ସୋନପୁର,୩।୨(ନି.ପ୍ର.): ଗାଈ ପାଇଁ ଜିଲାପାଳଙ୍କ ଗାଡ଼ି ଆଗରେ ଶୋଇପଡ଼ିଲେ ବୃଦ୍ଧା। ଏଭଳି ଏକ ଘଟଣା ଘଟିଛି ସୂବର୍ଣ୍ଣପୁରରେ। ପ୍ରିୟ ଗାଈକୁ ଫେରାଇ ଆଣିବା ଲାଗି ସେ ଜିଲାପାଳଙ୍କ ନିକଟରେ ଗୁହାରି କରିଛନ୍ତି।
ସୂଚନାନୁଯାୟୀ, ସୁବର୍ଣ୍ଣପୁର ମେଡିକାଲ ବାରଣ୍ଡାରେ ୨୦ ବର୍ଷ ଧରି ତରାସ ବାଘ ରହିଆସୁଛନ୍ତି। ରହିବାକୁ ତାଙ୍କର ଘର ଖଣ୍ଡେ ନାହିଁ। ହେଲେ ସେ ଏକ ବୁଲାଗାଈକୁ ନିଜର ଭାବି ପାଳି ଆସୁଥିଲେ। ଭିକ ମାଗି ଯାହା ଆଣୁଥିଲେ, ଗାଈଟିକୁ ଖାଇବାକୁ ଦେଉଥିଲେ। ହେଲେ ବୁଲାଗାଈଟିକୁ କାଞ୍ଜିଆହୁଦାକୁ ନିଆଯିବା ପରେ ତରାସ ଭାଙ୍ଗି ପଡ଼ିଥିଲେ। କାନ୍ଦି କାନ୍ଦି ନୟାନ୍ତ ହେବା ପରେ ଅନ୍ୟୋପାୟ ନ ପାଇ ଜିଲାପାଳଙ୍କ ଗାଡ଼ି ଆଗରେ ପଡ଼ି ଗାଈକୁ ଫେରାଇ ଆଣିବାକୁ ଅନୁରୋଧ କରିଥିଲେ। ଶେଷରେ ଗାଈ ଫେରିବା ପ୍ରତିଶ୍ରୁତି ପାଇବା ପରେ ସେ ଶାନ୍ତ ପଡ଼ିବା ସହ ତାଙ୍କ ମୁହଁରେ ହସ ଫେରିଥିବା ଦେଖିବାକୁ ମିଳିଛି। ଘଟଣାଟି ବେଶ୍ ଚର୍ଚ୍ଚାର ବିଷୟ ପାଲଟିଛି।