାନ କରିଥିଲେ।
