ଭୋଗରାଇ,୧୪ା୧୧(ପ୍ରଦୀପ ଦାସ): ବାଲେଶ୍ୱର ଜିଲା ଭୋଗରାଇ ବ୍ଲକ ଅଧୀନ ଜୟରାମପୁର ଗ୍ରାମରେ ଗୁରୁବାର ସକାଳେ ଏକ ଅଭାବନୀୟ ଘଟଣା ଘଟିଛି। ଘରେ ୬୫ ବର୍ଷୀୟା ରୋଗାଗ୍ରସ୍ତା ବୃଦ୍ଧା ଏକୁଟିଆ ଖଟ ଉପରେ ଶୋଇଥିଲାବେଳେ ଏକ ପାଗଳା କୁକୁର କାନ୍ଥ ଡେଇଁ ଘରେ ପଶି ବୃଦ୍ଧାଙ୍କୁ କାମୁଡ଼ି ଝୁଣି ମାରିଦେଇଛି। ମୃତା ବୃଦ୍ଧା ଜଣଙ୍କ ହେଲେ ଶ୍ରୀଧର ସାହୁଙ୍କୁ ସ୍ତ୍ରୀ ବାସନ୍ତୀ (୬୫ )।
ସୂଚନାନୁଯାୟୀ, କାର୍ତ୍ତିକ ମାସରେ ପଞ୍ଚକ ବ୍ରତ ଲାଗି ପରିବାର ଲୋକେ ଗ୍ରାମରେ ଥିବା ଚଣ୍ଡୀ ମନ୍ଦିରକୁ ବ୍ରତ ପାଳନ ନିମନ୍ତେ ଯାଇଥିବାବେଳେ ଏକ ପାଗଳ କୁକୁର ଘରେ ପଶି ବାସନ୍ତୀଙ୍କୁ କାମୁଡ଼ିବାରୁ ସେ ଚିତ୍କାର କରିଥିଲେ। ପାଖ ପଡ଼ୋଶୀ ଦୌଡ଼ି ଆସି କୁକୁରକୁ ଛଡ଼ାଇବାକୁ ଠେଙ୍ଗାରେ ଆଘାତ କରିଥିଲେ ମଧ୍ୟ କୁକୁରଟି ତାଙ୍କ ଶରୀର ବିଭିନ୍ନ ସ୍ଥାନରେ ଝୁଣି ଖାଇଥିଲା। ଘର ଭିତରେ ବାସନ୍ତୀଙ୍କ ଶରୀର ରକ୍ତ ରଞ୍ଜିତ ହୋଇଥିବା ବେଳେ ସ୍ଥାନୀୟ ଲୋକେ ପାଗଳା କୁକୁରକୁ ଠେଙ୍ଗାରେ ପିଟିପିଟି ମାରିଥିବାର ସୂଚନା ମିଳିଛି। ଭୋଗରାଇର ଗାଁ, ହାଟ ବଜାର, ଛକ ଗୁଡ଼ିକରେ ପଲପଲ କୁକୁର ବାଟୋଇଙ୍କୁ କାମୁଡ଼ି କ୍ଷତାକ୍ତ କରୁଥିବାରୁ ଜଳେଶ୍ୱରପୁର ଓ କମର୍ଦ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କୁକୁର କାମୁଡ଼ା ରୋଗୀଙ୍କ ଭିଡ଼ ଲାଗିରହିଛି। ଏଭଳି ସ୍ଥିତିରେ ବୁଲା କୁକୁରଙ୍କୁ ସାବାଡ୍ ନିମନ୍ତେ ସଧାରଣରେ ଦାବି ହେଉଛି।
