ଦୁନିଆର ଅନେକ ଲୋକ ସେମାନଙ୍କର ଅଦ୍ଭୁତ କାର୍ଯ୍ୟ ପାଇଁ ସବୁବେଳେ ଚର୍ଚ୍ଚାରେ ରହିଥା’ନ୍ତି। ଉତ୍ତରପ୍ରଦେଶର ବାରାଣସୀରେ ରହୁଥିବା ଜଣେ ବୃଦ୍ଧା ମଧ୍ୟ ତାଙ୍କର ଅଜବ ଅଭ୍ୟାସ ହେତୁ ଆଜିକାଲି ଚର୍ଚ୍ଚାରେ ରହିଛନ୍ତି। ଏହି ବୃଦ୍ଧାଙ୍କ ନାମ କୁସମାବତୀ ଦେବୀ ଏବଂ ତାଙ୍କୁ ୮୦ ବର୍ଷ। କୁସମାବତୀଙ୍କର ଏକ ଅଦ୍ଭୁତ ନିଶା ଅଛି, ଯାହା ଜାଣିଲେ ପାଦତଳୁ ମାଟି ଖସିପଡ଼ିବ।
ବୟସର ଅପରାହ୍ନରେ ଥାଇ ମଧ୍ୟ କୁସମାବତୀ ପ୍ରତିଦିନ ଅଧା କିଲୋ ବାଲି ଖାଉଛନ୍ତି। କେବଳ ଏତିକି ନୁହେଁ, ସେ ୧୮ ବର୍ଷ ବୟସରୁ ଏହା କରୁଛନ୍ତି। ଆଶ୍ଚର୍ଯ୍ୟଜନକ କଥା ହେଉଛି, ଏତେ ବର୍ଷ ଧରି ତାଙ୍କର କୌଣସି କ୍ଷତି ହୋଇନାହିଁ। ସେ ଆରାମରେ ବାଲି ହଜମ କରୁଥିବାବେଳେ ଡାକ୍ତରମାନେ କହିଛନ୍ତି ଏହା ବିପଜ୍ଜନକ ନୁହେଁ।
କୁସମାବତୀ ପ୍ରତିଦିନ ଜଳଖିଆ ଖାଇବା ପରେ ବାଲି ଖାଇଥାନ୍ତି। ସେ କୁହନ୍ତି, ତାଙ୍କୁ ଯେତେବେଳେ ୧୮ ବର୍ଷ ହୋଇଥିଲା, ସେତେବେଳେ ସେ ଥରେ ଡାକ୍ତରଙ୍କ ଦ୍ୱାରା ଚିକିତ୍ସିତ ହୋଇଥିଲେ। ସେ ପାଉଁଶ ଖାଉଥିଲେ। ପାଉଁଶ ଖାଇବା ପରେ ଧିରେ ଧିରେ ବାଲି ଖାଇବା ଅଭ୍ୟାସ ଜାରି ରଖିଲେ। ଏବେ ସେ ଦିନକୁ ୫୦୦ ଗ୍ରାମର ବାଲି ଖାଉଛନ୍ତି। ଦିନେ ବାଲି ନ ଖାଇଲେ ତାଙ୍କୁ ରାତିରେ ନିଦ ହୁଏ ନାହିଁ। ତାଙ୍କର ଏହି ଅଦ୍ଭୁତ ଅଭ୍ୟାସ, ତାଙ୍କୁ ସାରା ବିଶ୍ୱରେ ପ୍ରସିଦ୍ଧ କରିପାରିଛି। ବର୍ତ୍ତମାନ କୁସମାବତୀ ଏକ କୁକୁଡ଼ା ଫାର୍ମ ଚଳାଇ ରୋଜଗାର କରୁଛନ୍ତି।