ସାରସକଣା,୧୯ା୧(ଡି.ଏନ୍.ଏ.): ମୟୂରଭଞ୍ଜ ଜିଲା ଝାରପୋଖରିଆ ଥାନା ଅନ୍ତର୍ଗତ ପାକଟିଆ ଗ୍ରାମର ଦିଘି କଲୋନୀ ସାହିଠାରେ ଅବକାରୀ ବିଭାଗ ମଦ ଚଢ଼ାଉ କରିବାକୁ ଯାଇଥିବା ସମୟରେ ଗ୍ରାମବାସୀଙ୍କ ଆକ୍ରୋଶର ଶିକାର ହୋଇଥିବାର ଥାନାରେ ଅଭିଯୋଗ ହୋଇଛି।
ଅଭିଯୋଗ ଅନୁଯାୟୀ, ଗୁରୁବାର ପାକଟିଆ ଗ୍ରାମ ଦିଘି କଲୋନୀସାହିଠାରେ କୁଳିଅଣା ଅବକାରୀ ବିଭାଗ ଓଆଇସି ଗିରିଶ ଚନ୍ଦ୍ର ପଣ୍ଡାଙ୍କ ନେତୃତ୍ୱରେ ଚଢ଼ାଉ କରାଯାଇ ମଦ ଜବତ କରାଯାଇଥିଲା। ତେବେ ମଦ ଜବତ କରି ଫେରିବା ସମୟରେ ସେଠାକାର ଶତାଧିକ ମହିଳା ଓ ପୁରୁଷ ଠେଙ୍ଗାବାଡ଼ି ଧରି ପ୍ରତିବାଦ କରିବା ସହିତ ଅବକାରୀ ବିଭାଗର ଗାଡ଼ି ସମ୍ମୁଖରେ ପଥର ରଖି ଗାଡ଼ିକୁ ଅଟକାଇ ରଖିଥିଲେ। ଅବକାରୀ ବିଭାଗର ଗାଡ଼ି ଡ୍ରାଇଭରକୁ ନିସ୍ତୁକ ମାଡ଼ ମରାଯାଇଥିବା ନେଇ ବିଭାଗ ତରଫରୁ ଝାରପୋଖରିଆ ଥାନାରେ ଏତାଲା ଦିଆଯାଇଛି। ଗାଡ଼ିକୁ ଦୁଇ ଘଣ୍ଟା ଧରି ଅଟକ ରଖିବା ପରେ ଆପୋସ ବୁଝାମଣା କରି ଅଧିକାରୀମାନେ ସେଠାରୁ କୌଶଳକ୍ରମେ ଖସି ଆସିଥିଲେ। ଡ୍ରାଇଭରକୁ ମାଡ଼ ମାରିଥିବା ନେଇ ଝାରପୋଖରିଆ ଥାନାରେ ୧୭/୨୩ରେ ଏକ ମାମଲା ରୁଜୁ କରାଯାଇଥିବା ଥାନାଧିକାରୀ ଫନୀନ୍ଦ୍ର ଭୂଷଣ ନାଏକ ସୂଚନା ଦେଇଛନ୍ତି।