କାକଟପୁର,୭।୧୨(ଡି.ଏନ୍.ଏ.): ରାଜ୍ୟ ଓ କେନ୍ଦ୍ର ସରକାର ଗରିବ ଲୋକଙ୍କ ପାଇଁ ବିଭିନ୍ନ ଯୋଜନା ମାଧ୍ୟମରେ ପକ୍କା ଘର ଯୋଗାଇ ଦେଉଛନ୍ତି। କିନ୍ତୁ ସେହି ଯୋଜନା ପ୍ରାୟ ସମୟରେ ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚିପାରୁ ନାହିଁ। ଯାହାର ଉଦାହରଣ ଦେଖିବାକୁ ମିଳିଛି କାକଟପୁର ବ୍ଲକ ଓଥକା ପଞ୍ଚାୟତ ଅନ୍ତର୍ଗତ ଚନପୁର ଗ୍ରାମର ୭୦ ବର୍ଷୀୟ ବତାସୀ କାଣ୍ଡୀଙ୍କ କ୍ଷେତ୍ରରେ। ସ୍ବାମୀ ଓ ପିଲାଛୁଆ ନ ଥିବାବେଳେ ଏକାକି ଅସହାୟ ଅବସ୍ଥାରେ ଏକ ଜରିପାଲ ତଳେ ହିଁ ସେ ଜୀବନ କାଟୁଛନ୍ତି। ବୟସ ହୋଇଯାଇଥିବାରୁ ପେଟକୁ ଦିଓଳି ଦିମୁଠା ଖାଦ୍ୟ ଯୋଗାଡ଼ କରିବା କଷ୍ଟକର ହୋଇପଡୁଛି। ସରକାରଙ୍କ ଏତେ ଯୋଜାନା ଥାଇ ମଧ୍ୟ ତାଙ୍କୁ କୌଣସି ଗୋଟିଏରେ ମଧ୍ୟ ନଁା ନାହିଁ। ପକ୍କା ଘର ଯେମିତି ବତାସୀ ମାଉସୀ ପାଇଁ ସାତ ସପନ ପାଲଟିଛି। ଘର ଖଣ୍ଡିଏ ପାଇଁ ବତାସୀ ମାଉସୀ ସ୍ଥାନୀୟ ସରପଞ୍ଚଙ୍କଠାରୁ ବ୍ଲକ ପ୍ରଶାସନ ପର୍ଯ୍ୟନ୍ତ ନେହୁରା ହୋଇ ଆସୁଥିଲେ ମଧ୍ୟ ପ୍ରଶାସନ ନୀରବ ସାଜିଛି। ଫନୀ ସମୟରେ ବତାସୀଙ୍କ ଘର ଭାଙ୍ଗି ଯାଇଥିଲା। ପ୍ରଶାସନ ପକ୍ଷରୁ ତଦନ୍ତ କରାଯାଇ କ୍ଷତିଗ୍ରସ୍ତ ହିତାଧିକାରୀଙ୍କୁ ପକ୍କାଘର, ବିଭିନ୍ନ ସହାୟତା ମିଳିଥିଲେ ମଧ୍ୟ ବତାସୀ ମାଉସୀ ସେଥିରୁ ବଞ୍ଚତ୍ତ ହୋଇଥିଲେ। ବାରମ୍ବାର ଅଭିଯୋଗସତ୍ତ୍ୱେ କେବଳ ଆଶ୍ୱସନା ମିଳୁଥିଲେ ମଧ୍ୟ ସହୟତା ମିଳିପାରୁନି। ଏପରି କି ତାଙ୍କ ପାଖରେ ରାଶନ କାର୍ଡ, ଭତ୍ତା ମଧ୍ୟ ନ ଥିବାରୁ ବେଳେବେଳେ ଓପାସରେ ହିଁ ଦିନ କାଟୁଛନ୍ତି। ବ୍ଲକ ପ୍ରଶାସନର ଏଭଳି ଆନ୍ତରିକତା ଅଭାବ ଯୋଗୁ ସାଧାରଣରେ ଜନଅସନ୍ତୋଷ ପ୍ରକାଶ କରିଛନ୍ତି। ଏ ନେଇ ଓଥକା ସରପଞ୍ଚ ଯୁଗଳକିଶୋର ରାଉତଙ୍କୁ ପଚାରିବାରୁ ମତାମତ ଦେବା
ପାଇଁ ଏହି ପ୍ରସଙ୍ଗକୁ ଏଡ଼ାଇ ଦେଇଥିଲେ।
