ବେଲପଡା, ୨୩।୪: (ଡି.ଏନ.ଏ.) ବଲାଙ୍ଗୀର ଜିଲା ବେଲପଡା ବ୍ଳକ ନୁନହାଡ଼ ପଞ୍ଚାୟତ ଅନ୍ତର୍ଗତ ଡୁଙ୍ଗୁରିପାଲି କଲୋନୀ ପଡାର ଜଣେ ବୃଦ୍ଧଙ୍କ ମୃତଦେହ ୩୬ଘଣ୍ଟାରୁ ଉଦ୍ଧର୍ବ ସମୟ ହେଲା ତାଙ୍କ ଘରେ ପଡିରହିଛି। ହେଲେ ବୃଦ୍ଧଙ୍କ ପୁଅ ଓ ପରିବାର ଲୋକେ ଦାଦନ ଖଟି ଯାଇଥିବାରୁ ତାଙ୍କର ଅନ୍ତିମ ସତ୍କାର କରାଯାଇ ପାରୁନାହିଁ। ଖବର ପାଇ ତେଲଙ୍ଗାନାରେ ଦାଦନ ଖଟୁଥିବା ମୃତକଙ୍କ ପୁଅ ପରିବାରର ଅନ୍ୟ ସଦସ୍ୟଙ୍କୁ ସେଠାରେ ଛାଡି ବାପାଙ୍କ ସତ୍କାର ପାଇଁ ଗଁାକୁ ଆସୁଥିବା ଜଣାପଡିଛି। ଡୁଙ୍ଗୁରିପାଲି କଲୋନୀ ପଡାର କୁମରମଣୀ ଛତ୍ରିଆ (୮୦)। ଦୁଇବର୍ଷ ତଳେ କରୋନାରେ ଆକ୍ରାନ୍ତ ହେବା ପରେ ସ୍ତ୍ରୀ ହଂସ ଛତ୍ରିଆଙ୍କ ମୃତ୍ୟୁ ଘଟିଥିଲା। ଚଳିତ ବର୍ଷ ଦୁଇପୁଅ ଲାଲ ସାହେବ ଛତ୍ରିଆ ଓ ଗଣପତି ଛତ୍ରିଆ ସ୍ଥାନୀୟ ଜଣେ ଦଲାଲଙ୍କ ଜରିଆରେ ତେଲଙ୍ଗାନା ପ୍ରଦେଶ କଙ୍ଗରା ଜିଲା ଅନ୍ତର୍ଗତ ସାଇଗୁଡା ଅଞ୍ଚଳର ଏକ ଇଟାଭାଟିରେ କାମ କରିବାକୁ ଯିବା ପରେ କୁମରମଣୀ ଘରେ ଏକୁଟିଆ ରହୁଥିଲେ। ଦୁଇଦିନ ହେଲା କୁମାରମଣି ଘରୁ ବାହାରକୁ ବାହାରି ନ ଥିଲେ। ସନ୍ଦେହରେ ପଡୋଶୀ ଘର ଖୋଲିବା ପରେ ତାଙ୍କର ମୃତ୍ୟୁ ହୋଇଯାଇଥିବା ଦେଖିବାକୁ ପାଇଥିଲେ। ସାହି ପଡିଶା ଏନେଇ ତେଲଙ୍ଗାନାରେ ଥିବା ଦୁଇ ପୁଅଙ୍କୁ ଫୋନ ଯୋଗ ଜଣାଇଥିଲେ। ଏକଥା ପୁଅ ଗଣପତି ଭାଟି ମାଲିକ ଓ ସ୍ଥାନୀୟ ଦାଦନ ଦଲାଙ୍କୁ ଜଣାଇଥିଲେ। ହେଲେ ଭାଟି ମାଲିକ ପରିବାର ବର୍ଗଙ୍କୁ ଛାଡି ନ ଥିଲେ। ଶେଷରେ ଅନ୍ୟନୋପାୟ ହୋଇ ପରିବାର ବର୍ଗଙ୍କୁ ସେଠାରେ ଛାଡି ଗଣପତି ବାପାଙ୍କ ଦାହ ସଂସ୍କାର କରିବା ପାଇଁ ନିଜ ଗାଁକୁ ଆସୁଥିବା ଜଣାପଡିଛି। ସେଠାରେ ଅନ୍ୟ ସଦସ୍ୟଙ୍କୁ ଭାଟି ମାଲିକ ଜୋର ଜବରଦସ୍ତି କାମ କରାଉଥିବା ପରିବାର ବର୍ଗ ଫୋନରେ ଜଣାଇଛନ୍ତି। ବେଲପଡା ବିଡ଼ିଓ ଭିକ୍ଟୋର ସୋରେନଙ୍କୁ ଏ ନେଇ ଅବଗତ କଲା ପରେ ସ୍ଥାନୀୟ ସରପଞ୍ଚଙ୍କୁ କହି ହରିଶ୍ଚନ୍ଦ୍ର ଯୋଜନା ସହାୟତା ରାଶି ପ୍ରଦାନ କରାଯିବ ବୋଲି କହିଛନ୍ତି। ମୃତକଙ୍କ ପରିବାର ଲୋକେ ବାପାଙ୍କ ଶୁଦ୍ଧିକ୍ରିୟାରେ ଫେରିବା ପାଇଁ ଆକୁଳ ନିବେଦନ କରିଛନ୍ତି। ଏଥିପ୍ରତି ଜିଲା ପ୍ରଶାସନ, ଶ୍ରମ ବିଭାଗ, ଜିଲାପାଳ ଦୃଷ୍ଟି ଦେଇ ଦାଦନ ପରିବାରର ସଦସ୍ୟଙ୍କୁ ଉଦ୍ଧାର କରିବା ସହ ବିହିତ ପଦକ୍ଷେପ ନେବା ପାଇଁ ଦାବି ହେଉଛି।