କେନ୍ଦୁଝର/ଢେଙ୍କିକୋଟ,୧୭।୧୨(ସ୍ବ.ପ୍ର./ଡି.ଏନ.ଏ.): କେନ୍ଦୁଝର ଜିଲା ଘଟଗାଁ ଥାନା ଭୋଳବେଡ଼ା ଗ୍ରାମର ମୁଣ୍ଡା ସାହିରେ ବୁଧବାର ଡାହାଣୀ ସନ୍ଦେହରେ ଜଣେ ବୃଦ୍ଧାଙ୍କୁ ଟାଙ୍ଗିଆରେ ହାଣି ନିର୍ମମ ଭାବେ ହତ୍ୟା କରାଯାଇଛି। ଏହି ଘଟଣାରେ ଜନୈକା ନାବାଳିକା ଓ ଜଣେ ନାବାଳକ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ପୋଲିସ ସେମାନଙ୍କୁ ଜୁଭେନାଇଲ୍ କୋର୍ଟକୁ ପଠାଇଦେଇଛି। ମୃତା ମହିଳା ହେଲେ କୁନି ମୁଣ୍ଡା(୬୫)। ଏ ନେଇ ଥାନାରେ ଏକ ହତ୍ୟା ମାମଲା (ନଂ.୧୬୨/୨୦) ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ, ଗ୍ରାମରେ କାହାର ଦେହ ଖରାପ ହେଲେ କୁନି ଗୁଣିଗାରେଡ଼ି କରୁଥିବା ସନ୍ଦେହ କରାଯାଉଥିଲା। ବୁଧବାର ରାତି ୮ଟାରେ ଗ୍ରାମରେ ଭୋଜି ଭାତ ଚାଲିଥିବାରୁ ଏକୁଟିଆ ରହୁଥିବା କୁନିଙ୍କୁ ଘରେ ପଶି ହତ୍ୟା କରାଯାଇଥିଲା। ଖବରପାଇ ଘଟଗାଁ ଏସ୍ଡିପିଓ ରବୀନ୍ଦ୍ର କୁମାର ମଲ୍ଲିକ, ଥାନାଧିକାରୀ ଶ୍ୟାମଘନ ବେହେରା ଗୁରୁବାର ସକାଳୁ ଭୋଳବେଡ଼ାରେ ପହଞ୍ଚି ତଦନ୍ତ କରିଥିଲେ। ସନ୍ଧ୍ୟାରେ ଉକ୍ତ ନାବାଳିକା ଓ ନାବାଳକ ଢ଼େଙ୍କିକୋଟ ଫାଣ୍ଡିରେ ଆତ୍ମ ସମର୍ପଣ କରିଥିବା ଫାଣ୍ଡି ଅଧିକାରୀ ସତ୍ୟ ନାରାୟଣ ପରିଡ଼ା ସୂଚନା ଦେଇଛନ୍ତି।
