ତିହିଡ଼ି, ୧୦ା୮(ସ୍ବ.ପ୍ର.)-ଭଦ୍ରକ ଜିଲା ତିହିଡ଼ି ୟୁକୋ ବ୍ୟାଙ୍କ ଶାଖାରୁ ପେନସନ ନେବା ପାଇଁ ଜଣେ ଅସହାୟ ବୃଦ୍ଧ ଟ୍ରଲିରେ ବୁହାହୋଇ ବ୍ୟାଙ୍କକୁ ଆସିଥିବା ଦେଖିବାକୁ ମିଳିଥିଲା। ସେ ଜଣେ ଅବସରପ୍ରାପ୍ତ ଶିକ୍ଷକ ପଦନ ଚରଣ ନାୟକ(୭୫)। ତାଙ୍କ ଘର ସିନ୍ଦୋଳ ଗ୍ରାମରେ। ସେ ବ୍ୟାଙ୍କ ଆସିବା ପାଇଁ ଅସହାୟ ହୋଇଥିବାରୁ ଘରେ ପେନସନ ଦିଆଯିବା ଲାଗି ବ୍ୟବସ୍ଥା କରାଯିବାକୁ ଗତମାସରେ ବ୍ୟାଙ୍କ କର୍ତ୍ତୃପକ୍ଷଙ୍କଠାରେ ଆବେଦନ କରିଥିଲେ। ବ୍ୟାଙ୍କ ପକ୍ଷରୁ ଏନେଇ କୌଣସି ବ୍ୟବସ୍ଥା କରାଯାଇ ନ ଥିଲା ବୋଲି ପେନସନ୍ଧାରୀ ତାଙ୍କ ପ୍ରତିକ୍ରିୟାରେ କହିଛନ୍ତି। ଫଳରେ ତାଙ୍କୁ ଏକ ଟ୍ରଲିରେ ବ୍ୟାଙ୍କକୁ ପେନ୍ସନ ଟଙ୍କା ଉଠାଣ ପାଇଁ ଅଣାଯାଇଥିଲା। ଏ ସମ୍ପର୍କରେ ବ୍ୟାଙ୍କ ଉପଶାଖା ପରିଚାଳକ ସଞ୍ଜୁକ୍ତା ସାହୁ କହିଥିଲେ ଯେ, ଆମ ବ୍ୟାଙ୍କ ଶାଖାରେ ଅଳ୍ପ ସଂଖ୍ୟାରେ କର୍ମଚାରୀ ଥିବାରୁ ସାମୟିକ ଅସୁବିଧା ହେଉଛି। ତଥାପି ଆସନ୍ତାମାସଠାରୁ ତାଙ୍କୁ ଘରେ ପେନସନ ପ୍ରଦାନ କରାଯିବାର ବ୍ୟବସ୍ଥା କରାଯିବ।