ନୟାଗଡ଼ ଅଫିସ,୫।୨: ଖୋର୍ଦ୍ଧା ବଲାଙ୍ଗୀର ରେଳପଥର ନୟାଗଡ଼ ସଦର ଥାନା ଅନ୍ତର୍ଗତ ରାଇପୁରଠାରେ ଟ୍ରେନ ଇଞ୍ଜିନରେ ଧକ୍କା ହୋଇ ଜଣେ ବୃଦ୍ଧଙ୍କର ମୃତ୍ୟୁ ହୋଇଛି। ମୃତକ ହେଲେ ଖଦାଳ ରାଉତ(୬୦)। ଘର ରାଇପୁର ଗାଁରେ।
ସୂଚନାନୁଯାୟୀ, ଖଦାଳ ରେଳପଥରେ ଯାଉଥିବା ବେଳେ ଭୁବନେଶ୍ୱର ନୂଆଗାଁ ପାସେଞ୍ଜେର ସ୍ପେଶାଲ ଟ୍ରେନ ଆସୁଥିବା ଜାଣି ପାରି ନଥିଲେ। ତାଙ୍କ କାନକୁ ଭଲ ଭାବେ ଶୁଭୁ ନ ଥିବାରୁ ଟ୍ରେନ ଇଞ୍ଜିନ ତାଙ୍କୁ ଧକ୍କା ଦେଇ ଚାଲି ଯାଇଥିଲା। ଖବର ପାଇ ନୟାଗଡ଼ ସଦର ଥାନା ପୋଲିସ ଖଦାଳଙ୍କୁ ଗୁରୁତର ଅବସ୍ଥାରେ ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।