ମହାକାଳପଡ଼ା, ୬ା୧ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ତନ୍ତିଆପାଳ ସାମୁଦ୍ରିକ ଥାନା ଅଧୀନ ଗଗୁଆ ଗଁା ଦେଇ ଭାରତୀୟ ତୈଳ ନିଗମର ପାରାଦୀପ-ହଳଦିଆ ପାଇପ୍ ଲାଇନ ଯାଇଛି। ଗଁା ନିକଟ ନିୟନ୍ତ୍ରଣ କକ୍ଷ ପରିସର ମଧ୍ୟରେ ଥିବା ଯାନ୍ତ୍ରିକ ସ୍ଥଳରେ ମଙ୍ଗଳବାର ପୂର୍ବାହ୍ନରେ ମାଟି ଖୋଳା ଯାଉଥିଲା। ଏହି ସମୟରେ ହଠାତ୍ ମାଟି ଅତଡା ଖସିଥିଲା। କାର୍ଯ୍ୟରତ ଶ୍ରମିକଙ୍କ ମଧ୍ୟରୁ ଜଣେ ଅତଡା ତଳେ ପୋତି ହୋଇ ଯାଇଥିଲେ। ଅନ୍ୟ ୫ ଶ୍ରମିକ ଅଳ୍ପକେ ବର୍ତ୍ତି ଯାଇଥିଲେ। ପୋତି ହୋଇଥିବା ଶ୍ରମିକଙ୍କୁ ଉଦ୍ଧାର କରାଯାଇ ଗୁରୁତର ଅବସ୍ଥାରେ ପ୍ରଥମେ ବାବର ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ପରେ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ଶ୍ରମିକଙ୍କୁ ମୃତ ଘୋଷଣା କରିଥିଲେ। ମୃତ ଶ୍ରମିକଙ୍କ ଘର ସ୍ଥାନୀୟ ଗୁଳୁଦିଆ ଗଁାରେ। ସେ ହେଲେ ଖଗେନ ମଣ୍ଡଳ (୫୫)। ଏହା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳର ଲୋକେ କମ୍ପାନୀ ନିୟନ୍ତ୍ରଣ କକ୍ଷ ପରିସରରେ ପହଞ୍ଚତ୍ ନାରାବାଜି କରିଥିଲେ। ମୃତକଙ୍କ ସ୍ତ୍ରୀ ସୀତାରାଣୀଙ୍କ ସମେତ ପରିବାର ଲୋକେ ଘଟଣାସ୍ଥଳରେ ପହଞ୍ଚତ୍ ଧାରଣାରେ ବସି ରହିଥିଲେ। ମୃତ ଶ୍ରମିକଙ୍କ ପରିବାରକୁ କ୍ଷତିପୂରଣ ଦେବାକୁ ସ୍ଥାନୀୟ ଲୋକ ଅଡି ବସିଛନ୍ତି। ଏ ନେଇ ଖଗେନଙ୍କ ପୁଅ କିଷ୍ଣପଦ ଥାନାରେ ଲିଖିତ ଅଭିଯୋଗ କରିଛନ୍ତି। ଥାନାରେ ମାମଲା (ନଂ. ୩/୨୧) ରୁଜୁ ହୋଇଛି। ଆଇଆଇସି ଜ୍ୟୋତିରଞ୍ଜନ ସ୍ବାଇଁ ଏକ ପୋଲିସ ଟିମ ସହ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି। ଅପରପକ୍ଷେ କମ୍ପାନୀର ଉଚ୍ଚ କର୍ତ୍ତୃପକ୍ଷ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚତ୍ କ୍ଷତିପୂରଣ ଦେବାକୁ ଆଶ୍ୱାସନା ଦେଇଛନ୍ତି। ଖବର ଲେଖା ହେଲା ବେଳକୁ ପରିବାର ଲୋକେ ଓ ସ୍ଥାନୀୟ ବାସିନ୍ଦା ଧାରଣାରେ ବସି ରହିଛନ୍ତି। ବର୍ତ୍ତି ଯାଇଥିବା ଶ୍ରମିକମାନଙ୍କ ମଧ୍ୟରେ ଗୁଳୁଦିଆ ଗଁାର ଗୋପାଳ ମଣ୍ଡଳ ଓ ସୁନିଲ ମଣ୍ଡଳ ପ୍ରମୁଖ ଏହି କାର୍ଯ୍ୟରେ ନିୟୋଜିତ ଥିଲେ। ଅପରପକ୍ଷେ କାର୍ଯ୍ୟରେ ଲଗାଇଥିବା ଶ୍ରମିକମାନଙ୍କୁ କମ୍ପାନୀ କର୍ତ୍ତୃପକ୍ଷ ନିରାପତ୍ତା ସକାଶେ ସୁରକ୍ଷା ସରଞ୍ଜାମ, ହେଲ୍ମେଟ, ସେଫ୍ଟି ଜୋତା, ଲାଇଫ୍ ଜ୍ୟାକେଟ ଆଦି ଯୋଗା ଯାଇ ନ ଥିବା ଶ୍ରମିକମାନେ ଅଭିଯୋଗ କରିଛନ୍ତି।