ଲୋଇସିଂହା,୧୬।୧(ଡି.ଏନ.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ ଯୋଗୀସର୍ଡା କୃଷି ସମବାୟ ସମିତିରେ ଖରିଫ ଧାନକିଣା ଚର୍ଚ୍ଚାରେ ରହିଛି। ଜାଲିଆତି କରି ଭାଗଚାଷୀ ସାଜି ଧାନ କିଣିବା ଅଭିଯୋଗରେ ପାକ୍ସ ଡିଇଓ ଚନ୍ଦ୍ରକାନ୍ତ ମିଶ୍ରଙ୍କୁ ସମବାୟ ବିଭାଗ ବରଖାସ୍ତ କରିଛି। ଏବେ ପୁଣି ଆଉ ଏକ ବିବାଦରେ ପାକ୍ସ ଛନ୍ଦି ହୋଇଛି। ପାକ୍ସଠାରୁ ୩ କିମି ଦୂର ଭାଲିଆମୁଣ୍ଡା ଆରଏମ୍ସି ସାପ୍ତାହିକ ବଜାରକୁ ମଣ୍ଡି ସ୍ଥାନାନ୍ତରିତ କରି ଧାନକ୍ରୟ କରାଯାଉଛି। ଏହାକୁ ନେଇ ବିବାଦ ଉପୁଜିଛି। କେତେକ ବୋପାରୀଙ୍କୁ ସୁହାଇଲା ଭଳି ମଣ୍ଡି ସ୍ଥାନାନ୍ତରିତ ଅଭିଯୋଗ ହୋଇଛି। ବିନା ସୁରକ୍ଷାରେ ସେଠାରେ ଖୋଲା ଆକାଶରେ ହଜାର ହଜାର ବସ୍ତା ଧାନ ପଡିରହିବା ଚାଷୀଙ୍କ ଅସନ୍ତୋଷର କାରଣ ସାଜିଛି। ଏହାକୁ ନେଇ ଆପତ୍ତି ଉଠିବାରୁ ଜିଲା ଯୋଗାଣ ଓ ସମବାୟ ବିଭାଗର ବରିଷ୍ଠ ଅଧିକାରୀ ଶନିବାର କ୍ଷେତ୍ର ପରିଦର୍ଶନ କରିଥିଲେ। ଅଧିକାରୀଙ୍କ ଉପସ୍ଥିତିରେ ଧାନ କିଣାଯାଇଥିଲା। ୭ଟି ଗାଡିରେ ୨୨ଶହ କୁଇଣ୍ଟାଲ ଧାନ ଉଠାଣ ହୋଇଥିବା ପାକ୍ସ ସୂତ୍ରରୁ ପ୍ରକାଶ। କ୍ରୟ ପୂର୍ବରୁ ମଣ୍ଡିରେ ଚାଷୀଙ୍କୁ ଛିଡା କରି ଫଟୋ ନେଇଥିଲେ ଅଧିକାରୀ। ସତ୍ୟତା ଜାଣିବା ପାଇଁ କେଉଁ ଚାଷୀ କେତେ ବସ୍ତା ଧାନ ଆଣିଥିଲେ ତାହା ପଚାରିଥିଲେ। ହେଲେ ଅଧିକାଂଶ ଚାଷୀ ବିକ୍ରି ପାଇଁ କେତେ ବସ୍ତା ଧାନ ଆଣିଛନ୍ତି କହିବା ଦୂରର କଥା, ଧାନର କିସମ ବି କହି ପାରି ନ ଥିବା ଜଣାପଡିଛି। ଅଧିକାରୀଙ୍କ ଆଗରେ ଚାଷୀଙ୍କ କାର୍ଡ ହାତେଇ ଧାନ କାରବାର କରୁଥିବା କେତେକ ବେପାରୀଙ୍କ ଅସଲତା ପଦାରେ ପଡି ଯାଇଥିବା ଆଲୋଚନା ହେଉଛି।
ଯୋଗୀସର୍ଡା, ବାଦିବାହାଲ ଓ ବୁଢୀପଦର ପଞ୍ଚାୟତର କେତେକ ଗ୍ରାମକୁ ନେଇ ଯୋଗୀସର୍ଡା ପ୍ରାଥମିକ କୃଷି ସମବାୟ ସମିତି ଗଠିତ। ୨୦୨୨-୨୩ ବର୍ଷରେ ପାକ୍ସରେ ଚାଷୀଙ୍କ ଧାନବିକ୍ରି ପାଇଁ ୮୬୫ଜଣ ଚାଷୀ ପଞ୍ଜୀକୃତ ହୋଇଛନ୍ତି। ସେଥିମଧ୍ୟରୁ ଅଦ୍ୟାବଧି ୫୪୯ଜଣ ଚାଷୀଙ୍କ ୨୧ହଜାର ୮୪୯କୁଇଣ୍ଟାଲ ଧାନକ୍ରୟ ହୋଇଛି। ପାକ୍ସରୁ ଧାନ କିଣିବା ପାଇଁ ତୁଷୁରାର ବିକାଶ, ଶ୍ରୀଗଣେଶ ଓ ନାରାୟଣୀ ମିଲର୍ସ ଟାର୍ଗେଟ ପାଇଥିଲେ। ହେଲେ ଜିଲାପାଳ ନାରାୟଣୀକୁ ଧାନକ୍ରୟରୁ ବାତିଲ କରି ଲୋକନାଥ ମିଲର୍ସକୁ ଦାୟିତ୍ୱ ଦେଇଥିଲେ। ଲୋକନାଥ ମିଲର୍ସ ଟାର୍ଗେଟ ପାଇଥିବା ୫୫୧୦ କୁଇଣ୍ଟାଲରୁ ୧ ଶହ କୁଇଣ୍ଟାଲ କ୍ରୟ କରିବାକୁ ବାକି ରହିଛି। ସେହିପରି ଶ୍ରୀଗଣେଣ ୧୦୪୦ କୁଇଣ୍ଟାଲ ୫୯ କେଜି ଧାନ କ୍ରୟ ବାକି ରହିଛି। ଅପରପକ୍ଷେ ବିକାଶ ମିଲର୍ସ ସର୍ବାଧିକ ୧୬ ହଜାର ୧୨୫ କୁଇଣ୍ଟାଲ ୭୪ କେଜି ଟାର୍ଗେଟ ପାଇଛି। ସେଥିରୁ ୧୦ ହଜାର ୯୪୯ କୁଇଣ୍ଟାଲ ୬୮ କେଜି ଏବେ ସୁଦ୍ଧା କ୍ରୟ କରିଛି। ମିଲର୍ସଙ୍କ ଅସହଯୋଗ ଯୋଗୁ ମଣ୍ଡିରୁ ଧାନ ଉଠାଣରେ ବାଧକ ସୃଷ୍ଟି ହେଉଥିବା ଅଭିଯୋଗ ହେଉଛି। ଏଥିସହିତ କଟ୍ନୀଛଟନି ଏକ ପ୍ରମୁଖ ସମସ୍ୟା ହୋଇଛି। ସମିତି ପରିସରରେ ତାର ଜାଲି ସହ ସିସି କ୍ୟାମେରା ଲାଗିଛି। ଏହାସତ୍ତ୍ୱେ ଚାଷୀଙ୍କ ଧାନ ଚୋରି ଅଭିଯୋଗ ହୋଇଆସୁଥିଲା। ଏବେ ପାକ୍ସଠାରୁ ୩ କିମିଦୂର ଖୋଲା ସ୍ଥାନରେ ଧାନ କିଣିବା ଏବଂ ବିନା ସିସ କ୍ୟାମେରାରେ ହଜାରହଜାର ବସ୍ତା ଧାନ ପଡି ରହିବା ଚାଷୀଙ୍କୁ ସଂଶୟରେ ପକାଇଛି। ଏବେବି ୧୨ ଶହ କୁଇଣ୍ଟାଲ ଧାନ ମଣ୍ଡିର ଖୋଲା ଆକାଶ ତଳେ ପଡି ରହିଛି ଏବଂ ଚାଷୀମାନେ ଶୀତକାକରରେ ଜଗି ରହିଥିବା ଦେଖିବାକୁ ମିଳୁଛି।